Read Zeme Naga ISAIA 9 Bible Online

ISAIA 9 - Zeme Naga bible

ISAIA 9

¹Kane besua’ngka ge lunghereu ze bambepui hangge kemuîbe ga du de lei. Tingtie’ngka â Zebulunram benai Naphtaliram je pa ne tewhelêu gai bei de lei, kane wangdairabe ting ge â sungkling kung, Jordan geu katlam giam bambe heram, heramzat kêdame gu Galili je pengêudi ze bam ra pa ne tew gai gu lei.

²Kemuibe ge tatbe ziemmename ne kebabe kedibe ngau lu de lei; muiterîngbe heram ge bamme peireige kebabe ’mbi lerba gai bei de lei.

³Heramzat je nang ne tewpung gai bei de lei, pe gu hesuiyibe nang ne tewpungpat kai bei de lei; ning masuage penui hesuiyika’nta de lei helugatbe ge hesuiyibe gum, hereichâ ka’nzibe luage ziemmena hesuiyibe gum zeu.

⁴Midian je ngambe mai gum ze pe putritbe gu guangkâm, zai pe keîtoa ge kairabe hetui, pechu tewsame gu hetui ze nang ne tewbet kai bei de lei.

⁵Herei ’nggikalui-bambe ge heteureipeu kedîmruabe pîchûp leine benai hejai keneitâugaibe puâ leine hemi hetak hangge chang ze rû ’ndu lei.

⁶Anui dage napoine lungkeu gai bei de lei, anui dage ’mpeuminapoine pei gai bei de lei; zai heguang samrambe tâ pa ne pung gu lei, zai pe ji ze â, “Geteichipeu mi ningdaulakpeu, Reziechibe Hera, Betunmakbepeu, Desieyibe gu Heguang,” ze kû gu lei.

⁷Pe gu heguang samrambe tatew benai desieyibe ditatbambe ze betun dai ra mak lei, Dabidbe gu heguang-bamrak peireige, zai pe gu heguangram peireige chuna gene chu ze betingbeta hangge samramka’nzeibe benai kapelingbe gene beichu gai ra, zai teigetuachu gai ra hangge zeu. Baudime gu Tingwang ne ka’nchâbe gene aize tew gai gu lei.

⁸Jakob peireige Tingwang ne kedeibe sam lang gai de lei, zai chize Israel peireige taureba bam gu lei;

⁹zai Ephraim benai Samaria ge bamme penui lung ge chî kam gu lei:

¹⁰“Hegamkâng ramme ’ngngaîkeu kam de lei, kane tingchu giazunlube ramme ne anui tew gu lei; ’ndutchî bang ramme â kuîkau kam gai de lei; kane chiramme bâm ge anui ne kedarbang ramme kai gu lei,” ze kacheume bau zeu.

¹¹Chigum ze Tingwang ne penui je tingkangrame hang teichu gai ze penui teureime je hû’nrak kai de lei.

¹²Tingbia ’mbia ge Siriame, zai tingrun ’mbia ge Philistinme acheu ze mui na lam chuâ lu Israelme je tewka’ngga de lei. Airamme hangge Tingwang ne pe lumpum ’mbaî mak ze pe ba getuakuâ bam de lei.

¹³Pa ne penui je lakbeime bau ze pe dage ’nreiwang mak lei, zai baudime gu Tingwang je du peusua mak lei.

¹⁴Chigum ze Tingwang ziemmena pe peî pemi changme, mêupibang keî benai hekupum ze mai kat ne Israelme ruagene tew’ngga ’ndibe—

¹⁵gechîngme benai miramme ne hengêutew ze bamme ze pe peî de lei, zai kemeu’mpeu mâ-kageteipeu ze pemi de lei;

¹⁶aime baudime je kanguame zene penui je ngua’mmie gai lei, zai penui ne kanguame ramme je â, tewpedap kai bei de lei.

¹⁷Chipauziegene Tingwang ne penui na rehangme ramme peireige ’nchâ mak te lei, zai penui ruage bepeu-game benai kemîpuime ramme peireige ngauka’nggiabe ga di de lei; ’nteumena ne Hera je ’nninghekuî ta di ze tâ-kesiabe tewme chang kam di de lei, zai ’nteumena ne kemiebe sam sa kam di de lei. Airamme ge Tingwang ne pe lumpumbe ’mbai mak ze pe ba getuakuâ bam lei.

¹⁸Mâ-besie makbe tâtewbe ze hemi gum ze tau de lei, chize ne hetupat ramme benai hetu ramme rûmut ’ndi de lei; chize ne ’nrêutum tau de lei, zai mika pum ramme gi-ploi chu de lei.

¹⁹Baudime gu Tingwang rata gene heram ze rû ’ndi de lei, zai ziemmena ramme zene hemi hetak chang di de lei; mî ne du pe sikina hang tinggeu ta di de lei.

²⁰Penui hezat’mbia ’mbene sutteu gai leusedu ka’njei gerei lei, dadege heku’mbia ba ne ruiteu ’nzâu gai de lei, kane penui lungwang ’nggeu chang mak lei; kat-kat ramname ji teukakelui de lei,

²¹Manasse ne Ephraim je ’nggi, zai Ephraim ne Manasse je ’nggi, acheu ze penui ’nteumena ne Juda peireige ka’nggibe chang di de lei. Airamme ge Tingwang ne pe lumpumbe ’mbaî mak ze pe ba getuakuâ bam lei.