Read Zeme Naga ISAIA 52 Bible Online

ISAIA 52 - Zeme Naga bible

ISAIA 52

¹’Nrakchu lau, ’nrakchu lau, ning ran tew’nchi le lau, Hei Zaion gau; ning puâ yibe ramme kai le lau Hei Jerusalem, namdi ka’nchibe gau; rumgetenmakbe benai kahebâbe ze ning dage gut ta du daseu.

²Ning runne kedeiniamoîne gechungtua ne lau, zuachu le lau, Hei kebangchangdibe Jerusalem gau; ning guang gene kebangria luak ne lau, Hei Zaion na heleu’mpui kebangchangdipui gau.

³Tingwang ne aigum ze rang lei: “’Ntakûne ningnui je â zua ’ndi de lei, zai rangkâng ’nnang mak ze ningnui je ’nripat kai bu lei.

⁴Tingwang ne aigum ze rang lei: A gu ziemmename keraîbe ting ge Ijip ge lung ra chige wangkeu di de lei, zai penui je Assiriame ne ’ntakûne getat ze bam de lei.

⁵Chunage chidaze ’ntakûne a gume je nguatattibe ngau lu ze aige a dage ’ndaikau la lau? Penui gu samramme penui laîpat ze heu lei, ze Tingwang ne kacheu de lei, zai nai’nsangne a ji â sa’nsia gai ze bam bam lei.

⁶Chipauziegene a gume ne a ji chî gu lei; chipauziegene chipau mai ge chi sam sapeu ze I de lei be penui chî gu lei; aige I la lei,” ze acheu zeu.

⁷Kedeiloa ramme peireige misuiyibe sam pungwangpeu pî ze peluiyi-desang lei, desieyibe lungkatemibe sam paugaipeu, misuiyibe sam pungwangpeu, tewka’nringbe sam paugaipeu, Zaion je, “Ning Rapeu heguang ze samram la lei,” kacheupeu zeu.

⁸Hai ning gu hekêtkaime ramme ne penui kuâ’nrungpat ze penui suiyi ze heleutew la kam lei; Tingwang Zaion ge wangdairabe hangge pierim la de lei.

⁹Heleutewpat kam gai du lau, ningnui Jerusalem gu tew’nsiagai’ndibe bâm ramme gau; Tingwang ne pe gume je tum gai bei de lei, pa ne Jerusalem je ripat kai bei de lei.

¹⁰Tingwang ne heramzatme masuage pe ba ka’nchibe ba hela teipatlia gai bei de lei; zai kedeirei pemik leine ne anui Rapeu gu tewka’nringbe ngau kam gu lei.

¹¹Tat te zu lau, tat te zu lau, chigene tatpat te zu lau, mâ-kahebâbe zat deîtau gai se lau; pe gu pezuilung gene tatpat chu lau, ningnui runne ningnui je tew’nchi le lau, ningnui Tingwang gu heli kerua ramme teime gau.

¹²Keluakkelet â ningnui tatpat ra mak lei, zai ningnui gichiserie ze â tat ra mak lei, zai Israelme Rapeu ne ningnui hangge reîkuapeu chang gu lei.

¹³Pie le lau, a guâ ka’ngguapeu ’nggim ze bam gu lei, pechu â suang’ndi gai ze teichu gai bu lei, zai hu-desang ze bam gu lei.

¹⁴Misonggame ne pechu ningdaulaklu-lu bam gu lei — pe ju â ziemmena luî hang ngau gai ta di, sia kam di de lei, zai pe pum luîtak ze ziemmena hang ngau gai ta di de lei —

¹⁵chigum ze pa ne heramzatme je ngau lu ningdaulakluisui bam ra tew gai gu lei; pe ziegene heguangme ramme penui muiki gekaprim bam gu lei; tingtie ge penui je saliamakbe penui ne ngau gu, zai penui seumakbe ze penui chî’mmi gu daseu.