Read Zeme Naga ISAIA 7 Bible Online

ISAIA 7 - Zeme Naga bible

ISAIA 7

¹Jothambe na, zai Uzziabe na Ahazbe ne Judaram ge kaheguangbe ting ge, Siriaram gu heguang Rezinbe benai Remaliabe na Israelram gu heguang Pekabe herei’nggi ra hangge Jerusalem ’mbe hang de lei, Jerusalem ze penai ’nggichi lak ti de lei.

²“Ephraimbe ki benai Siriaram muikattew lu la de lei,” ze Dabid ki je rang gai bei dadege â pa benai pe gu ziemmena lung ze ’nrêukang ge hingbang ramme bambe tingkai kechibe ne tewkenukliagaibe gum ze kedun kam di de lei.

³Zai Isaiabe je Tingwang ne rang ze, “Ahazbe je hedau ra ning na Shear-jashubbe je ngua lu paîdakbe tâtewme bâm ’mbe tatbe puidi ge ’nrei ’mbe bambe hezai sungbe gene hedui’mpuî ritkeubetun-gaibe ge tat zu lau,

⁴zai pechu, ‘’Ntîngteî ze bam lau, ning lung hegeigâk ze bam lau, hing de hing se lau, zai aipau mesumpui kena heibe zai Rezinbe benai Siriaram, zai Remaliabe na aibe kena lumpumsiabe ziegene ning lung chei di ze peize bam se lau.

⁵Siriaram benai Ephraim ki, zai Remaliabe na herua lu ze, ningchu tew’nsia ra kahedei de lei, zai acheu sa ze,

⁶“Juda ki je hang ze ’nggi kei lei, zai tewhingrim gai be kei lei, zai chipau heram anui hangge sut lu dezai Tabielbe na je heguang hangge chige teichu gai be kei lei,” ze kacheu de lei.

⁷Kane Tingwang Hera ne aigum ze rang lei: Chize sap ra mak, zai chize wangchang ra mak lei.

⁸Siriaram peî â Damaska da, zai Damaska peî â Rezinbe ze daseu. (Kum riakseruk ze mengeu lungge Ephraim ki â pângdesuirui gai du lei, chidezai ziemmena zat chang ta de ra hangge zeu).

⁹Ephraimbe peî â Samaria da, zai Samaria peî ze â Remaliabe ze de lei. Nang ne ’nnumtew makchai â, mâtew-tewsedu nang sapchi ra mak lei,’ ze salia be lau,” ze kacheu de lei.

¹⁰Ahazbe je Tingwang ne rang gai dai ze,

¹¹“Tingwang ning Rapeu gu dak ka’nchetbe kie lau; peize chize Kechaiberam kechukbe riâ chuk ze nune tinggîm hube riâ mei ze peize hu ze bam lau,” ze kacheu de lei.

¹²Ahazbe ne kak ze, “I â ka’nchetbe kie ra mak lei, zai I â Tingwang je kedak ra mak lei,” kacheu de lei.

¹³Zai pa ne rang ze, “Chidaze ’ngking le lau, Dabid ki gau! Ziemmename peireige nang leikeudibe ziegene a Rapeu je du nang heguîlielaktibe ze mâ-kecheibe hangge nang ’nning gai semei?

¹⁴Chidaze Tingwang gîmsing ne ’nchetrabe ningnui je pei gu lei, pie le lau, heleu’mpui ’mpung gu, zai pe na ’mpeumi napoine lungkeu gu lei, zai pe ji â Immanu-el ze kû gu lei.

¹⁵Pa keyi-kesia gepachibe riâ chang dezai tungdui benai ’ngkuidui ne pa teu gu lei.

¹⁶Chi napoine ze keyi-kesia pa chî makge, besua’ngka ge ningnui hing-desang ze bambe heguang kena ram ze â putkai’ndibe heram chang ze bam du de lei.

¹⁷Judabe dagene Ephraimbe rimnatattibe gene seu ze mâdau wangchangmakbe wangchangrabe tingnaimikpui ramme nang benai ning gu ziemmename peireige zai ning peu ki peireige Tingwang ne teiwang gai gu lei—Assiriaram gu heguang zeu,” ze kacheu de lei.

¹⁸Chipau mai ge â Ijipram gu ’nggeuki ba ramme ge temaine ramme bambe ze, zai Assiriaram ge bambe ’ngkui ramme je Tingwang ne kelau gai gu lei.

¹⁹Zai penui ’nteumena wang kam gu, zai ’nggeuchuak chukbe ramme ge, zai terialim ramme ge, zai hetupat ramme leine ge, zai melitaning ramme leine ge lungpuigit ze bam gu lei.

²⁰Chipau mai ge â Tingwang ne ’nggeuki ze wîgiam ’mbene ’nseîne ’nteulube ne—Assiria gu heguang je kû’mpam lu—ningnui peîtam benai ningnui pîgêu, zai ningnui biagêu ’nsangdu gutduak ’ndu lei.

²¹Chipau mai ge â ziemmena ne getum meleupui kat benai meli kat ’ngkut ku lei;

²²zai penui tungdui misongga peibeibe ziegene pa tungdui teu ra ngau gu lei; mi-mige du chi heram ge ’nsakpatbe kau â, tungdui benai ’ngkuidui teu ra ngau gu daseu.

²³Chipau mai ge â gepûtrangkâng chang kat mî gu grepchî merie pehiâm chang kat bambe lu bâm ’nsangne ge hetupat benai hetubang ’nnia bam gai du lei.

²⁴Bai’mpi benai betu ramme tei lu chige ziemmename wang gu lei, heram leine ze hetupat benai hetubang ne puigit gu daseu;

²⁵zai gepeu ne kebau ze bambe deiloa ramme geze hetupat benai hetubang ramme je hingbe ziegene chige nang tat dai ra mak lei; kane chipau bâm ramme ze getum benai kemei kadeteube bâm benai kutgetie bambe bâm chang gu lei.