Read Zeme Naga ISAIA 54 Bible Online

ISAIA 54 - Zeme Naga bible

ISAIA 54

¹“Heleutew lau, Hei Nakampui hena lungmakpui gau; leutewpat ze ’nrung’nchi gai lau, nang henalung ra ’nra’nsuagaimakpui gau! ’Mpuimi pe napeu bampui name sua â, pe napeu gabepui nakampui name ne pe name kie’nteu ze bam gu lei, ze Tingwang ne kacheu de lei.

²Ning gu hetiampaîki bâm ze kengeî’ndipat kai lau, nang kebambe bâm gu paî ramme ze gîngpat kai lau; tei’ngngîngut kai se lau, ning gu peria ramme ze tew’ntie gai ze ning gu ’ntung ramme gia’ntip kai lau.

³Heku ’mbia hezat’mbia maîlang liâm’ndipat kai lau, zai ning chaname ramme ne heramzatme je ’nggum gu lei, zai sâugai’ndibe namdi ramme ge penui ne lung gu lei.

⁴“Hing se lau, nang ’ngngam ze bam ra mak lei; helung keheu ze bam se lau, ningchu â tew’ngngam gai ra mak lei; ning hangge hena’ngka gu ka’ngngambe ze nang ’ngngaî ’ndu lei, zai nang ne kemîpui chang ze bambeibe peireige ki’nsia ze bambe nang ne chî bam ta du lei.

⁵Ningchu ka’ndampeu ze ning napeu de lei, baudime gu Tingwang ze pe ji de lei; zai Israel gu Ka’nchibe Hangkat ze ningchu Ripatpeu de lei, pechu â kedeirei leine Rapeu ze ku lei.

⁶Henâu tapatkaibeipui pe lung sia-desangbampui je gum ze Tingwang ne ningchu kû gai bei de lei, chi pa (’mpeumi) ne pa hena’ngka ting ge pe nâu je tapatkaibeipui zeu, ze ning Rapeu ne kacheu de lei.

⁷Beting keduîne kak hangge I ne ningchu sâu gai lei, kane ka’nggiabe lungted ne I ne ningchu gekumwang gai lei.

⁸I a lumpum perîsibe ting kakge ning dagene I a ju ’mbai di de lei, kane betunmakbe kehungbe gene ning peireige ngau’nggia di de lei, ze Tingwang ningchu Ripatpeu ne kacheu de lei.

⁹“Aize â a hangge Noabe ting gum de lei: Noabe gu hedui zene kedeirei naîwang ta de lei ze I deseu gai gum ze ning peireige a râta gai ra mak lei, zai I ne ningchu ’ngngiam ra mak lei, ze I ne deseu gai de lei.

¹⁰Kedeiloa ramme tat le duî lei, zai peloa ramme tei’mbia le dui lei, kane a gu hungka’ntipbe ze â ning dagene tat ra mak lei, zai a gu desieyibe gu samhatkaibe ze tei’mbia ra mak lei ze Tingwang ningchu ngauka’nggiapeu ne kacheu de lei.

¹¹“Hei tewhereugaibeibe kau, tingkaichibe ge guikechuî ze bambe kau, zai helungsui tew’ntagaimakbe kau gau, pie le lau, I ne ning gu tingchu ramme ze peheu ngauyibe ’nnuklik kai gu lei, zai ning gu pedimpung ramme je shapphirchu ramme ne kuachu gai gu lei.

¹²Ning gu hekiroî ramme ze tingchu kedibe kegiebe zat ne I ne tew gai gu lei, ning gu keriekemui ramme ze Tingchu kegiebe ramme ne tew gai gu lei, zai ning gu ’mbie ramme leine ze pemîhungbe tingchu ramme ne tew gai gu lei.

¹³Zai ning name leine je Tingwang ne mâ-nguagetei ze bam gu lei, zai ning name ramme mâ-leine ge ’nggim-desang ze bam gu lei.

¹⁴Mâ-peling gene ningchu tew’ntip kai bu lei; tewsabe kategabe gene nang â deutau ze bam du lau, nang â hing ra mak daseu; zai mi kehingbe gene nang â deutau ze bam du lei, chize ning tai wang’nna ra mak daseu.

¹⁵Mige ningchu tewkeleu lêuzai â, chize a dagene mak lei; mi-mige ningchu tewkakeleube kau â, ning ziegene pa kâu gu lei.

¹⁶Pie le lau, hemi-mechingkâng, hemiguipeu, hegeîkahekipeu, pa pe tâu hangge kerua hekipatkaipeu je I ne ’ndam gai lei. I ne mâ-tewka’nsiapeu je du mâ-tew’nsia ra ’ndam gai lei;

¹⁷ningchu ’nggi ra hereikerua chiampatkaibe ze bamtui ra mak lei, zai samrambe ge ning peireige sa’nsiagaibe leiria leine nang ne tew’ngkui gai gu lei. Aize Tingwang guâ ka’ngguame gu heurâ de lei, zai aize penui hangge a dagene peling mâ-tâtewgaibe de lei, ze Tingwang ne kacheu de lei.”