Read Zeme Naga ISAIA 59 Bible Online

ISAIA 59 - Zeme Naga bible

ISAIA 59

¹Pe le lau, Tew’nringpatkaichi lak ra hangge Tingwang ba tew’ndui gai nan ze bam me lei, makchai seuchi lak ra hangge pe kun tew’mmie gai nan ze bam me lei;

²kane ningnui gu hemui-helut ramme zene ningnui benai Hera kakge tewchâmbe tew gai bei de lei, zai pa seu lak ra hangge ningnui kahemuibe ramme zene ningnui dagene pe ju sungnam ’ndi de lei.

³Ningnui ba ramme â hejai ne tewhebâ gai ’nde lei, zai ningnui bakêrang ramme ze hemui-helut zene tewhebâ gai ’nde lei; ningnui mui ramme zene karasa sa lei, ningnui leiria ramme zene helungriaksia ze damcham-cham gai lei.

⁴Mî de peling-gesang gene mâkiegut me lei, mî de katelingbe gene hingde ge tat me lei; ’nta kakebiengbe kuâ ramme ge penui ’nnumtew lei, penui karasa sa lei, hejaîsittewbe penui lung ge ’mpung lu, mâ-kesia-siabe zat hemui-helut tewpat lei.

⁵Penui mechinêu ramme bûm gûm’ngkak kai lei, penui timriakberâ râ gai lei; penui bûm teu-teume â chai lei, zai kat pânggaidibe gene mechinêu kat ’ngkakpat lei.

⁶Penui râ (timriakberâ gumbe) ze paî hang changchi lak lei; penui tewgaibe zene ziemmena bâ ra mak lei. Penui tatew ramme ze â, kesia-siabe tewbe zat hemui tâ tewbe ramme lei, zai katîmphibe tatew ramme ze penui ba ge bam lei.

⁷Penui pî ze mâ-kesiabe ge gitau gai lei, zai kesiajaîgame jai tewpat kai ra penui mâ-kahegua lei; penui lung ka’nningbe tak ramme ze â, kesia-siabe tatew zat hemui-helut tâ tewbe lungningtak ramme lei, penui ’mpuî ramme ge mâ-tewka’nggabe ramme benai tewka’nsiabe bam lei.

⁸Desieyibe lungkatemibe ’mpuî ze penui chî mak lei. Zai penui tatbe ’mpuî ramme ge mâ-gesangtewbe ga lei; penui ne penui gu ’mpuîhimdi ramme tewkelikrua gai lei, penui dage nguatatme mî de desieyibe lungkatemibe chî mak lei.

⁹Chipauziegene mâ-gesangtewbe ze â, anui dagene deu-gesang bam di de lei, zai mâ-besie-pelingtewbe ze anui je guachang mak te lei; anui ne kebabe hang piekua da, kane pie le lau, kemuîbe zeu, zai ba’nchichiakbe hangge anui piekua da, kane muîgitbe ge anui tat lei.

¹⁰Anui Hemikchitpeu gum ze tatchi lak ze anui ’mbie getamrua de lei, hemikgame gum ze tatchi lak ze anui getamrua lei; tîngna ge muîrambe luage gum ze anui mâ-ka’nrap lei; penui ranchiperîsime ruage anui â kechaime gum bam de lei.

¹¹Anui hegum ramme gum ze ’nra-ngi-ngi bam de lei, zai anui depeine ramme gum ze kekuk-keleulia bam de lei; mâ-gesangtewbe hangge anui piekua de lei, kane mâ de ga lei; tewka’nringbe hangge du da, kane chize anui dagene deu sang deu di lei.

¹²Ning masuage anui hedieka’ngkabe hemui ramme tewpung gai ’ndi de lei, zai anui kahemuibe zene anui je pung’nsia gai lei; anui hingdeka’ngkabe hemui ramme anui dage bam de lei, zai anui ne anui hemui-helut bambe chîbe ze:

¹³Tingwang peireige hede’ngka ze hemui tâ tew gai lei, zai ka’ngkim lei, zai anui Rapeu chai suibe gene helitat dai ze karasa sam ramme helung gene ’ndetpat ze chize sapat ze kagetedbe benai geikangbe hangge getud ze bambe ze de lei.

¹⁴Mâ-gesangtewbe ze â tuâ dai ’nde lei, zai besie-pelingtewbe ze deutau ze bam di de lei; hela keloaning ge samsang ze ’ngngaîkeu gai di de lei, zai mâ-keyibe â gutchi lak lei.

¹⁵Samsang peling ze ga di de lei, zai kesiabe gene ’mbiapattibe kau ze â, pe runne pechu tewchat ra tewgaibe riâ hang chang gai di de lei.

¹⁶Tingwang ne chize ngau lu pe suiyi mak te lei, chi mâ-gesangtewbe gadibe zeu. Pa ne ziemmena mî de gabe ngau di de lei, zai chige mî de mâ-keyibe hang tinggeu gai ra gadibe ze pa ’nningdaulak ti de lei; chidadege â pe ba sing gene pe hang duîwang gai de lei.

¹⁷Besie-pelingtewbe zene pa pe gakam gum ze kai lei, zai tewka’nringbe hegeîpeichûp ze pe peî ge rua gai lei; paî bâbe hangge pa ne hekûmruîbe paîni luak kai lei, pe lung-gechiksiak ze pe runne pechu mechuapui luaknam gai de lei.

¹⁸Penui tatew luigum ze pa ne penui hî pei dai gu lei, pechu ka’nggime je pe lumpum tewlia, pe teureime je tewruî dai zeu; heduiluaka’ngguabe bâm ramme je pa ne penui tatew luigum ze peiruî dai gu lei.

¹⁹Chigum ze tingrun ge bamme ne Tingwang ji je hing ze bam gu lei, zai tingnaimikpat ’mbia ge bamme ne pe gu pengêudibe deze hing ze bam gu lei; pa â Tingwang gu tingkai ne guibe, hedui peranchibe gum ze wang gu lei.

²⁰“Zai Ripatpeu gum ze pa Zaion ge wang gu lei, Jakob ge hedieka’ngkabe hemui gene ’nreiwangme dage zeu, ze Tingwang ne kacheu de lei.

²¹“Zai a hangge ze â, aize a gu penui dage samhatkaibe de lei, ze Tingwang ne kacheu de lei, a Herui ning dage bambe, zai a sam ramme I ning mui ge kaibeibe ze ning mui gene zuatat ra mak lei, makchai ning name mui gene makchai ning chaname mui gene du zuatat ra mak lei, chuna gene chu ze betun mak tâneu,” ze Tingwang ne kacheu de lei.