Read Zeme Naga ISAIA 55 Bible Online

ISAIA 55 - Zeme Naga bible

ISAIA 55

¹“Hai, kaherei-reime hedui ge wang lau; zai rangkâng-gabe kau ze wang lau, lui lu teu le lau! Wang lau, wain benai tungdui lui le lau, rangkâng benai pemî ’nnang mak zeu.

²Ningnui ne ’ndaitew ze teurabe hetak zatmakbe hangge ningnui gu rangkâng tuâ’ngga gai lau; zai helungwângchangmakbe hangge tâtewhereu gai lau? A kuâ ’ngkingzun le lau, zai ’ndaize yi mei be ze teu le lau, zai teuyi-yibe ze teu lau.

³Ningnui kun ’ndualie gai lau, zai a tailam wang lau; seu le lau, ningnui ring le ra hangge zeu; zai I ne ningnui dage betundaimakbe samhatbe, a gu hungka’ntipbe, kehungbe gechukbe tâ tew gai gu lei, Dabidbe ziegeneu.

⁴Pie le lau, hezat ramme gu sakki hang I ne pechu tew gai lei, hezat ramme hangge kanguapeu, zai besuitewpeu hangge zeu.

⁵Pie le lau, pa ne ning ngeutew’ndigaibeibe ziegene nang chimakme heramzatme ramme je nang kû gu lei, zai nang ne chimakme heramzatme ne ning dage pakzuawang gu lei, Tingwang ning Rapeu, zai Israel gu Ka’nchibe Hangkat ziegeneu.

⁶“Tingwang je peu lau, pechu peudauduibe luage zeu, pechu kû lau, pa nabe luage zeu;

⁷helungriaksiabe kau ne peize pe gu ’mpuî ze sâu ne lau, zai pelingtewmakbe kau ziemmena ne peize pe lungka’nningbe tak ze sâu ne lau; peize pechu Tingwang dage helatwang lau, dezai peize pa ne pe peireige ’nggia gai be ra hangge zeu, zai anui Rapeu dage zeu, zai pa ne lun kam gai gu daseu.

⁸A lung ka’nningbe tak ramme ze â, ningnui lung ka’nningbe tak ramme mak lei, zai ningnui gu ’mpuî ramme ze â a gu ’mpuî ramme mak lei, ze Tingwang ne kacheu de lei.

⁹Tinggîm piehang ngaube ramme ze â, kedei suadu hu ze bambe gum ze a ’mpuî ramme ze â, ningnui gu ’mpuî ramme suadu hu’nteu lei, zai a gu ka’nningbe tak ramme ze â, ningnui ka’nningbe tak ramme suadu hu ’nteu lei.

¹⁰“Tingkehu ’mbene ting benai kebun ruikeu gum, zai chi gene helat-hang dai mak, kane kedei tewchim gai ze, mâ-mâ-ngûmne tumpat ra tew gai gum mâ-helei lingpeu je mâ-helei pei gai ze mâ-teupeu je hetak pei gai gum ze

¹¹a mui gene a sam patbe ze du chigum gu lei; chize a dage perua mâ de ga ze helatwang ra mak lei, kane I ne hekagaibe ze tewpui gai gu lei, zai I langgaibe geze chize ’nggim ze bam gu lei.

¹²“Helungsuika’ntabe gene ningnui zuapat ku lei, zai lunghegeitenai ze nguapat kai gu lei; ningnui suage kedeiloa ramme benai peloa ramme bambe zene heleutewpat kai gu lei, zai heram ge chingbang ramme leine ne penui ba gekeu gu lei.

¹³Hetubang kelei ge chingkeleu bang ne chu gu lei; hetupat kelei ge murtel ne chu gu lei; zai chize Tingwang dage chibamrabe hang chang gu lei, tew’nsiagaimakrabe betun mak ze dak-ka’nchetbe hangge zeu.”