Read Zeme Naga ISAIA 57 Bible Online

ISAIA 57 - Zeme Naga bible

ISAIA 57

¹Mâ-pelingtewpeu ga gai de lei, zai chize mî du ’nninghereu gai mak lei; pe râsie ge ’nningkahekuîbe kau je lutat te lei, mî de chimakbe luage nêu. Miduângga pausiabe gene mâ-pelingtewpeu je â lutat ti de lei,

²desieyibe lungkatemibe bâm ge pa gut ti de lei’ ka’nzeibe ge tatme â, penui jeî ge temichai ze sauka’ntak lei.

³Kane ningnui, heduaîtewchime name, kahemabe kau benai hepumzuateube kau haîhikme, aige wang’nna lau.

⁴Châu dage ningnui nguaka’nta lau? Châu peireige ningnui muiki ’ngngranglia gai, zai ningnui lei getuapatlia gai lau? Ningnui ze hedieka’ngkabe hemuitewme, kechoame haîhikme mak mei,

⁵hingbang ’ndiakribe bang kangge, ’mpubangzeu ge hemeipumsie ka’nchiebe ge têusua ze mâ-rûgaime, hekâu ramme kangge peningkâm ge ningnui name je bichatkaime zeu?

⁶Peningkâm ge tingchukâng ’ndiaupiaube ramme ruage ning gu hedam â la de lei; chiramme, chiramme ze nang ne kelânglube kau de lei; chiramme hangge nang ne kesakbe-râtewbe gu ze ruîpat kai bei de lei, nang ne mâ-himlei-râtewbe ze teiwang gai bei de lei. Airamme hangge I a lung hegeikeu gai gu semei?

⁷Kedeiloa hube zai hutaube peireige nang ne ning jeî kâm gai bei de lei, zai chigene herâtewbe peipat kai ra nang hang de lei.

⁸’Ngkam benai ’ngkamchiaseu ge ning gu dak-ka’nchetbe nang ne kai bei de lei; achu sâu ze nang ne ning jeî kegâu lu, chilia ’nrei ’mbe nang hang di tai de lei, nang ne chize peza maîlang tew gai bei de lei; zai nang ne ning runne ning hangge penui dage sam ’mpauhelak ze bam de lei, nang ne penui jei je ’nrai gai de lei, pumlâng bambe nang ne ngau lu de lei.

⁹Nang ne Molekbe dage taudui tei lu ’ngkiâmie de lei, zai taudui perîmyibe tewpungpat kai de lei; nang ne ning gu hepâupaume je kedeu ’mbe lang gai bei de lei, zai Kechaiberam ge ’nsangdu langkeu gai bei de lei.

¹⁰’Mpuîki deube ziegene nang lei-desang di de lei, kane nang ne, “’Nta’mpia de lei,” ze acheu gai mak lei; ning ranchi hangge nang ne keringbe karchibe ngaudau lu de lei, zai nang ning ran-gakeu mak lei.

¹¹Châu je nang ’ngngim ze, zai hing ze karasa sa gai lau, zai achu chibam mak lau, achu mâ-hang du ’nning gai mak lau? Beting misongga I ne a kuâneu mak ze bam bei semei, nang ne achu hing mak bam ra hangge zeu?

¹²Ning gu kapelingbe benai ning tatew ramme I ne ranglia gu lei, kane penui ne ningchu ’ngngaî ra mak lei.

¹³Nang ne kûka’nrungbe luage, ning gu teiwang’nduigaibe heraluîtewbe ramme zene peize ningchu lupat kai be lau! Tingkai ne penui je guitat tu lei, hechuilube zene penui je teitat tu lei. Kane a dagene pe gu ’nseubâm chang ze bambe kau â heram ze ’nram gu lei, zai a gu kedeiloa ka’nchibe nguaheu gu lei.

¹⁴Zai acheu ze sa gai bu lei, “Tewchu gai lau, tewchu gai lau, ’mpuîki teleukua gai lau, a gume gu ’mpuîki gene dangnambe leine lutua gai lau,” ze a chêu zeu.

¹⁵Hu ze, zai hutau ze bambepeu, betundaimak ze bam-bambepeu, pe ji Ka’nchibe kacheupeu ne aigum ze rang lei: “I ne kehube ge zai ka’nchibe bâm ge bam lei, zai mige mâ-tewmau ra hingbepeu, zai pe lung kecheiluîtewpeu dage du bam lei, kecheiluilung pungme lungsui tew’nrak kai ra, zai mâ-tewmau gai ra hingbepeu dage tew’nrak kai ra hangge zeu.

¹⁶I ne betingbeta ’nggi bam ra mak lei; zai a râta ze du bam ra mak lei; a dagene herui zuapat daseu, zai I ne keringbe chuilu tew gai bei de lei.

¹⁷Pe gu kadekumbe ka’nchiebe gu hemui-helut ziegene I ne pechu a râta de lei, I ne pechu lak kai bei de lei, I a ju ’mbai di de lei, zai a râta di de lei; kane pe lung gene keneibe ’mpuî ga ze pa â, ’ngngîntat ze bam lei.

¹⁸I ne pe gu ’mpuîki ramme ze ngau lu de lei, kane I ne pechu teleu’mmi gai gu lei; I ne pechu nguatat ze katemibe zene peiruî gai gu lei,

¹⁹getoabe Israel ge puîhapme mui ramme ge bam ra tew gai zeu. Kedeube ge bamme benai kenahia ge bamme dage desieyibe lungkatemibe, desieyibe lungkatemibe ze Tingwang ne kacheu de lei. Zai I ne penui je tew’mmi gai gu lei.

²⁰Kane helungriaksiame â, hedui ka’ngngaibe pecheuchibe gum lei; chize â sauchi lak dadegeu, zai chi hedui ka’ngngaibe gene tingniâ benai mâ-kahebâbe teichu gai lei.

²¹Helungriaksiame hangge desieyibe lungkatemibe ga de lei, ze a Rapeu ne kacheu de lei,” ze acheu zeu.