Read Zeme Naga ISAIA 64 Bible Online

ISAIA 64 - Zeme Naga bible

ISAIA 64

¹Hei nang ne tingkehube ze tewri gai lu wangkeu nung laîzai, chidezai ning masua gene kedeiloa ramme gechuî’ngngai ze bam ra—

²hechingkeîrang ramme hemi’ntaugaibeibe luage hemi ne hedui langtabe gum bam ra— ning ji ze ning teureime je chiliâ gai ra, chidezai nang bambe geze heramzatme ramme ne peize kedun ze bam ra hangge zeu!

³Anui ne peumakbe chi mi kehingbe zat ramme nang ne tewgaibe luage, nang ne wangkeu ze nang bambe ge kedeiloa ramme gechuî’ngngai ze bam de lei.

⁴Pechu kuame hangge tâtewpeu Hera je ’ndâgene mî de seu mak, makchai mî de seuchi mak, hemik ne ngau mak lei.

⁵Mâ-pelingtewbe gene helungsuiyi ze tâtewbe kau, ning gu ’mpuî ramme je chibamme je nang ne hedautâu gai bei de lei. Pie le lau, nang ning râta gai lei, zai anui ne hemui gai lei; anui gu hemui ramme ge anui â bam bam de lei, zai anui je tew’nring gai bu semei?

⁶Mige hebâdibe kau gum ze anui â chang kam di de lei, zai anui ne tâ-pelingtewbe ramme ze tewhebâgai’ndibe paî gum bam de lei. Mâ-neu gum ze anui â heguikeu ze bam lei, zai anui kahemuibe ramme zene tingkai ne gum ze anui je guitua ze bam de lei.

⁷Ning ji ge kûbe kau mî de ga lei, zai ningchu ’nggui’ntip ra hangge pe runne keranbe kau ga lei; nang ne ning ju anui dagene tei’mbai di de lei, zai anui gu hemui-helut ramme ziegene anui je tuâpat kai bei de lei.

⁸Acheuleusedu, Hei Tingwang gau, nang ze anui Peu de lei; anui â depungkâng de lei, zai anui hangge nang zene helichiampeu chang lei; anui ze ning batâ ramme kam lei.

⁹Ning râta’mpia di ze bam se lau, Hei Tingwang gau, zai hemui-helut ze betingbeta chî bam se lau. Pie le lau, ’nning gai ni lau, anui ze ning gume kam lei.

¹⁰Ning gu ka’nchibe namdi ze hênamchangbe heram chang gai di de lei, Zaion ze hênamchangbe heram chang gai di de lei, Jerusalem ze sia kam gai di de lei.

¹¹Anui paume ramme ningchu toa ze bambe bâm anui gu ka’nchibe benai ngauyibeki ze hemi ne rû ’ndi de lei, zai anui gu yi-kadesangbe bâm ramme ze sia gai kam di de lei.

¹²Nang ne airamme ge acheu ze pemapie bam ra rei mei, Hei Tingwang gau? Nang ne zîng ze bam ra mei, zai anui je tewhereu’mpia gai ra mei?