Read Zeme Naga ISAIA 62 Bible Online

ISAIA 62 - Zeme Naga bible

ISAIA 62

¹Zaion hang ziegene I ne zîng bam bam ra mak lei, zai Jerusalem hang ziegene I a kuâneu mak bam ra mak lei, pe gu deu ze ’nchichiak ze pat temak tâne, zai pe gu tewka’nringbe ze (hemi) keleutaube gum pat temak tâne gezeu.

²Heramzatme ramme ne ning gu mâ-tâ tew’nzeigaibe ngau gu lei. Zai heguangme ’nteumena ne ning ngeudibe ngau gu lei; dezai ningchu heji karchibe ne kû du de lei, chi Tingwang mui gene peigairabe zeu.

³Nang ze Tingwang ba gene ngauyibe heguangpeichûp chang ze bam gu lei, ning Rapeu ba gene nang ze heguang gu mâpâ-peîchup chang ze bam gu lei.

⁴Ningchu (Azuba) putkaibeipui acheu ze kû ta du de lei, zai ning gu heram je (Shemama) Gua’mpiezînggaibeibe acheu ze kû ta du de lei; kane ningchu (Hephziba) I ka’nchâbe pe dage bambepui acheu ze kû du de lei, zai ning gu heram je (Beulah) Meidipui acheu ze kû du de lei; Tingwang ne ning dage ’nchâ di daseu, zai ning gu heram je (meibepui gum) mei du lei.

⁵Rehang’mpeu hangkat ne heleukatimsangpui dage nguakelaktew gum ze ning na ’mpeumi ramme ne ningchu nguakelaktew gu lei, zai henâukupeu ne meibepui peireige pe lungsuiyika’nta gum ze ning Rapeu ne ning peireige pe lungsuiyi’nta gu lei.

⁶Ning gu kerietau ramme peireige, Hei Jerusalem gau, I ne hekêtkaime je ling gai ’nde lei; mâtew-tewsedu kemuî-keba penui zîng ze bam ra mak lei. Ningnui Tingwang je chibamme sauhegeigâk bam se lau,

⁷zai pechu sauhegeigâk bam ra pei se lau, pa ne Jerusalem tei’nsapchu gai mak tâne, zai chize kedeirei ge hengêutew’ndi gai mak tâne gezeu.

⁸Tingwang ne pe ba hezat’mbia ba ne benai pe batâtewchibe ba ne deseugaibe ze: “Ning gu chêu ze ning teureime hetak hangge I ne pei gai dai ra mak lei, zai hesangkedeume zat ramme ne nang ne tâ tewleiseigaibe ning gu wain ze sak ra mak lei;

⁹kane chige gekumka’nduime ne chize teu ze Tingwang je toa gu lei, zai chige gekumka’nduime ne chize sak ku lei, a gu kakellumbeki sîam ramme gezeu,” ze kacheube ze de lei.

¹⁰Tatpela tatchu lau, keriekemui ramme gene tatpelatatchu lau, baudime ’mpuî hangge kedâ gai zu lau; tewchu gai zu lau, ’mpuîhimdi tewchu gai zu lau, tingchu ramme tei’mbiatua kam gai zu lau, hezat ramme peireige hepiepaî getuachu gai zu lau.

¹¹Pie le lau, Tingwang ne tingmik deulangbe ge pauchang gai de lei: Zaion na ’mpuimi suage pau gai zu lau, “Pie le lau, ning gu tewka’nringbe wang mui de lei; pie le lau, pe gu getoabehi ze â pe dage la de lei, zai pe gu pa’ndingpeibe ze pe suage la de lei,” ze kacheube de lei.

¹²Zai penui je ka’nchime baudime acheu ze kû gu lei, Tingwang gu ripatlume bau zeu; zai ningchu â Peupatlule acheu ze kû gu lei, putkaimakbe namdi zeu.