Read Zeme Naga ISAIA 51 Bible Online

ISAIA 51 - Zeme Naga bible

ISAIA 51

¹“A kuâ seu gai lau, ningnui ripatkaibe je guaka’nsame, ningnui Tingwang je peume gau; ningnui je giapatkaibe bâm tingchu je pie le lau, zai ningchu supatkaibe bâm mâ-sube kuiki je pie le lau.

²Ningnui peu Abrahambe benai ningnui je lungkeupui Sarale je pie le lau; pa pe runne bambe ting ge I ne pechu kû gai bei de lei, zai I ne pechu ’nnam gai ze pechu pehaîhikme misongga bam ra tew gai bei de lei.

³Tingwang ne Zaion je tum gai gu lei; pa ne heram putzînggaibeibe bâm ramme je tum gai gu lei, zai pe gu hênamchangbe heram ze Eden gum bam ra tew gai gu lei, pe gu tingkangram ze Tingwang gu kerie gum bam ra hang tew gai gu lei; pe dage helungsuiyibe benai misuiyibe ngaudau gu lei, misuiyibe sam paugaibe benai heleu kuâ zeu.

⁴“A kuâ ’ngking le lau, a gume gau, zai achu ningnui kun ’ndualie gai lau, a zatme gau; hingde kat ze a dagene zuapat ku lei, zai a gu peling-gesangtewbe ze hezatramme hangge kebabe chang gu lei.

⁵A gu ripatbe ze kelua-desang ze nawang lei, a gu tewka’nringbe ze zuapat ti de lei, zai a ba kena ne heramzatme je samram gu lei; heduiluaka’ngguabe bâm ramme zene achu kuâ bam gu lei, zai a peireige penui heguîkua lei.

⁶Tinggîm piehang ngaube ramme ge ningnui mik rak’ngngang gai lau, zai ’ngkang ’mbe kedei ge pie gai lau; tinggîm piehang ngaube ramme ze â, hemika gum ze ga gai du de lei, kedei ze paî gum bâ’nsia gai gu lei, zai chige kelungme leine ze mairiêne ramme gum ze chai gai gu lei; kane a gu tewka’nringbe â betingbeta bam bam gu lei, zai a gu ripatkaibe ze â mâtew-tewsedu betun ra mak lei.

⁷“A kuâ seu le lau, ningnui mâ-besie peling chime, a gu hingde helung ge tei ze bamme gau; ziemmename ne teihenuitewbe je hing se lau, zai penui ne sa’nsia ze bambe ramme ge helungchei gai se lau.

⁸Penui je â paî bekau ne teu gum ze teu kam ’ndu lei, zai mâ-gêulang tingseibe ne teu gum penui je teu kam ’ndu lei; kane a gu ripatkaibe â betingbeta bam bam gu lei, zai a gu tewka’nringbe â, mâtew-tewsedu betun ra mak lei,” kacheu lei.

⁹’Nrakchu lau, ’nrakchu lau, heran tew’nchi le lau, Hei Tingwang ba gau; ’nrakchu lau, ’ndâting ge gum, tingtie rehei tattibe ting ge gum zeu. Rahab je bidesuiruigaibe, henêudibe (dragon) je reigaibe ze nang mak mei?

¹⁰Chi hedui gechukbe, sungkling je tewchangkugaibe ripatlume kapat ra sungkling sîng ramme ge ’mpuîki tewgaibe nang ne mak mei?

¹¹Zai Tingwang gu kebang-’nripatlume ramme helatwang dai ze Zaion ge heleutew ze zuawang gu lei; penui peî ramme ge betunmakbe hesuiyibe bam gu de lei; helungsuiyibe benai hesuiyibe penui je dau gu lei, zai mi duânggabe benai kehuaibe tat tu lei.

¹²Tingwang ne acheu ze rang lei, “I ze ningchu ning ran tew’nchigaipeu de lei. Chaiduibe kau ziemmena je nang ne ’ndaitew hing bam ra lau, hereubuâ suadu siabe kau jeu?

¹³Tingwang ningchu ’ndamgaipeu, tinggîm piehang ngaube ramme je liâmpatkaipeu kedei gu pedimpung ’ngkinggaipeu je nang ’ngngaî ’ndi de mei? ’ndaitew ze nang ne ningchu kagetedme lumpum ge, ningchu tew’nsia ra tewme lumpum ge hing ze bam bam ra lau? Zai kategabe tâ tewme lumpum ze ’ndaige la lau?

¹⁴Keikeugai’ndibe kau je â kelua ze ’mpat kai bu lei; pa chai ra mak zai Hûm ge tatkeu gai ra mak lei, zai pa teurabe hetak hang du hereu ra mak lei.

¹⁵I ne Tingwang ning Rapeu de lei, sungkling je peize ’mbeu ra hang sungkling tewgesuâkkaipeu zeu— baudime gu Tingwang ze pe ji de lei.

¹⁶Zai I ne a sam ramme ning mui ge kai bei de lei, zai ningchu a ba kezui ge tei’mbai gai bei de lei, tinggîm piehang ngaube ramme liâmpat kai lu, kedei gu pedimpung ramme ’ngking gai lu Zaion je, ‘Nang â a gu ziemmename de lei,’ ze acheu gai zeu.

¹⁷Ning runne ’nrakhakchu lau, ning runne ’nrakhakchu lau, Hei Jerusalem gau, nang Tingwang ba gene pe lumpumbe piak sakkai’ndipeu, tatdaulakbe piak ze tatdau lak ra puasakkai’ndipeu gau.

¹⁸Pa ne lungkeume pe name ruage pechu nguatatkairame mî de ga lei; pe name pa ne ’mpâmchugaime ruage pechu pe ba teigaihâ ra mî de ga lei.

¹⁹Ai mâ-zat kena ze ning peireige keu gai de lei— châu ne ningchu nguadesui gai ra lau?— gechim’nsiagaibe benai tewka’nsiabe, herakûm benai hiazutkie zeu; châu ne ningchu tum gai ra lau?

²⁰Ning name penui ran-ga ze kâukeu gai lei, chiâk’mpia ge hetipui migaidibe gum ze ’mpuî’ntai ramme ge penui jei lei; penui dage â Tingwang lumpum benai Hera ne ka’ngngiambe sam ramme ne pui ze bam lei.

²¹Chidaze aize ’ngking le lau, nang tewhereugaibeibe kau, wain gene mak ze kane meneu ze bambe kau gau:

²²Tingwang, ning Rapeu Tingwang, pe gu ziemmename hangge ’mpaupatkaipeu, Hera ne aigum ze rang lei: “Pie le lau, I ne ning ba gene tatdaulakbe piak ze tei ’nde lei; a râtabe piak ze nang sak ta ra de lei;

²³zai I ne chize ningchu tewsâme ba ge kai gu lei, ningchu, ‘Keikeu lie gai lau, dezai ning peirei gene anui tatpela ra hangge zeu,’ kacheume dage zeu; zai nang ne ning chingtua ze kedei gum, zai keloaning gum ze, chigene tatpela ra tew gai bei de lei,” ze a chêu zeu.