Read Zeme Naga ISAIA 63 Bible Online

ISAIA 63 - Zeme Naga bible

ISAIA 63

¹Edom ge Bozra gene wangpeu, pe paîni pegeî gie ze pengêuditau ze, peranchibe ziegene tewlia ze pe pî kiamtap-tap ze tatwangpeu ze châu se lau? “Chize I chî de lei, peling-gesangtewbe rasam pau gai ze tew’nring gai ra kuugiereu ze bampeu zeu.”

²’Ndaitew ze ning puâ pegeî gie ze bam, zai ning paîni wain niakbepeu paî gum ze bam lau?

³“I a runne wain niak ze bam de lei, zai hezatme ruagene mî de a dage bam mak lei; a râtabe gene I ne penui je chaîkakeniak te lei, zai a lumpumbe gene penui je ’nrapkakedui de lei; penui jai a paî ge tewtera gai ’ndi de lei, zai a puâ ramme ge I ne peraitew gai kam ’ndi de lei.

⁴Hekûmlurabe mai hangge a lung ge bamkuâ di de lei, zai achu ripatrabe tingkum ze wangchang di de lei.

⁵I heguapie gai de lei, kane mî de achu ’ngngâgairabe kau hang ga tai lei; I hingdun bam di de lei, kane mî ne achu teigairabe kau ga tai lei; chidadege â a ba ne achu duîwanggaihâ bei de lei, zai a lumpumbe zene achu ’ngngâ gai de lei.

⁶I a râtabe gene hezat ramme je chaîkau gai de lei, a râtabe zene I ne penui je tewmeneu gai bei de lei, zai penui keringbe jai ze kedei ge I ne ruîpat kai bei de lei.”

⁷Tingwang gu hungka’ntipbe, Tingwang je getoabe rasam ze Tingwang ne anui je peigaibeibe, zai Israel ki hangge yi-desangbeibe luigum ze I ne rang gai gu lei, pe gu ka’nggiabe, pe gu hungka’ntipbe misongga bambe luigum ze pa ne penui je peigaibeibe zeu.

⁸Pa ne sa ze, Gesangsing ze penui ze karasa ne tâtewmakrame bau, a gume bau de lei; zai pa ne penui gu Tewka’nringpeu chang di de lei, ze kacheu de lei.

⁹Penui gu tewkahereube leine ge pechu du tewhereu gai lei, zai pa bambe riâ hangge changbe pe gu angel’mpeu ne penui je tew’nringpat kai bei de lei; pe gu kehungbe gene benai pa ka’nggiabe gene pa ne penui je ripat kai bei de lei; pa ne penui je teichu gai bei de lei, zai ’ndâting gene penui je tei’nggim gai bei de lei.

¹⁰Kane penui ne ’nggi ze pe gu herui ka’nchibe suî tew’nsia gai bei de lei; chipauziegene penui teureime tailam pa ’nreitat kai di de lei, zai pa ne penui je ka’nggi de lei.

¹¹Chidadege â ’ndâge pe guâ ka’ngguapeu Mosabe ting gu ze pa (Israel) ’nningdau di de lei. Pe gu melidung reime ramme je sungkling gene nguapatpeu ’ndaige pa la lau? Penui zuilung ge pe gu herui ka’nchibe kaipeu ze ’ndaige pa la lau?

¹²Mosabe ba hezat’mbia ba ge tat ra pe ba pengêudibe ba langgaipeu, pe runne pe ji betundaimakbe ji hang tew gai ra penui suage hedui bêurimnagaipeu,

¹³sungkling gene penui je nguapatpeu ze ’ndaige la lau? ze acheu zeu. Tingkangram ge hekun ramme gum ze penui mâ-’nrap mak lei.

¹⁴Kaurui ramme gum ze peningkâm ge penui tatkeu lei, Tingwang gu herui ne penui je gesaube pei bei de lei. Chigum ze nang ne ning gu baudime je, ning runne ning ji ngeutew’ndi gai ra hangge kangua de lei.

¹⁵Tinggîm ’mbene piekeu ze ngau gai lau, ning gu ka’nchibe bâm zai pengêudibe bâm geneu. Nang ning suigut patbe benai ning tatew peranchibe ze ’ndaige la lau? Ning lung gene huîbe benai ning gu ngauka’nggiabe ze a hangge â, pei mak ze kebang gai ’nde lei.

¹⁶Abrahambe ne anui je chî mak bam leusedu, zai Israel ne anui je chigaihâ mak bam leusedu nang ze anui Peu de lei; nang Hei Tingwang gau, anui Peu de lei, ’ndâting gene anui gu Ripatpeu ze ning ji de lei.

¹⁷Hei Tingwang gau, ’ndaitew ze ning gu ’mpuî gene anui tatmau gai ra nang ne anui je tew gai lau, zai ningchu anui ne hing mak bam ra anui lung ran tew’nchi gai lau? Nang ne kelânglume bau zatme, ning guâ ka’ngguame hang ziegene helatwang lau.

¹⁸Ning gu ka’nchime bau ne ning gu kakellumbe bâm ze beting kecheînege tei gai de lei; anui teureime ne chize kedîmkau ’nde lei.

¹⁹Anui ze nang ne mâdau samramgaimakme gum chang gai de lei, ning ji gene kûgaimakme gum zeu.