Read Zeme Naga ISAIA 56 Bible Online

ISAIA 56 - Zeme Naga bible

ISAIA 56

¹Tingwang ne aigum ze rang lei: “Mâ-gesangtewbe tei’mmi lau, zai besie-peling tâ tew lau, a gu tewka’nringbe wangkelua gu lei, zai a gu ’nripatkaibe ngau ra teilia gai gu de lei.

²Aipau tâ tewbe kau, zai ziemmena na aize teika’ntipbe kau, ’ntakbambe mai rei’mmi ze chize tewhebâ-makbe kau, zai mâ-kesiabe tewrabe gene pe ba reîchibe kau ze yi de lei,” ze acheu zeu.

³Hesangkedeu’mpeu Tingwang dage heruagaidipeu ne peize acheu sa se lau, “Tingwang ne pe gume dagene achu teirimna gai sing gu lei,” ze acheu zeu; zai kahetiâpeu ne peize acheu sa se lau, “Pie le lau, I â hingbang chaidibe bang de lei,” ze acheu zeu.

⁴Tingwang ne aigum ze rang lei: “Kahetiâme a gu ’ntakbambe mai ramme reika’mmime, I ka’nchâbe zat ramme kelâng ze a gu samhatkaibe teika’ntipme je,

⁵napoine ’mpeumi ramme benai ’mpuimi ramme sua yi-ka’nteube tingchusum benai heji ze a ki ge benai a gu kerie lung gene I ne pei gai gu lei; I ne penui je betunmakbe heji tew’nggamakrabe ze pei gai gu lei.

⁶“Zai hesangkedeume Tingwang guâ ’nggua ra, Tingwang ji je hung ra, zai pe guâ ka’ngguame chang ra penui runne pe dage heruagaime, ’ntakbambe mai reika’mmime leine, zai chize tewhebâ-makme, zai a gu samhatkaibe teika’ntipme leine—

⁷aime ramme ze I ne a gu kedeiloa ka’nchibe ge teiwang gai gu lei, zai a ki kakellumbeki ge penui lungsui tew’nta gai gu lei; penui gu rûkambe-râtewbe benai penui gu herâtewbe ramme ze a gu herâtewbe-kaira ge lu gai bu lei; a ki ze â ziemmena hezat ramme leine hangge kakellumbeki acheu ze kû gu daseu.

⁸Tingwang Hera, Israelme pezatcheime tuâpatme je kagekumpeu ne aigum ze rang lei, Kenû ge gekumwanggai’ndime je sâu ze I ne pe dage miramme je gekumwang gai gu rei lei,” ze a chêu zeu.

⁹Heramloa gu ningnui mârekaune leine gau, gesuakteu kam ne ra wang lau— ’nrêu ge ningnui mârekaune leine gau.

¹⁰Pe gu hekêtkaime ramme â hemikchit lei, penui â mâ de mâ-gechîbe ga lei; penui ’nteumena ne bekuâ patmakbe hetei zat ramme kam lei, penui tângchi lak lei; mang-mang ze bam, jeikela ze bam, ’ngnguirun ze bam lei.

¹¹Hetei ramme â penui ’njeisia lei; teu-teu sedu ’nggeu mak lei. Melireîme ramme ze du mâ-gechîbe ga lei; penui ’mpuî-puî ’mbe tatkelik kai kam di lei, ’nteumena ne pe hang pe hang gie ra peu di lei.

¹²“Wang lau,” penui kacheu de lei, “Anui wain lu kei lei, anui sakmeneuhiam gai kei lei; zai ’nchuamai du nemai gum gu lei, tew-desang gai gu lei,” ze acheu zeu.