Read Zeme Naga ISAIA 50 Bible Online

ISAIA 50 - Zeme Naga bible

ISAIA 50

¹Tingwang ne aigum ze rang lei, “Ningnui pui je I ne tatuabe pe gu kelakchakbe-leisikuak ze ’ndaige la lau? Makchai I ne hepâupungme, I ne ningnui je zuagaibeime ze ’ndai ze lau? Pie le lau, ningnui gu hemui-helut bambe ziegene ningnui je zua gai ’ndi de lei, zai ningnui gu hedieka’ngkabe bambe ziegene ningnui pui je tatuâ ’ndi de lei.

²I wanggaibe ting ge ’ndaitew mî du ga lau? I kûgaibe luage ’ndaitew mî ne kak kai ra ga lau? Ningnui je ripatchi lak ra a ba tew’ndui gai ’ndi semei? Makchai ningnui je lupat kai ra, a dage tâtewchibe rezie ga semei? Pie le lau, I ne kiâ gai bei ze sungkling changku gai di lei, I ne tingkangram ze ’nggeuki ramme hang tew gai lei; penui gu hekâ ramme ze hedui chamdibe ziegene nampak bam de lei, zai hedui herei ze chai de lei.

³Tinggîm piehang ngaube ramme je I ne getikbe ne bâchim gai bei de lei, zai penui gu tapnambe ze miseigiriapaî ne tew gai bei de lei,” ze acheu zeu.

⁴Tingwang ne geteiliabeime leiria ze achu pei gai bei de lei, chidezai leidipeu je I sam ne tei’nringrabe tak chî le ra hangge zeu. Hechua ’nsangne ge pa ne achu ’ngkiachu gai lei, geteigaibeime gum ze seu ra pa ne a kun ge ’ngkia gai lei.

⁵Tingwang Hera ne a kun ze lat kai bei de lei, zai I â ka’nggibe kau mak lei, I â hechai’nnuktat me lei.

⁶Achu bêume je I a ching lie gai lei, zai a tekangmai paipatme je a tekang lie gai lei; ’ngngamrabe benai ’nchai’ntuigairabe gene I â a ju ’mbiatat mak lei.

⁷Tingwang Hera ne achu ’ngngâ gai bei de lei; chipauziegene helêukeu gai mak ze bam lei; chipauziegene tingchugeukâng gum ze I a magei tew’nchi gai de lei, zai achu tew’ngngam gai ra mak lei be I chi lei;

⁸a hangge peling rangpatkaipeu â kenahia ge la lei. Châu ne achu giê ra lau? Anui sapchu kam gai kei lei. Châu a teurei lau? Peize pechu a tailam wang’nna lau.

⁹Pie le lau, Tingwang Hera ne achu ’ngngâ la lei; châu ne a mâu ze rangba gai ra lau? Pie le lau, penui ’nteumena je paî gum ze bâ’nsia gai gu lei; pekaukerie ne penui je teu kam ’ndu lei.

¹⁰Ningnui ruage châu Hera je hing ze pe guâ ka’ngguapeu kuâpheube kau kemuîbe ge tat ze pe dage kebabe ’ngga, acheusedu Tingwang ji ge ’nnumtew ze pe Rapeu je ’nggui ze bambe kau ze châu lau?

¹¹Pie le lau, ningnui ’nteumena hemika’ntaume, keleu ’ntaugaime gau! Ningnui gu hemi gene, zai ningnui ne keleu ’ntaugaibe gene tat lau! Aize a ba gene ningnui ngaurabe lei: ningnui hereuteniangtiangbe ge bam gu lei.