Read Zeme Naga ISAIA 65 Bible Online

ISAIA 65 - Zeme Naga bible

ISAIA 65

¹Achu ’mmêtmakme ne achu peurabe hangge I â kuâ bam lei; achu peumaktadime ne achu peudaurabe hangge I â kuâ bam lei. I ne, “Aige I la de lei, aige I la de lei,” ze acheu ze a ji kûgaimakme heramzatme je kacheu de lei.

²Achu ka’nggime dage I ne ’nrîmbeting tâluî a ba kena getuapatkaikuâ bam bei de lei, yimak-makbe ’mpuî ge tat ze bamme, penui suî’nning tewtattime;

³achu pie ze a lumpum tâbamme, kerie ramme lungge herâtew ze hegamkâng ramme peireige mâ-perîmyibe ’ntau ze bamme;

⁴heraw ramme peireige dung ze zai mâ-mik-mik ge bamtingba ze bamme; kebakji kahebâbe teume, zai mâ-kahebâbe ramme ji suabe dui penui gu heli kerua ramme ge kai ze bamme;

⁵“Nang â bam’ndeu de lei, a tailam wang’nna se lau, ning dagene achu â, kaichâmcheî gai ’nde lei,” ze kacheume bau jeu. Airamme ze a nêuki kena ge hemika bambe de lei, tauhimmuî ze bambe hemi zeu.

⁶Pie le lau, a masua gene chize raw gai de lei: “I ne zîng ze bam ra mak lei, kane mâge â chipau ’nding ge tew gai dai gu lei, eu lei, I ne penui ga ge

⁷penui gu hemui-helut ramme benai penui paume gu hemui-helut ramme ze tew gai dai gu lei, ze Tingwang ne kacheu de lei; penui ne kedeiloa ramme peireige mâ-perîmyibe ’ntau ze peloa ramme peireige achu saka’nsiabe ziegene tingtie ge penui mâ-tâtewgaibe ramme hang penui ga ge I ne mâge â I pegu lei,” ze acheu zeu.

⁸Aigum ze Tingwang ne rang lei, “Pechîhût ge wain ngau bei dadege, penui ne, ‘Chize tew’nsia gai se lau, chige mâ-yibe la de lei,’ ze kacheu de lei, chigum ze a guâ ka’ngguapeu hang ziegene I ne tew gai gu lei, zai penui je tew’ngga kam gai ra mak lei.

⁹Jakobbe dagene Rehei chukadaime je I ne nguapat kai gu lei, a gu kedeiloa ramme ka’nramme je I ne Juda gene nguapat kai gu lei; a guâ ka’ngguame ne chize ’nram gu lei, zai a guâ ka’ngguame ne chige lung gu lei.

¹⁰Sharon zene melitaning hang chang gu lei, zai Akor Kâm zene mârekaune gu tejeîbâm hang chang gu lei, a gume achu peubeime hang gezeu.

¹¹Kane ningnui Tingwang je sâugaime, a gu kedeiloa ka’nchibe je chitadime, Pauyibe-râtewbe hangge mâ-kaira kaigaime, zai Hepumrit hangge wain kebutlube hepiak ge ruîgpuigaime;

¹²hiazutkie hangge I ne ningchu hatkai’ntua gai gu lei, dezai ningnui ’nteumena ne kegîbepeu dage keikeu gai gu lei; I kûbeibe luage ningnui ne kak kai mak, I ’mpaubeibe luage ningnui ne ’ngking gai mak, kane a mikngau ge ningnui ne mâ-kesiabe tâ tew, zai I ne ’nchâmakbe ge kelânggai’ndibe ziegeneu,” ze acheu zeu.

¹³Chipauziegene Tingwang Hera ne aigum ze rang lei: “Pie le lau, a guâ ka’ngguame ne teu gu lei, kane ningnui â ’njei ze bam gu lei; pie le lau, a guâ ka’ngguame ne sak ku lei, kane ningnui â herei ze bam gu lei; pie le lau, a guâ ka’ngguame ne hesui’nta ze bam gu lei, kane ningnui je â tew’ngngam gai bu lei;

¹⁴pie le lau, a guâ ka’ngguame ne helungsuiyika’ntabe ziegene heleutew gu lei, kane ningnui ne helung ge betedgeteube ziegene ’nrungpat ku lei, zai helunghereu ze heu ze bam gu lei.

¹⁵Chianggaibe hangge ningnui ne ningnui ji ze a gu kelânglume dage sâudiak kai gu lei, dezai Tingwang Hera ne ningchu bichat kai gu lei, kane pe guâ ka’ngguame je pa ne gechâm-châmbe heji ne kû ze bam gu lei.

¹⁶Chidezai mige heram lungge pe runne pechu ’nnam gai ze bamme ne samsang Rapeu gene pe runne pechu ’nnam gai ra hangge zeu, zai mige heram lungge kadesetbe tâ tewbe kau je samsang Rapeu ne deset kai ra hangge zeu; tingtie ge tewkahereube zat ramme chî ta di, zai a mikngau gene tei’mbaigai’ndibe ziegeneu.

¹⁷“Pie le lau, I ne tinggîm karchibe benai kedei karchibe tew gai lei; zai tingtie gu mâ-mâ leine â chibam ra mak lei, makchai mi lung ge ’nningwang dai ra mak lei.

¹⁸Kane I tewgaibe bâm ge betingbeta hesuiyi bam lau, zai hesui’nta ze bam lau; chipauziegene pie le lau, hesuitew’ntarabe hangge I Jerusalem tew gai, zai hesuitew’mmirabe hangge chige bamme je tew gai de lei.

¹⁹Jerusalem peireige I ne a suî’nta bam gu lei, zai a gume dage a suiyi bam gu lei; chige kehapbe kuâ benai mi duângga ka’nrungbe kuâ ze seu ta du de lei.

²⁰Chige ’ngngiêne hezie gechâmne runne ringgailutarabe kau bam ta du de lei, makchai gechîngme pa ringrabe riâ ringchanglakrabe kau bam ta du de lei, napoine ze tingkum haî kat chang dizaine pa chai gu lei, zai kahemuibe kau tingkum haî kat ringchangbe kau je â, deset kai bu lei.

²¹Penui ne heki ramme tew lu chige bam gu lei; penui ne grepchî kiak ramme tau ze perachî raiteu gu lei.

²²Penui ne heki tew gai ra mak lei, miramme ne bam ra hangge zeu; penui ne mâ-kiak tau gai ra mak lei, miramme ne raiteu ra hangge zeu; hingbang sapchangbe ting riâ a gume sapchang gu lei, a gu kelânglume ne penui batâ teu ze ’ntaza ze bam bam gu lei.

²³Penui mâ-peruânggabe gene tâtewhereu gai ra mak lei, makchai mi duânggabe daurabe hangge napoine ramme je lungkeu gai ra mak lei; penui ze Tingwang ne ’nnamgaibe chaname chang ze bam gu lei, penui chaname je ngua lu zeu.

²⁴Penui ne kû gai makge I ne kak ku lei, penui sa kam makge I ne seuchirai di bam gu lei.

²⁵Munserung benai melipoine deteuherua gu lei, mâkau ne getumsei gum ze megau setteu gu lei; zai kedeiniamoîne zene henêu hetak hang chang gu lei. A gu ka’nchibe deiloa ge penui je tewhejam ra mak, zai tew’nsia ra mak lei,” ze Tingwang ne kacheu de lei.