Read Zeme Naga ISAIA 6 Bible Online

ISAIA 6 - Zeme Naga bible

ISAIA 6

¹Heguang Uzziabe chaidibe tingkum ge heguang-bamrak ge Tingwang ’ntau ze hube ge teichu’ngngutau gai ze bambe I ngau de lei; zai pe paîri ramme ne kellumki râpuigit bam de lei.

²Serapme ne pe peirei ’mbe sapsung de lei; chi Serap hangkat dage pekan seruk-ruk bam de lei: pekan kena ne pe ju tapchim, zai pekan kena ne pe pî tapchim, zai pekan kena ne liamrua bam de lei.

³Zai kat-kat je kelau ze, “Baudime gu Tingwang â, Ka’nchibe, Ka’nchibe, Ka’nchibe ze de lei; Pa pengêudibe ne kedeirei â pui de lei,” ze kacheu de lei.

⁴Chi acheu ze kûsabe kuâ zene hekipung pelane gechuî’ngngailia di de lei, zai chipau ki ze hemika ne puigit ti de lei.

⁵Zai acheu sa ze, “I â ziemmena pe duânggabe kau de lei! I â ga gai gu daseu; I â a mui kahebâbe kau, zai ziemmena penui mui kahebâbe kau ramme ruage I lung ze bambe kau daseu; chi Heguang baudime gu Tingwang je a mik ne ngau gai ’ndi daseu!” ze kacheu de lei.

⁶Dadege Serapme ruage hangkat ne pa ne herâtewbe-kaira gene hemisip ne mechingkâng ’nsippatlube mechingkâng ze pe ba ge tei lu a dage liamwang de lei.

⁷Zai pa ne a mui ge deitâu gai lu, acheu sa ze, “Pie le lau, aize ne ning mui deitâu gai ’nde lei, ning mâu ze â lutua ’nde lei, zai ning gu hemui lun gai ’nde lei,” kacheu de lei.

⁸Dadege, Tingwang kuâ, “Châu je I lang gai ra lau, zai anui hangge châu ne tat ra lau?” ze acheu ze sabe I seu de lei. Chidadege I ne kak ze, “Aige I la lei, achu lang gai lau,” ze kacheu de lei.

⁹Zai pa ne sa ze, “Tat chu lau, zai aime ziemmename je acheu ze rang gai lau: ‘Seubam da, kane ’nningchi mak; ngaubam da, kane parimba chî mak lei,’ acheu zeu.

¹⁰Aime lung ze tew’ndamdei gai be lau, zai penui kun ramme tewpang gai be lau, zai penui mik ramme tewchit kai be lau; chi acheu maktizai penui mik ramme ne penui ngau gu, penui kun ramme ne seu gu, zai penui lung ramme ne ’nningchi gu, zai heliwang ze tew’mmi gai be ra chang gu daseu,” ze kacheu de lei.

¹¹Dadege I ne, “Tingwang gau, ’ndaitie ra lau?” ze kacheu de lei. Zai pa ne kak ze, “Namdi ramme tew’nsia gai, zai chige lungrabe kau ga de mak tâne, zai heki ramme ge ziemmena ga de mak tâne, zai heram ze gua’mpiezîng gai mak tâne,

¹²zai Tingwang ne ziemmename je kedeu ’mbe tei’mbia gai de mak tâne, zai heram lungge sâudiakkaibeibe bâm ramme ge misongga tewpuigit kai mak ra de lei.

¹³Zai tûm kereu ge tûm kat ’nsak ze bam lêuzaidu, chize du rû’ngga dai ’ndu lei, ’mpubang kuîkau’ndibe chângge pemui sapbambe je gum zeu,” ze kacheu de lei. Chi ka’nchibe helei ze â penui ze de lei.