Read Zeme Naga ISAIA 66 Bible Online

ISAIA 66 - Zeme Naga bible

ISAIA 66

¹Aigum ze Tingwang ne rang lei: “Tinggîm ze a gu heguang-bamrak lei, zai kedei ze a pichaîra de lei; ningnui ne a hang tewgairabeki ze ’ndaikau ki lau, zai I saurabe bâm hang tewgairabe ze ’ndaikaugumbe bâm lau?

²Airamme leine a ba ne tew gai de lei, zai chipauziegene airamme ze a gu kam de lei, ze Tingwang ne kacheu de lei. Kane aipaupeu ze I ne piekuarapeu de lei, kecheiluilung pung, zai helung ge ’nningkahereube ne pui lei, zai a sam sagaibe peireige â kêusui gai ze bam lei.

³“Mige getumsei je bichatbepeu ze ziemmena je tewchatpeu riâ de lei; melipoine je herâtewgaipeu ze hetei guang tewka’nsiapeu riâ de lei; mige mâ-himlei-râtewbe peipatkaipeu ze kebak jai peipeu riâ de lei; chibambe gu mâ-perîmyibe rûgaipeu ze heraluîtewbe je ’nnamgaibe riâ de lei. Penui ’mpui-puî hangge penui kelâng ’ndi de lei, zai penui gu kakellumbe katenetbe zat ramme ge penui keringbe gene ’nchâ ze bam de lei;

⁴I du penui hangge tewkahereube kelâng gai gu lei, zai penui gu mi kehingbe penui peireige teiwang gai gu lei; I kûgaibeibe luage mî du kak mak, I ’mpaubeibe luage penui ’ngkingmaktaibe ziegeneu; kane a mikngau ge mâ-kesiabe tâ penui tew gai ze I ne ’nchâmakbe zat ge penui kelâng gai ’ndi lei.”

⁵Tingwang gu sam ze ’ngking le lau, ningnui pe sam ge hingkedun ze bamme gau: “Ningnui sikiname ningnui je ngaugailakme benai a ji ziegene ningnui je tuâpatkaime ne sa ze, ‘Peize Tingwang ngeutew’ndi gai be lau, dezai anui ne ningnui suigut ze ngau le ra hangge zeu,’ ze kacheu de lei; kane tew’ngngam-gaiberame bau ze penui de lei.

⁶“’Ngking le lau, namdi gene ’nrungkagetiebe kuâ zeu! Kellumki gene hekuâpatbe zeu! Tingwang ne pe teureime je penui tâ luigum ze peigaikadaibe kuâ zeu!

⁷“Chipaupui ze henalung ra ’nra’nsua makge hena lungkeu de lei; pe dage geteubeted pat makge pa ne ’mpeumi napoine lungkeu gai de lei.

⁸Châu aigumbe kuâ seu gai di de lau? Châu aigumbe zat ngau gai di de lau? Heram mai kat ne lungkeu gai be ra mei? Heramzat luakatne lungkeu gai be ra mei? Zaion ne henalung ra kerikeleu gai gap dege pa ’mpeumi napoine ramme lungpat kai de lei.

⁹Mâ de lungpatkairabe ga ze I ne henalungrabe hî hang tew gai ra mei? ze Tingwang ne kacheu de lei; I, henalungpat ra tewgaipeu, ne nebâm ze tewnam ra mei? ze ning Rapeu ne kacheu de lei.

¹⁰“Jerusalem dage hesui’nta lau, zai pe ziegene hesuiyi lau, ningnui pechu ka’nchâme leine gau; helungsuiyibe ne pe dage hesuiyi’nta lau, ningnui pe peireige heu ze bamme leine gau;

¹¹dezai pe gu ngua’ntêulungbe hetung kena gene ningnui tung ze ’nggeugit bam le ra hangge zeu; dezai pe gu pengêudibe misongga bambe gene ningnui sakyi ze sak le ra hangge zeu,” ze kacheube zeu.

¹²Tingwang ne aigum ze rang lei: “Pie le lau, keyibe ’nggim ze bambe ze ’nggeuki gum bam ra I ne pe hangge tew’nggim gai sua gu lei, zai heramzatme gu lungyibe keheube ze ’nggeuki lua’nniâmba bambe gum bam ra peigaisuâ gu lei; dezai ningnui tungsak ku lei, ningnui je pe nie gene pua gu lei, zai pe kuk kena gene pua’mbup ze bam gu lei.

¹³Pe pui ne tumbe poine je gum ze, I ne ningnui je tum gai gu lei; Jerusalem ge ningnui je tum gai bei ze ’ntêulung bam gu lei.

¹⁴Ningnui ne ngau dezai, ningnui lungsui’nta ze bam gu lei; ningnui ba ramme hereuneu gum ringchim pat ku lei; dezai Tingwang ba â, pe guâ ka’ngguame dage la lei be chî du lei, zai pe teureime je pe lungsia’ndi-dibe bambe zeu.

¹⁵“Chipauziegene pie le lau, hemi gene Tingwang wang gu lei, zai pe gu timriang ramme tingkaichibe gum wang gu lei, pe lumpumted tewlia gai ra, zai hemimelei gene pa’nret tewlia gai ra hangge zeu.

¹⁶Chipauziegene hemi benai pe gu hiazutkie ne Tingwang ne ziemmena ’nteumena peireige samrambe tâ tew gai gu lei, Tingwang ne bichatkaibeime ze misongga bam du lei.

¹⁷“Kebakji kabebâbe zai mâ-mâ mi katenetbe zai hezaji teu ze, kerie ramme zuilung ge hangkat chai suigut ra penui runne penui je tew’nchi, zai tew’ntia ze bambe ze ga’nzaugaiderabe ge wang gai kam gu lei, ze Tingwang ne kacheu de lei.

¹⁸“I ne penui tatew tak ramme benai penui ka’nningbe tak ramme chî lei, zai pezat leine benai hekuâ-heled gechâm leine je gekumwang’ndui ra I wang zi gu de lei; dezai penui wang ze a ngeudibe ngau gu lei,

¹⁹zai I ne penui ruage a gu dakka’nchetbe kat kai gu lei. Zai a ji dibe rasam seumakme, makchai pengêudibe tak ngaumakme heramzatme ramme Tarshis, Put zai Ludme bai’mpi kapchime dage, zai Tubal benai Jaban dage, kedeu ’mbe heduiluaka’ngguabe bâm ramme dage penui dagene ziemmena chai’nsakpatme je I ne lang gai gu lei, dezai penui ne a ngeudibe rasam heramzatme dage pauliâ gai gu lei.

²⁰Zai Israelme ne penui gu mâ-himlei-râtewbe mâkuak ka’nchibe gene Tingwang ki ge teiwang gai gum ze penui ne hekun ramme, zai timriang ramme, zai penui gu dualiera ramme, zai hekunmerângne ramme, zai put-hu ramme gene pezat leine dagene ningnui puiname ramme leine je herâtewbe hang peipatkaibe gum ze a gu kedeiloa ka’nchibe Jerusalem ge Tingwang dage pungwang gai gu lei.

²¹Zai Tingkume benai Lebime hangge penui ruagene hanggesame je du I ne lu gu lei ze Tingwang ne kacheu de lei.

²²“Tinggîm karchibe benai kedei karchibe I ne tewgairabe ze a masuage bam bam gu daseu ze Tingwang ne kacheu de lei; chigum ze ningnui chaname benai ningnui ji ze bam bam gu lei.

²³Keuhâ gene keuhâ patkadaibe riâ, ’ntakbambe mai gene ’ntakbambe mai daukadaibe riâ ziemmena hemeipum leine ne a suage kellum ra zuawang kam gu lei, ze Tingwang ne kacheu de lei.

²⁴“Zai achu ’nggigai’ndime ziemmena gu kechaipum ze penui ne tatpat ze pierua gu lei; penui pum ge tingsîkaidibe ze chai ra mak, penui pum rube hemi ze ’mmit ra mak, zai penui zene ziemmena hemeipum leine hangge katenetbe chang ze bam gu lei.”