Read Zeme Naga LEBITIKAS 1 Bible Online

LEBITIKAS 1 - Zeme Naga bible

LEBITIKAS 1

¹Zai Tingwang ne Mosabe je kû lu ze ka’nduibe hetiampaîki gene pechu ’mpau ze,

²“Israelbe chaname je ’mpau lau, zai penui je, ningnui ruage mi-mige de Tingwang dage kela teiwang dezai getumdung ruagene mei nu melidung ruagene mei ze ningnui kaurui peipat kai ra lei.

³Mige pe gu getumdung ruagene rûkambe-râtewbe pei zai â getumsei heziâkgabe ne peipat kai ra lei; zai pechu Tingwang ne lu gai ra ka’nduibe hetiampaîki kemuiki ge Tingwang masuage peipat kai ra lei;

⁴zai rûkambe-râtewrabe kaurui peî ge pe ba die gai ra lei; dezai pe hangge desieyibe herâtewbe hang lu gai ze bam gu lei.

⁵Zai Tingwang masuage pa getumsei tewchat kai ra lei; zai Aaronbe name tingkume ne hejai ze Tingwang dage peipat kai ze, ka’nduibe hetiampaîki kemuiki hiage herâtewbe bâm ge penui ne chi hejai ne kezin-guâ gai ra lei.

⁶Zai herâtewbe kaurui gei ze la lu, pepumji rimpâng gai ra lei;

⁷zai tingkupeu Aaronbe name ne herâtewbe bâm ge hemi’ntau gai ra lei, zai hemi peireige heching kua’ntiaria gai ra lei;

⁸zai Aaronbe name tingkume ne hemeikâng ramme, bepeî zai pechâ ze herâtewbe hemi peireige heching ge kai zun gai ra lei;

⁹kane pelunglet ramme benai bepî ramme â hedui ne pa hui ra lei. Zai Tingwang hangge mâ-perîmyibe pepumluî rûkambe-râtewbe peipatbe bâm ge tingkupeu ne rû gai ra lei.

¹⁰“Rûkambe-râtewbe hangge pe gu kela peipat ra zai â melidung ruagene mei nu kemeidung ruagene mei ze besei kat heziâkgabe pa pei ra lei;

¹¹zai herâtewbe bâm gu tingpeî ’mbia gene Tingwang masuage chize pa tewchat ra lei, zai Aaronbe name tingkume ne herâtewbe bâm ze hejai ne kezin-guâ ra lei.

¹²Zai hemeikâng ramme rim’nchiâm lu ze pepeî du zai pechâ du tingkupeu ne heching peireige herâtewbe bâm hemi ge kai zun gai ra lei;

¹³kane pelunglet ramme benai bepî ramme hedui ne pa hui ra lei. Zai tingkupeu ne peipat kam gai lu ze rûkambe-râtewbe peipatbe bâm ge rû gai ra lei; chize Tingwang dage rûkambe-râtewbe, hemi gene peipatbe, mâ-perîmyibe de lei.

¹⁴“Rûkambe-râtewbe hangge ’nruipoine ne peipat ra zai â depeine mei nune temaune mei ne peipat ra lei.

¹⁵Zai tingkupeu ne herâtewbe-kaira ge chize teiwang gai lu, bepeî keriaktap kai ra lei, zai chize herâtewbe-kaira ge rû gai ra lei; zai hejai â herâtewbe bâm hiage ’nzaukeu gai ra lei;

¹⁶zai pepeî benai pegêu â herâtewbe bâm taihia tingbia ’mbia ’mbe timbun kaikanduibe bâm ge tua gai ra lei;

¹⁷tingkupeu ne pekan kena ze pakripat kai ra lei, kane pepum gene chaktap patzut kai mak ra lei. Zai tingkupeu ne heching peireige herâtewbe hemi bambe gene chize rû gai ra lei; chize Tingwang hangge mâ-perîmyibe, rûkambe-râtewbe, hemi gene mâ kela peipatbe de lei.