Read Zeme Naga LEBITIKAS 12 Bible Online

LEBITIKAS 12 - Zeme Naga bible

LEBITIKAS 12

¹Tingwang ne Mosabe je,

²“Israelbe chaname je salia be lau, ’mpuimi mige ’mpung ze pe na ’mpeumi lungkeu dezai hezie senane pa hebâ gai du lei; zai chi runne mak ze ’mpuimi pe nîsiabe ting ge pa hebâ gai du lei;

³zai hezie padesatbe mai ge ’ngngiêne je rumgeten gai ra lei.

⁴Chidezai pa kahejaibe ze hezie himreu ze kechum teleu’nchi ze bam gu lei; mâ-reibe ’ntakkak ze kam mak tâne mâ-ka’nchibe leine pa deî mak ra lei, zai pebâm ka’nchibe ge du pa gut mak ra lei.

⁵Kane pa ne ’mpuimi napoine lungkeu dizai â, ’ntakkak kena pa hebâ ze bam gu lei, pe nîsiabe ting gu gum zeu; chidezai pa kahejaibe ze hezie riakseruk ze seruk teleu’nchi ze bam gu lei.

⁶“Pa ne ’ngngiêne ’mpuimi mei, ’mpeumi mei je lung lu pa mâ-reibe ting kam dezai, rûkambe-râtewbe hangge melipoine kum kat zai hemui-râtewbe hangge depeine poine mei nune temaune mei ze ka’nduibe-paîki kemui ge tingkupeu dage pa teiwang gai ra lei,

⁷dezai Tingwang masuage tingkupeu ne pualiâ ra lei, zai pe hangge desieyibe-râtewbe peipat kai ra lei; chidezai pa kahejaibe gene ’nchi du de lei. Aize ’mpeumi mei ’mpuimi mei je lungkeupui hang hingde de lei.

⁸Zai pa ne melipoine pei ra ga zai â temaune kena mei nu depeine poine kena mei ze teiwang ra lei, chi kat ze rûkambe-râtewbe hang zai pakenabe ze hemui-râtewrabe hangge zeu; chidezai tingkupeu ne desieyibe-râtewbe pe hangge tew gai ra lei, chidezai pa ’nchi du de lei,” ze kacheu de lei.