Read Zeme Naga ISAIA 61 Bible Online

ISAIA 61 - Zeme Naga bible

ISAIA 61

¹Tingwang Hera gu Herui a peireige la lei, tewhereugaibeime dage hesuiyibe sam keyibe pungwang gai ra Tingwang ne achu Hera-taudui ’nnukkaibeibe ziegeneu; helungpângdibe ramme piherua gai ra, kebang hang tîm’ndime dage lungzeunetewbe rasam pau gai ra, zai banggai’ndime dage kebangki latpatkaibe rasam pau gai ra;

²Tingwang gu ka’nggiabe tingkum rasam pau gai ra, zai anui Rapeu ne hekûmlube tingnaimikpui rasam pau gai ra; pe duângga kehapme je tum gai ra;

³Zaion ge desui ze bamme je penui kuâ ’ngking gai ra— penui je timbun kelei ge mâpâ teuria pei gai ra, kadesuibe kelei ge hesuiyibe taudui pei gai ra, mi duângga-desanggaidibe kelei ge hengêutewbe mechuapui peigairabe rasam pau gai ra; chidezai pechu hengêutew’ndi gai ra hangge penui je Tingwang ne taugaibe, kapelingbe ’mpubang acheu ze kûchi le ra hangge zeu.

⁴Penui ne ’ndâting gu mâ-tewka’nsiabe ramme teleuchu gai gu lei, tingtie ge tew’nggagaibe ramme penui ne teichu gai gu lei; namdi siagaidibe ramme penui ne getakwang dai gu lei, rehei misonggabe gu mâ-tew’nsiagai’ndibe ramme zeu.

⁵Hesangkedeume ramme ne zuachu ze ningnui gu melidung je guî gu lei, hesangkedeume ramme ne ningnui gu helu tâ tewme benai grepchî merie kateleume chang gu lei;

⁶kane ningnui je â Tingwang gu tingkume acheu ze kû gu lei, ziemmename ne ningnui je anui Rapeu tâ ka’ngguame bau lei ze kû gu lei; heramzatme heurâ zene ningnui teu ze bam gu lei, zai penui heurâ ramme gene ningnui ngeudi ze bam gu lei.

⁷Ningnui ’ngngamgai’ndibe ze ningnui dam dêt na lu gu lei, ningnui je tewhelêugai’ndibe ze ningnui dam hang daube peireige hesuiyi’nta ze bam gu lei; chipauziegene ningnui ram ge ningnui gu heram dam na ze ningnui ne ’nram ze bam gu lei; ningnui gu ze betundaimakbe suigut chang ze bam gu lei.

⁸I, Tingwang ne mâ-peling-gesangtewbe ka’nchâ lei, sutteube benai tâumakbe je I ngaugailak lei; I ne penui je pelingtit ze pei gai dai gu lei, zai I ne penui dage betundaimakbe puinakattewbe tew gai gu lei.

⁹Penui chaname je heramzatme ruage chî ze bam gu lei, zai hezatramme zuilung ge penui haîhikme je chî ze bam gu lei; penui je kengaume leine ne penui je chî’mmi ze bam gu lei, penui â Tingwang ne ’nnamgai’ndibe zat chang dadegeu.

¹⁰I Tingwang dage a suiyi-desang gu lei, a Rapeu gene a keringbe ’nsumchai ze bam gu lei, pa ne tewka’nringbe paî ne achu bâ gai bei de lei, pa ne katelingbe puâni ne achu luakchim gai bei de lei, henâukupeu ne mâpâ-teuria ’nteu zun gai gum, meipui ne telui teuria ramme ne kakeru gum zeu.

¹¹Kedei ne mâ-mâ-kiak ramme ’ndetpat ra pei bei gum, merie ne mâ-mâ-helei linggaibe puakpat ra pei bei gum ze, Tingwang Hera ne mâ-besie-pelingtewbe benai getoabe heramzatme ramme suage puakpatlia ra tew gai gu lei.