Read Zeme Naga ISAIA 49 Bible Online

ISAIA 49 - Zeme Naga bible

ISAIA 49

¹A kuâ ’ngking le lau, Hei heduiluaka’ngguabe bâm ramme gau, zai seu le lau, heram kedeu ’mbe bamme ningnui hezat ramme gau. Nebâm gene Tingwang ne achu kû ’ndi de lei, a pui pum gene Tingwang ne a ji hang ’ntak kai ’ndi de lei.

²Pa ne a mui ze hiazutkie liabe gum tew gai bei de lei, pe ba kezui ge pa ne achu tei’mbai gai bei de lei; pa ne achu chuiplinglube hetu chang ra tew gai bei de lei, pe gu hetubung ge pa ne achu bai gai ’ndi de lei.

³Zai pa ne achu, “Nang â a guâ ka’ngguapeu, Israel, nang gene I a ngeutew’ndi gai gu lei,” ze kacheu de lei.

⁴Kane I ne sa ze, “Peruânggabe gene I tâtew-leisei gai ’nde lei, mâ-peruânggabe benai mâ-tâuhanggabe ge I a ranchi tew’ngga gai kam de lei; acheusede I ngaurabe ze â Tingwang dage lamui lei, zai a hî hang peipuigairabe ze â, a Rapeu dage lamui lei,” ze kacheu de lei.

⁵Zai Tingwang mikngau ge achu â, tei’ndi gai ze bam dadege chunage Tingwang, achu pe guâ ka’ngguapeu hang, pe dage Jakobbe je nguawang gai ra hang, dezai pe dage Israel je nguawang’ndui gai ra hang nebâm gene achu tewgaipeu, zai a ranchi hang changgaibeipeu Hera—

⁶Pa ne rang ze, “Jakobbe zat ramme je teichu gai ra, zai I ne ’nggum ze bamme Israel je nguawang gai dai ra a guâ ka’ngguapeu hang nang changrabe ze ning hangge heput ’ncha’mpia de lei; heramzatme ramme hangge I ningchu kebabe pei gai gu lei, dezai a gu tewka’nringbe ze kedeimik deulangbe ge wangchang gai ra hangge zeu,” ze kacheu de lei.

⁷Aigum ze Tingwang, Israel gu Ripatpeu, zai pe gu Ka’nchibe Hangkat ne, heramzat ramme ne duîzuttew’mpia ze, ngau’nrie ze bampeu, heguangme samramme guâ ka’ngguapeu je rang ze: “Heguangme ramme ngau lu zuachu gu lei; heguangsinme ramme, zai penui ne hengêutew ze kâukeuliâ gai gu lei; Tingwang, lungsangtewpeu, Israel gu Ka’nchibe Hangkat, ningchu kelânggaipeu ziegeneu,” ze kacheu de lei.

⁸Tingwang ne aigum ze rang lei: “Ngauka’nggiabe ting ge I ne ning kuâ kak kai bei de lei, tewka’nringbe mai ge I ne ningchu ’ngngâ gai bei de lei; baudime hangge samhatkaibe hang chang ze heram je tei’nsap kai ra, heram putzînggai’ndibe timchâk ze reheîwang gai ra I ne ningchu kai de lei, zai pei gai de lei;

⁹nang ne kebangki ge bamme je, ‘Zuapat te zu lau,’ acheu gai, kemuîbe ge bamme je, ‘Kebabe ge pat ze sap te zu lau,’ acheu sa gai ze tâtew gai ra hangge zeu. Penui ne ’mpuîki ramme ge meli ramme je nguadeteu-zutza ze tat ku de lei, ketaîloa ramme ze penui gu melitaning chang ze bam gu de lei;

¹⁰penui ’njei-herei ra mak lei, tingkai du hegi ra mak, zai naichiê du puteu ra mak lei, penui peireige ngauka’nggiapeu ne penui je nguatat ku daseu, zai pa ne penui je hedui-depin keringbe bâm ge ngua gai gu daseu.

¹¹Zai I ne a gu kedeiloa ramme ze ’mpuîki hang tew kam gai gu lei, zai a gu ’mpuîhimdi ramme ze tei’nsap gai bu lei.

¹²Ni, pie le lau, airamme ze kedeu ’mbene wang gu lei, zai ni pie le lau, airamme ze tingpeî ’mbene zai tingrun ’mbene wang gu lei, zai airamme ze Sienne gene wang gu lei,” ze acheu zeu.

¹³Hesuiyi ze heleutew zu lau, Hei tinggîm ge piehang ngaube ramme gau, zai hesuiyi ze ’nsumchai zu lau, Hei kedeirei gau; heleutew-him gai zu lau, Hei kedeiloa ramme gau! Tingwang ne pe gume je tum gai bei de lei, zai tewkahereube lieme pe gume peireige ngau’nggia gai gu lei.

¹⁴Kane Zaion ne sa ze, “Tingwang ne achu â put kai bei de lei, a Wangpeu ne achu â ’ngngaî ’ndi de lei,” ze kacheu de lei.

¹⁵“’Mpuimi hangkat ne pe na pa ne puatung poine je ’ngngaîchi duî mei, chidezai pe gu nebâm gene patbe ’mpeuminapoine je pa ngau’nggia gai mak ra hangge zeu? Airamme ne ’ngngaî sede I â ningchu ’ngngaî ra mak lei.

¹⁶Pie le lau, I ne a badei kena ge ning ji ’nrit kai ’nde lei; ning gu kerie-riebe ramme ze a masuage bam bam la lei.

¹⁷Ning gu hekitewme ne ningchu tewka’nsiame suadu raî dai de lei, zai ningchu gechim’nsiagaime ning dagene tat te de lei.

¹⁸Ning ma ’ngngangchu lu heguarua gai ze ngau le lau; penui ’nteumena ’nduiwang gai la de lei, penui ning tailam wang lei. I bambe ziegene nang ne chime bau je kakerube kerua ramme gum ze nang tei ze bam gu de lei, (henâu) meipui ne chiramme tei gum ze nang ne chime bau je tei gu lei.

¹⁹“Ning bâm ramme gechim’nsia ze sâuzînggai’ndibe ramme benai ning gu heram gua’mpie-zînggai’ndibe— chuna â ning hangge bamgairabe bâm hang chei-gesang gai du de lei, zai ningchu ’nzuakeugai’ndime ze kedeu ’mbe bam du de lei.

²⁰Nang ning duângga bambe ting gene napoine ramme lungkeume ne ning kun ge, ‘Chipau bâm ze a hangge bamtâulak lei; I lung ze bam ra a hangge pebâm teleu gai lau,’ acheu dai gu rei de lei.

²¹Chidezai nang ne ning lung gene acheu ze sa gu lei: ‘Châu ne aime ramme je a hangge lungkeu gai lau? Achu â a duângga ze bam ra, zai a runne ’nnîkelak ze bam ra, zai kelipat kai bei ze bam ra tew gai bei de lei, zai achu â bangnam gai bei de lei, kane châu ne aime je nguawang gai lau? Pie le lau, achu â sâu’nggiâkia gai bei de lei; ’ndaigene penui wang lau,’ ze acheu zeu,” ze kacheu de lei.

²²Tingwang HERA ne aigum ze rang lei: “Pie le lau, I ne a ba heramzatme lam’mbe getua’nrikchu gai gu lei, zai hezatramme lam’mbe a gu hepiepaî teichu gai gu de lei; dezai penui ne ning na ’mpeumi ramme je penui ga ge pua gai lu wang gu lei, zai ning na ’mpuimi ramme je penui keîtoa ge kai lu wang gu lei.

²³Heguangme ramme zene ning peu sing mak sedu, ningchu ’nsichupeu ning peume hang chang ze bam gu lei, zai penui na ’mpuimi ramme zene ningchu ’nsichupui hang chang ze bam gu lei. Penui ju kedei ge tûngtâuchang ze ning dage penui ne ’ngkumkeu gu lei, zai ning pî ge kedeiniamoîne bambe ’nniak ku lei. Chidezai nang ne I ze Tingwang de lei be chî gu lei; achu kuâbamme je â, tewkengam gai ra mak lei,” ze acheu zeu.

²⁴Peranchipeu dagene sutlube kerua zat lu le dui semei, makchai pe tegarâsiapeu dagene kebang hang tuîtattime je meupat dui se mei?

²⁵Tingwang ne aigum ze rangsing lei: “Peranchipeu gu kebang hang tuîwangme je ’nsangdu lutat tu lei, zai pe tegarâsiapeu gu sutlube kerua zat ’nsangdu sutpat kai bu lei, I ne ningchu giême je giê gu lei, zai I ne ning name ramme je tew’nringpat kai gu lei.

²⁶Ningchu kagetedme je penui runne penui pumji teu ra I ne tew gai gu lei, zai wain ne kameneu gum ze penui jai ne sakmeneu ra I ne tew gai gu lei. Chidezai ziemmena hemeipum leine ne I ze Tingwang, ningchu tewka’nringpeu, zai ningchu Ripatpeu, Jakobbe gu Dilangpeu Hangkat lei be chî gu lei,” ze acheu zeu.