Read Zeme Naga ISAIA 53 Bible Online

ISAIA 53 - Zeme Naga bible

ISAIA 53

¹Anui ne seube ze châu ne ’nnumka’mmi lau? Zai chaume dage Tingwang ba ngau ra teilia gai bei lau?

²Mâ-kiakpoine gum ze pa pe suagene chîngchu de lei, zai kedei changkube ge pe ma ret kai lu zeu; pechu anui ne pie ra hangge pe dage pe luî tak hang du ga zai ngauyirabe zat hang du ga lei, zai anui ne pechu ’nchâ ra hangge pe dage ngauyibe du ga lei.

³Pechu â ziemmename ne ngau’nna ze tuâpat kai bei de lei; ziemmena pe suisiapeu, zai mi duânggabe tak chika’mmipeu zeu; ziemmename ne piegailakpeu je gum ze pechu â, ngau’nna gai bei de lei, zai anui ne pechu â mâ-hang riam gai mak lei.

⁴Gesang de lei, pa ne anui gu mi duânggabe kahereube put benai anui suisiabe put ze pung bei de lei; acheusede Hera ne lak ze tewhereugaibe hang anui â, pechu ’nningtâu gai di lei.

⁵Kane anui gu hedieka’ngkabe hemui ziegene pechu â tewhejam gai bei de lei, anui gu hemui-helut ramme ziegene pechu â tewhitruai gai bei de lei; pe peireige tewhereu-desanggaibe zene anui hangge katemibe tew gai bei de lei, zai pechu lakkegitkaibe gene anui je tew’mmi gai bei de lei.

⁶Anui ’nteumena ne meli tatlietattibe gum de lei; anui ’nteumena ne mi ’mpuî-puî ’mbe mi chuirit-rittew ze tat kam di lei; zai Tingwang ne anui gu hemui-helut bambe leine ze pe peireige kai kam gai ’ndi de lei.

⁷Pechu â tewgeted kai bei de lei, zai pechu â tewhereu-desang gai bei de lei, acheusede pa ne pe mui ’ngkakpat kai mak tai de lei; meli kat je bichat kai ra nguatattibe kau gum, zai meli kat ne pe gêuchiapme suage pe kuaneupatmakbe kau gum ze pa ne pe mui ’ngkakpat kai mak tai de lei.

⁸Tewkagetadbe benai samramgaibe gene pechu â, nguatat ti de lei; pe gu rehei hanggene, (kedeirei) keringme ram gene pechu tew’nggagai’ndibe hang ’nninggaipeu je a zatme gu hedieka’ngkabe hemui ziegene lak kai bei mei?

⁹Zai pe dage katîmphibe tatew, zai pe mui ge keduai sam sagaibe ga ze penui ne pe raw ze helungriaksiame kegîbe kau dage tewherua gai bei, zai pa kechaibe ge lungyipeu dage nguabai gai bei de lei.

¹⁰Acheusede pechu tew-hitruaigairabe ze Tingwang ne pa ’nning di de lei, pa ne pechu pe duângga ze bam ra kai bei de lei; pe runne pechu hemui hangge herâtew gai dezai pe haîhikme je pa ngau gu lei, pa ne pe ting ze tew’ntie gai gu lei; pe ba ge Tingwang ’nning ze ’nggim ze bam gu lei;

¹¹pe gu keringbe hereuteniangtianggaibe rachî pa ne ngau lu pe lungwângchang ze bam gu lei; pe gu mâ-gechîbe gene peling gene tâka’ngguapeu ne misonggame je tew’nzei gai gu lei, zai pa ne penui gu hemui-helut ramme ze pung gu lei.

¹²Chipauziegene I ne pechu rezieteime kedime dage pengêudibe dam ze ’nzi gai gu lei. Zai pa ne peranchime dage hereichâ ’nzi gu lei; pa ne pe gu keringbe ze chairabe hangge ruîpat kai bei, zai pechu â mâ-tâ-kesiabe tew ze hedeka’ngkame dage riam’mpam gai bei daseu; acheusedu misonggame gu hemui pa ne pung de lei, zai tâ-kesiabe tew ze hedeka’ngkame hangge desieyibe tewhelak kai bei de lei.