Read Zeme Naga ISAIA 5 Bible Online

ISAIA 5 - Zeme Naga bible

ISAIA 5

¹I kehungpeu hangge pe gu grepchî merie deu ge kehungbe leu I ne tew gai be che lei: I kehungpeu pe gu grepchî merie kedeiyibe deiloa ge bam lei.

²Pa ne bekuiki su gai, zai tingchu ramme kelattua gai de lei, zai grepchî keî yibe ramme tau gai lei; helu sumzui ge pa ne helu reîbeki tew gai lu, zai grepchî neirabe kuiki hangge kui zun gai lei; zai grepchî ’nchikeurabe pa piekua bam de lei, kane hênam gu grepchî ’nchikeu de lei.

³Chidaze chuna â, Hei ningnui Jerusalem ge lungme, zai Juda gu ziemmename gau, ningnui je I kiam lei, I benai a gu grepchî merie kakge samram le lau.

⁴A gu grepchî merie hangge chige I tew’nsangmaktaibe ’ndaikau larei lau? Grepchî ramme ’nchikeu ra I piekua bambe luage, ’ndaitew ze hênam gu grepchî ramme ’nchikeu lau?

⁵Chidaze chuna â a gu grepchî merie peireige I ’ndaikau tâ tew gai ra mei be ningnui je I rang gai gu de lei, zai chize rûmia gai gu lei; tingchu kerie rieguabe I ne tewpâng gai gu lei; zai chize kedîmba gai bu lei.

⁶Put-hâmmuî gai ra I ne tew gai gu lei, bekeî gesiap’ndiau gai dai ra mak, zai kebau gai dai ra mak lei, zai hetupat ramme benai hetubang ramme puakpat ku lei. Kemâu ramme je du chige tingruikeu gai mak ra I ne die gai bu lei.

⁷Baudime gu Tingwang gu grepchî merie â, Israel ki ze daseu, zai Judaram gu ziemmename ze â, pe gu peluiyibe bang ramme ze de lei; zai samrambe ka’nzeibe ngau ra pa kaheguî de lei, kane pie le lau, hejailuabe dau lei; kapelingbe tâ tew ra heguî bam lei; kane hapka’nrungbe kuâ seu lei!

⁸Miramme hangge pebâm ka’nruabe ga di, zai ningnui runne chi heram lungge lungbe kau chang mak tâne, heki ramme tewsuâpatbi-bi, helu ramme tew’ngkiepatbi-bi bambe kau ziemmena ramme â penui duângga gu lei.

⁹Baudime gu Tingwang ne I seube gene aigum ze deseu gai de lei: “Pelingsing ze heki ramme misongga ze gua’mpiezîng gai gu lei, heki kedibe benai pengêudibeki ramme ge mî de lungrabe kau ga gu lei.

¹⁰Grepchî merie hua kereu tewgaibe gene wain hit desat runne ngau gu lei. Helei hit haî kat ze riakdesat linggaibe gene chêu hit kereu ze desat runne gekumwang gai gu lei.”

¹¹Hechua ge chuzisi lu, wain peranchibe peu ze ’nsaruabe kau, wain ne penui je rûlumbup kai mak tâne hegî ting riâ chang ze kezitrua bambe kau ramme penui duângga gu lei.

¹²Penui luube-bâm ramme leine ge ’nrabung benai ria kereu gu ’nrabung, zai ’ntoî benai metiam puigit ze bam lei; kane penui â, Tingwang tatew ramme ’nning’ndi gai mak lei, zai pe batâ tewgaibe ze du ngau mak lei.

¹³Chipauziegene a gu ziemmename kebang ge gut lei, penui mâ-gechîbe chambe ziegeneu. Penui ruage hengêutewbuime kemei-meichat lei, zai penui gu baudime je (hedui) kahereibe ne penui ku changku ze bam lei.

¹⁴Chidadege Kechaiberam ze pe gun di’nteu de lei, zai ’ndeuchilaktibe riâ pe mui ’ngngalatla gai de lei, zai Jerusalem gu pengêudime benai pe gu baudime chige keu gai lei, pe gu ziemmena seikamlakme benai pechu toamelua ze bamme leine zeu.

¹⁵Ziemmena je tew’nsukrung gai, zai misonggame je tei’nnakeu gai bei, zai gechîrettewme mik ramme tewhelêukau gai bei de lei.

¹⁶Kane baudime gu Tingwang je â, samramkapelingbe gene pengêutew’ndi gai lei, zai Ka’nchibe Rapeu ze â, kapelingbe gene pa ka’nchibe teilia lei.

¹⁷Chidezai meli ramme petaning ge gum ze chige deteu gu, zai peleuyibe ramme benai kemeipoine hênam piezîngdibe bâm ge deteu ze bam gu lei.

¹⁸Pelingtewmakbe gu heria ramme ne hemui je zukereuruabe kau, hekuntimriang chakbe ria ne gum ze hemui je chakkereuruabe kau,

¹⁹acheu sa ze, “Peize pechu du kelua gai zu lau, anui ngaurabe hangge peize pe tâ tewkelua gai zu lau; Israel gu ka’nchibe Hangkat ne tatew gai ra ’nninggaibe ze peize wang’nna zu lau, anui chî le ra hangge peize chize wangchang gai zu lau,” ze kacheube kau ramme penui duângga gu lei.

²⁰Kesiabe je keyibe ze kû, zai keyibe je kesiabe ze kube kau ramme, kemuîbe je kebabe hang chak kai, zai kebabe je kemuîbe hang chakkaibe kau ramme, gekabe je gekumbe hang chak kai, zai gekumbe je gekabe hang chakkaibe kau ziemmename penui duângga gu lei!

²¹Kaningchingme hangge penui runne penui je penui mikpie ge ngaugaibe kau ramme, zai ’nrakhakbe kau hangge penui runne penui je riamgaibe kau ramme penui duângga gu lei.

²²Wain sakbe ge peranchime, zai wain peranchibe haisakbe lam ge helungdime,

²³henimluteube ka’nzeibe hang riamgaime, zai hemâugabe ’nzei peireige mâ-hang du chakkaimakme ze penui duângga gu lei!

²⁴Chidaze hemimelei ne megau rûka’nggabe gum, zai hereuneu kîkeruîdibe hemi ge himkeugaidibe gum, chigum ze penui hiâm ramme tiam gai du lei, zai penui pâ pabe kemût gum liampangtat tu lei; baudime gu Tingwang ne kaladdeibe kuâ penui pheu mak, zai Israel gu Ka’nchibe Hangkat gu sam penui ngau’nna di daseu.

²⁵Chipauziegene pe gume peireige Tingwang pe lumpum di de lei, zai penui peireige pe ba huachu gai ze penui je tewsâ de lei, zai kedeiloa ’ntûm hube ramme kakechuî de lei; zai penui gu kechaipum ramme ze â, puidi ge kerachut tuâ’nduigaibe gum chang gai di de lei. Airamme leine peireige pe lumpumbe ’mbia mak rei lei, zai pe ba huachu gai ze lamui rei lei.

²⁶Kedeu ’mbe bambe heram je himnâ gai ra ka’nchetbe pa ne teichu gai gu lei, zai kedeimik deulangbe ramme gene chipau deu hangge ’nzahîu gai gu lei; zai pie le lau, ’nzet-desang, zai kelua-desang ze wang mui de lei!

²⁷Penui ruage mî de lei mak, mî de kâu mak, mî de ’ngngui mak zai jei de jei mak, penui kiakâk katte helui mak, pîchûp ria katte kaitap mak lei;

²⁸penui gu bai’mpitu ramme â pemui lia lei, penui gu bai’mpi leine ’mbungring bam lei, penui gu hekun pitûn ramme â chusangkâng luigum lei, zai penui gu timriang pigua ramme â, natri ka’nruibe gum bam lei.

²⁹Penui ka’nrungbe kuâ â duilui kuâ gum lei, duiluipoine ramme gum penui kakehuk lei; penui kuâ ’nrakeleulia ze penui gu heteu je kakedui (nîm) lei, chize penui ne nîmtat lei, zai mî de meupat lak lei.

³⁰Chipau mai dezai chi penui gu heteu peireige sungkling ka’mbeu gum ’mbeu gu lei. Zai mi ge chi heram ge hegua gai dizai â, pie le lau, kemuîbe benai mi duânggabe ’nnia lei; zai kemâu ramme ne kebabe je sungmuî ’ndi de lei.