Read Zeme Naga ISAIA 58 Bible Online

ISAIA 58 - Zeme Naga bible

ISAIA 58

¹“’Nrung’nchi gai lau, gesut se lau, hegeîluîkie gum ze ning kuâ pat’nchi gai lau; a gu ziemmename dage penui gu hedieka’ngkabe hemui ramme ze rangba gai lau, Jakob ki dage penui gu hemui rangba gai lau.

²Acheusede penui achu nai’nsangne peu bam de lei, zai a gu ’mpuî ramme penui chînei-kadesang de lei, pelingtewbe heramzatme luîrun zeu, zai penui Rapeu gu hingde tewgaibe ramme saukeu mak lei; peling ne samrambe penui a dage kie de lei, penui Hera dage wang’nna ze bam nei de lei.

³‘’Ndaitew ra du anui ne deseu ka’ngkîm lau, nang ne chize ngaugailak zeu? ’Ndaitew ra du anui lung renuakeu lau, nang ne chize chigaihâ mak zeu?’ ze penui kacheu de lei. Pie le lau, ningnui ne ningnui gu teseureibe mai ge ningnui suî’nning tew ra runne peu ze bam lei, zai ningnui gu tâtewme je geted ze bam lei.

⁴Pie le lau, ningnui mâ-tu ra, zai hegei ra, zai miramme je zûm ra runne ran-ran ze bam lei. Nemai ge ningnui gu teseureibe gumbe zene ningnui kuâ kehu ’mbe seuchang ra hangge tewgaichi lak lei.

⁵Ziemmena ne pe runne pechu tew’ncheikeugairabe mai hangge aigumbe teseureibe ze I ne kelâng gai mei? Chize hekupum gum ze bekeî zâukeu ze ’nsukrung bam ra, zai miseigiriapaî kâm gai ze bekang ge timbun ’nruk ra kau mei? Ai je nang teseureibe hang kû gai ra mei, zai Tingwang ne ’nchâgaibe naimikpui hangge nang kû gai ra mei?

⁶“Aize I ne kelânggaibe teseureibe mak mei: helungriaksiame gu kebangria heipat kai ra, guangkâm keîbe ria heipat kai ra, kagetedbe lieme je ’mpat kai ra, zai kebang put leine tew’nsiagairabe zeu?

⁷Ka’njeime dage ning gu hetak nguaziteu mak ra kau mei, zai kelaksia kezitruame je ning ki ge nguawang gai mak ra kau mei; nang pumlâng bamme je ngau dezai, paî tapnam gai mak ra kau mei, zai ning pum riâ changbe kau dagene ning runne nang ’mbia mak ra kau mei?

⁸Chidezai ning gu kebabe ze hechua bapatbe gum bapat ku lei, zai ning jâm geteube buatenai kelua gu lei; Tingwang ngeudibe zene ning hangge reîkuapeu chang ze bam gu lei.

⁹Chidezai nang ne kû gai gu lei, dezai Tingwang ne kak ku lei; nang ne kû’nrung gai gu lei, dezai pa ne, Aige I la lei, ze acheu gu lei. “Ningnui ruage guangkâm bambe, hebakêrang kagechiaube ramme, zai mâ-sam kesia-siabe sabe ramme ze nang ne lutua gai dizai â,

¹⁰Nang ne (tak) ’njei ze bamme hangge ruîpat kai ze kagetedbe lieme lungwang tewchang gai dizai â, kemuîbe bâm ge ning gu kebabe zuachu gu lei, zai ning hangge kemuîbe bambe ze ’nrîmbeting ge kebabe gum chang gu lei.

¹¹Zai Tingwang ne ningchu nguatat bam gu lei, zai mâ-keyibe zat ramme ne ning suigut tewpui gai gu lei, zai ning ra ramme ran tew’nchi gai gu lei; zai nang ze hedui zuâ bambe merie gum chang gu lei, hedui changkeumakbe merie zeu.

¹²Zai ’ndâting gene ning gu mâ-mâ tew’nsia-’ndi-desanggaibe ramme ze teleuchu gai dai gu lei; rehei misongga tattibe gu pedimpung ramme nang ne teichu gai gu lei; ningchu â riputkaibeibe putbeki kagetakpeu, ziemmena lung ra hang keloaning ramme teleukadaipeu ze kû gu lei.

¹³“’Ntakbambe mai ge mâ-mâ ge tatpatrabe gene, a gu ka’nchibe mai ge nang tewnei-neibe tew ra tatrabe gene ning pî kegim, zai ’ntakbambe mai je Tingwang gu hesuika’ntabe benai ka’nchibe pengêudibe mai ze nang kû ze bam dizai â, nang aipau mai je hengêutew ze, nang ’mpuîrabe gene tat mak bam gai, makchai nang ne tewnei-neibe tew ra peu mak, makchai mâ-mêruang sam ramme sa mak bam dizai â,

¹⁴nang Tingwang gene ning suî’nta ze bam gu de lei, zai ningchu I ne kedeiloa’ntûm ramme ge chua ra tew gai gu lei; I ne ningnui peu Jakobbe heurâ zene ningchu kei’nggeu ze bam gu lei, Tingwang mui gene sa gai ’ndi daseu.”