Read Zeme Naga LEBITIKAS 11 Bible Online

LEBITIKAS 11 - Zeme Naga bible

LEBITIKAS 11

¹Dadege Tingwang ne Mosabe benai Aaronbe je,

²“Israel chaname je salia lau, Kedeirei ge hekaubena zat leine ruage hekaune aipau zat ramme ningnui teu dui lei.

³Hekaubena ruage pa’nchînkuak kena pung ze kateletbe kau zat ji ningnui teu dui lei.

⁴Acheuleusedu pa teugaibe telat ze pa’nchînkuak pungbe ramme ruage airamme ningnui teu mak ra lei: Put-hu, aize â pahetak telat leusede pe pî’nchîn kuak pângmakbe ziegene ningnui hangge ’nchi mak lei.

⁵Zai rongpong, aize â pahetak telat leusedu pe pî’nchînkuak pângmakbe ziegene ningnui hang ’nchi mak lei.

⁶Zai rabit, aize du pa hetak telat leusedu pe pî’nchînkuak pângmakbe ziegene ningnui hang ’nchi mak lei.

⁷Zai kebak, aize â pe pî’nchînkuak kena pâng leusedu pa hetak teletmakbe ziegene ningnui hang ’nchi mak lei.

⁸Penui ji ningnui teu mak ra lei, zai penui pum chaidibe herum du ningnui deî mak ra lei; ningnui hangge chiramme ze ’nchi mak lei.

⁹“Hedui ge bambe airamme leine â ningnui teu dui lei. Sungkling ge benai ’nggeuki ge bambe pa’nrang benai pelip bambe zat leine â ningnui teu dui lei.

¹⁰Kane sungkling ge mei, ’nggeuki ge mei ze pa’nrang benai pelip gabe leine, hedui ge pedungtew ze kinruabe benai hedui ge mâ-keringbe zat bambe leine ze ningnui hangge katenatbe lei.

¹¹Chigumbe hedui kau ramme â ningnui hang katenetbe chang bam gu lei; chigumbe zat ji ningnui teu mak ra lei, zai chigumbe zat chaikezungdibe ramme du ningnui hang katenetbe chang lei.

¹²Zai hedui kau pa’nrang benai pelip gabe zat leine â ningnui hangge katenatbe lei.

¹³“Zai ’nruine ramme ruage airamme â katenetbe chang lei, zai chiramme ningnui teu mak ra lei, airamme ze katenetbe zat ramme lei: kelie, lawai, keliaruî,

¹⁴keliengdi, ’ngkauliene penui mûmzua ’ngkuairuaibe zat ramme,

¹⁵’nggek zat pehik gechâm-châmbe ramme,

¹⁶ostrikruî, kelienggûmpui, sungklingruî

¹⁷hebie, dui’nggek, bielong,

¹⁸duiruî, duidepam,

¹⁹teluâk, setieruî pezat cham-châmbe, langpuângruî, zai heliam.

²⁰“Mâ-kâupui ramme bekan pung ze pe pî medai bambe zat leine â ningnui hangge katenatbe lei.

²¹Acheuleusedu mâkâupui ramme pekan pung ze pe pî medai ne tatbe zat kedei gene ’nsak ra pa’nsak pungbe kau zat ramme â ningnui teu dui lei.

²²Airamme ningnui teu dui lei: tebeine zat leine, zai gechîng zat leine zai tîngkau zat leine zeu.

²³Kane pekan bam zai pe pî medai bam ze buaruabe zat leine â ningnui hangge katenetbe lei.

²⁴“Zai airamme gene ningnui hebâ gai du lei; mi-mige de herum deîme leine â hegî chang ze ’nchimakbe chang lei,

²⁵zai mi-mige de herum meijikâng pungbe kau â pe paîni geta ra zai hegî ting riâ chang ze pa ’nchi mak bam gu lei.

²⁶Hekaubena pe pî’nchînkuak kena pung ze pe pî’nchîn helua mak leusedu pa hetak teletmakbe kau â ningnui hangge ’nchimakbe chang lei; chiramme deîme leine â ’nchimakbe chang kam lei.

²⁷Hekaubena ruage pe pîkêrang pung ze pe pî medai ne tatbe leine â ningnui hangge ’nchimakbe chang lei; zai chipau ramme gu herum deîtaugaime leine â hegî chang ze ’nchimakbe chang lei,

²⁸zai chi herummei-kâng kuaipeu ze pe paîni geta ra lei, zai hegî chang ze pa â ’nchi mak ze bam gu lei; ningnui hangge chiramme ’nchimakbe lei.

²⁹“Kedei ge bua ze tatbe zat ruage airamme ningnui hangge ’nchimakbe lei: henâm, heza’nsiêbe, heza zai kîremun zat leine,

³⁰kâkkie, himloa teriema, kûluibe, zai henêu’ngkune, zai timpuângriêng.

³¹Bua ze tatbe zat leine ruage airamme ningnui hang ’nchimakbe chang lei; mi-mige de chiramme chaidibe deîme â hegî chang ze penui ’nchi mak bam gu lei.

³²Chi mâkâupui chaidibe keugaibe bâm, merua teibe zat heching ge mei nune paî ge mei, hemeigei ge mei, chiaka ge mei lêuzaidu kahebâbe chang lei; hedui ge chize sûm gai sing ne ra lei, zai hegî chang ze ’nchi mak bam gu lei; chipau châng dezai ’nchi du lei.

³³Chiramme chaidibe ruage kat zene hegamli peireige keu gai dizai â pelung ge bambe leine hebâ kam de lei, chipau heli ze nang tewpâng ra lei.

³⁴Zai mâ-mâ teurabe merua zat leine ge chipau dui tewtera gai ’ndizai â chize hebâ gai du de lei; zai chipau bung ge sakrabe zai mâ-mâ sakduibe leine ge chipau dui tewtera gai ’ndizai â hebâ kam gai du de lei.

³⁵Zai mâ-mâ zat leine peireige chi mâkâupui chaidibe keu gai zai â chiramme leine hebâ gai du de lei; ’mmang mei mâkuak mei chiramme tewpâng kam ne ra lei; chize hebâ de lei, zai ningnui hangge chize hebâ gai du de lei.

³⁶Acheuleusedu dekuaki mei nune heduibung ge mei ze hedui kaika’nduibe â ’nchi gu lei, kane mâkâupui chaidibe deîtaube leine â kahebâbe chang de lei.

³⁷Mâ-mâ lingrabe helei peireige mâkâupui chaidibe keu gai leusedu chize â ’nchi lei;

³⁸kane mâ-helei hedui gene duilube chângge mâkâupui chaidibe chige keu gai dizai â ningnui hang chize hebâ gai de lei.

³⁹“Hekaune peji teube kau zat leusedu chi chaidibe dei-deîbe kau â hegî chang ze hebâ gai du de lei,

⁴⁰zai chi chaidibe ji teube kau â pe paîni geta ra lei, zai pa hegî chang ze hebâ gai du de lei; chi chaidibe teube kau ze du pe paîni geta ra lei, zai hegî chang ze hebâ gai du de lei.

⁴¹“Mâ-mâ buaruabe zat â ningnui hangge katenetbe chang lei; chize â teu mak ra lei.

⁴²Mâ-pui ramme pe ga ne lia ze tatruabe zai pe pî medai pungbe kau mei nune pe pî misongga pungbe kau mei kedei ge bua ze tatruabe zat â ningnui teu mak ra lei; chiramme â katenetbe chang daseu.

⁴³Kedei ge bua ze tatbe leine ningnui hangge katenetbe chang lei; chiramme gene ningnui runne ningnui je tewhebâ gai se lau; makchai â ningnui hebâ gai du lei.

⁴⁴I â Tingwang ningnui Rapeu lei; chidaze ningnui runne ningnui je tew’nchi ze bam lau, zai ningnui ’nchi ze bam lau, I â ka’nchi daseu. Kedeirei ge bua ze tatbe zat mâkâupui dagene ningnui runne ningnui je tewhebâ gai se lau.

⁴⁵Ningnui Rapeu changrabe hangge Ijipram gene I ne ningnui je nguapat kai bei daseu; chidaze ningnui ’nchi ze bam ra lei. I â ka’nchi daseu,” ze kacheu de lei.

⁴⁶Aize hekaune benai ’nruine, zai mârekaune hedui ge bambe zat leine zai kedei ge bua ze tatruabe kau zat leine ’nchui hangge hingde de lei,

⁴⁷ka’nchibe benai ’nchimakbe kelângchi ra zai mârekaune ji teuduibe benai teulakbe kelângchi ra hangge zeu.