Read Zeme Naga ISAIA 8 Bible Online

ISAIA 8 - Zeme Naga bible

ISAIA 8

¹Tingwang ne achu rang gai ze, “Leisikuak kedibe tei le lau, zai ’nteumena ne kiâchiduibe giak ne chige, ‘Maher-shalal-hasbaz’ ze raw gai lau,” ze kacheu de lei.

²Zai achu sagaihâbe chang ra ’nnumtewduibe kau sakki hangna tingkupeu Uriabe benai Jeberekiabe na Zekariabe je nguawang gai de lei.

³Zai kemeu’mpui tailam I tat te lei, zai pa ’mpung ze pe na ’mpeumi napoine lungkeu de lei. Chidadege Tingwang ne achu, “Pe ji hangge, Maher-shalal-hasbaz ’ntak kai lau;

⁴chi napoine ne, ‘A peu,’ mei ‘A puai’ mei ze kûchirabe suage Damaska gu keheube benai Samaria gu hereichâ ze Assiriaram gu heguang ne teitat ’ndu daseu,” ze rang gai de lei.

⁵Tingwang ne achu ’mpau kadai de lei.

⁶“Aipau ziemmename ne Shiloa geuki dui renuahuai ze luabe hedui ze ’nchâ mak ze Rezinbe benai Remaliabe na je ’nchâ di de lei;

⁷chidaze pie le lau, ’nggeuki gu hedui ramme, peranchi zai kie-kadesangbe kau, Assiriaram gu heguang benai pa pengêudibe leine Tingwang ne penui peireige teiwang gai gu lei; hedui’mpui ramme benai ’nggeukung ramme peireige lua’nnîampat ku lei;

⁸zai Judaram lung ’mbe luapedakda gut ku, chigene ’nnîampat dai ze naîzutza tat ku lei; chize ning guangtie riâ sûmhangchang gu lei; zai ningnui gu heram dit luî pekan ’ngkappuigit kai gu lei, Hei Immanu-el,” ze acheu zeu.

⁹Muikat-tewherua zu lau, ningnui ziemmename gau, zai ningnui duângga ze bam lau; ningnui kun ’ndualie gai lau, ningnui kedeu ’mbe bambe heram ramme gau; hereirabe hangge kedâ le zu lau; eu lei, herei hangge kedâ le zu lau.

¹⁰Wang’ndui ze hekîzun le lau, kane chize peruânggabe chang gai du lei; sam sa le lau, kane chize sap ra mak lei, Hera â anui dage la daseu.

¹¹Tingwang pe ba ranchibe ne a peireige aigum ze rang gai de lei, zai aime ’mpuî ge I tat mak ra hangge leddei gai ze acheu sa ze,

¹²“Aime bau ne mâ-kahedeibe ze mâ-kahedeibe hangge chak kai se lau, zai penui ne kehingbe je hing se lau, ka’ngngimbe peize ning lung ge bam se lau.

¹³Kane baudime gu Tingwang je runne ka’nchibe hangge nang riam gai ra lei; peize pa ze nang kehingpeu chang lau, zai pechu nang ’ngngim ze bambepeu chang lau.

¹⁴Dezai pa ze ’nseugairabe bâm chang gu lei, zai Israel ki kena hangge â tewnamrabe chukâng zai ’nraprabe chukâng chang gu, zai Jerusalem ge lungme hangge raprabe ’mpia chang gu lei.

¹⁵Zai chige ze misonggame ’nrap kai gu lei; penui kâukeu ze hitruai gai gu lei; penui je ’mpia ne rap lu teitat ku lei,” ze rang gai de lei.

¹⁶Aipau sam ranggaibe pinam ne lau, zai a gu kemeume ruage reî’ntiprip kai ne lau.

¹⁷Jakob ki je pe ju bai ’ndi ze bambepeu Tingwang je I â heguîkua ze bam gu lei, pa ge I ’nnumtew gu lei.

¹⁸Pie le lau, I benai achu Tingwang ne peibe name ze â Israelme ram hangge, Zaion Loa ge bambepeu baudime gu Tingwang dagene patbe ’nchetrabe benai ’nningdaulakbe ze de lei.

¹⁹Zai penui ne ningnui je, “Sam pungkahelakme benai heduaî tewchime mâ-damtroi ze teliu-liu ze bamme je mâ-’mmêt lau,” ze acheu dezai, ziemmename penui Rapeu je mâ-’mmêt kai mak ra semei? Penui ne keringme kelei chang ze kechaime je mâ-’mmêt ra ka’nnang semei?

²⁰Geteiliagaibe benai rangdiakbe ge runne bam ra de lei! Pelingsing ze aipau sam penui sabe ge kebabe ga lei.

²¹Penui duângga-desang ze, zai ’njei-herei ze heram lungge penui tatrua bam gu lei; zai penui ’njei di dezai penui lumpum ze penui gu heguang je, zai penui Rapeu je deset kai gu, zai penui ma ’ngngangchu gu lei;

²²zai penui kedei pie’nsukkeu gu, kane pie le lau, mi duânggabe benai kemuîbe, zai lungkahereube ne muîgit bam gu lei; zai mui’ntiptibe ge penui je chuigut kai ’ndu lei.