Read Zeme Naga LEBITIKAS 10 Bible Online

LEBITIKAS 10 - Zeme Naga bible

LEBITIKAS 10

¹Zai Aaronbe na Nadabbe benai Abihube hemikaibe kuak ze pe gu gu tei lu chige hemi mechingkâng kailube ge mâ-perîmyibe getup kai lu, Tingwang masuage hemi ’nchimakbe pei gai de lei, zai Mosabe ne penai je diegaimakbe tak gene penai tew de lei.

²Chidadege Tingwang masua gene hemi pat ze penai je rûchat ’ndi lei, zai Tingwang masua gene penai chai gai di de lei.

³Chidadege Mosabe ne Aaronbe je, “Aize Tingwang ne ranggaibe de lei, ‘Achu wangka’nname je â I ka’nchibe teilia gu lei, zai baudime suagene achu a ngeutew’ndi gai gu lei,’ zeu” ze kacheube zeu. Dadege Aaronbe pe kuâneu ta gai di de lei.

⁴Dadege Mosabe ne Aaronbe peu henapeu, Uzzielbe name Mishael, benai Elzaphanbe je kû lu, penai je, “Wang’nna lau, ningnui sikiname je sieki ge kakellumbeki suagene hela ’mbe teitat chu lau,” ze acheu bei de lei.

⁵Chidadege penui wang’nna lu, penui mechua kailube luî gene penui je pua lu hela ’mbe pat ti de lei, Mosabe ne ranggaibeibe luigum zeu.

⁶Zai Mosabe ne Aaronbe benai pe name Eleazarbe benai Ithamarbe je, “Ningnui peîtam peize kêura ze bam se lau, zai ningnui paî ramme hit se lau, makchai â ningnui chai gu, zai baudime ’nteumena peireige pe râtabe wangchang gu lei; kane Tingwang ne hemi ’mpat kai bei ze ningnui puiname chaidibe ziegene Israelme kiduîme leine kechai huî ze desui ze bam gu de lei.

⁷Zai kakellumbe-paîki kemui gene hela ’mbe pat se lau, ningnui chai gu lei; Tingwang gu taudui ’nnukkaibe ningnui peireige la daseu,” kacheu de lei. Chidadege Mosabe ne rangbe luigum ze penui tew de lei.

⁸Zai Tingwang ne Aaronbe je acheu rang gai ze,

⁹“Nang du zai ning name du kakellumbe-paîki ’mbe ningnui tat dezai hezau benai wain sak se lau, ningnui chai mak ra hangge zeu; ningnui dagene reheipiakeume leine tei ra betingbeta hang aize hingde rawdiakkaibe hang de lei.

¹⁰Ningnui ne ’ndaibe ze Hera gu mei, ’ndaibe ze baudime hang mei be zai herasie gene ka’nchibe benai ’nchimakbe ze piechi ra lei;

¹¹Tingwang ne Mosabe dagene penui hangge saliabe rawdiakkaibe-hingde ramme ze Israelbe chaname je ningnui ne geteilia ra lei,” ze kacheu lei.

¹²Zai Mosabe ne Aaronbe, zai pe na sâudiakkaibe Eleazarbe benai Ithamarbe je, “Tingwang hangge hemi gene kela peipatrabe, mâ-hîmra peipatrabe tei le lau, zai herâtewbe-kaira taihia gene ’nduihî kai mak ze chize ningnui teu lau; chize â ’nchilangbe daseu;

¹³Tingwang hangge hemi ge kela peipatbe â ning dam hang zai ning name dam hang changbe ziegene pebâm ka’nchibe gene ningnui teu ra lei; chigum ze tew ra I ne samdie gai de lei.

¹⁴Kane kezapkailube pegara zai pa’ngkoa peipatkailube ze pebâm ka’nchibe gene ningnui teu ra lei; zai nang benai ning name ’mpeumi ramme, zai ’mpuimi ramme nguateu ra lei; Israelbe chaname gu desieyibe-râtewbe kela peipatbe gene ning dam hang zai ning name dam hangge timchak kai ’ndi daseu,

¹⁵chi penui ne pa’ngkoa peipatkai’ndibe benai pegara kezapkai’ndibe ze Tingwang masuage kezapkaibe-râtewbe hang kezap kai ra hemi gene peipatkaibe pechâkâng ramme benai teiwang’mpam sing ra lei. Tingwang ne diegai’ndibe luigum ze nang benai ning name ne aipau dam ze â ngau bam ra de lei,” ze kacheu de lei.

¹⁶Chunage kemei ne hemui-râtewbe tak ze Mosabe ne pie’mmi ze pie gai dege, pie le lau, chize rû nan laleu de lei! Zai Eleazarbe benai Ithamarbe, Aaronbe na sâudiakkaime peireige Mosabe pe râta di ze,

¹⁷“’Ndaitew ze hemui-râtewbe meiji pebâm ka’nchibe gene ningnai teu mak lau, chize â ’nchilangbe kau ningnai ne baudime mâu pung ze Tingwang masuage penui hangge desieyibe-râtew ra ningnai je peibe kau de zeî lau?

¹⁸Pie le lau, kaurui jai pebâm ka’nchibe ge teigut kai chang me lei. Ningnai je I ne samdiegaibe luigum ze pebâm ka’nchibe gene chize ningnai teu sing ra yibe kau lei,” ze kacheu de lei.

¹⁹Chidadege, Aaronbe ne Mosabe je, “Pie le lau, nemai ge Tingwang masuage penui ne penui gu hemui-râtewbe benai rûkambe-râtewbe kela peipatbe penui pualia de lei; acheuleusedu aigumbe tâ mi kehingbe a peireige wangchang gai zeu! Nemai ge hemui-râtewbe I ne tew gai bei zai â Tingwang pe lungwângchang leu gu mei?” ze kacheu de lei.

²⁰Zai chipau sam Mosabe seu lu ze pe lungwângchang di de lei.