Read Zeme Naga LEBITIKAS 13 Bible Online

LEBITIKAS 13 - Zeme Naga bible

LEBITIKAS 13

²“Ziemmena mige pe pum ge suppat mei, nune teutitpat mei, nune bekiê pat mei be ge chize ne pe pum ge kaperiebe rarît hang ’ndetpat dai dezai tingkupeu, Aaronbe dage mei pe name tingkume ruage hangkat dage mei ze pechu nguawang gai ra lei,

³dezai tingkupeu zene pe pum ge herarît pungbe ze pie gai ra lei; zai hejâm chui ge pegêu ze hâpat ti, zai chi hejâm ze pechie lung gut’nzû di laleu dizai â chize ka’mpabe rarît te lei; tingkupeu ne chize pie gai lu dezai chipau peu ze â ’nchi mak lei be rangpat kai ra de lei.

⁴Kane chi bekiê ze pe pum ge hâ laleu, zai chi pegei lung gut’nzû mak, zai chige pegêu ze hâ mak laleu dizai â, tingkupeu ne ka’nrâpeu je hezie sena riâ gang gai ra lei;

⁵dezai hezie pasenabe mai ge tingkupeu ne pechu pie gai ra lei, zai pe mik ne herarît ze pie gai ze, pe pum ge ratat mak laleu rei zai â tingkupeu ne pechu hezie sena riâ gang gai suâ dai ra lei;

⁶dezai tingkupeu ne hezie pasenabe mai ge pechu pie gai dai ra lei, zai hejâm ze hâmmuî laleu ze pegei ge kêdadabe ge latat sua mak laleu zai â, tingkupeu ne pechu ’nchi lei be rangpat kai ra lei; chize â heteu (teuteriêne) patbe runne kau lei; zai pa pe paîni geta lu ’nchichiak bam ra lei.

⁷Kane chi heteudibe ze pechu tew’nchi gai ra tingkupeu je pa teiliagailube chângge titpat ze pegei ge deîtau gai kam dizai â tingkupeu je pa teilia gai dai ra lei;

⁸dezai tingkupeu ne pie’mmizun pie gai ra lei; zai chi heteu ze pegei teutitpat kam laleu zai â, tingkupeu ne pechu ’nchi mak lei be rangpat kai ra lei; chize ka’mpabe rarît te lei.

⁹“Ziemmena je ka’mpabe rarît ne deîhereu dezai, pechu tingkupeu dage nguawang gai ra lei;

¹⁰dezai tingkupeu ne pechu pie gai ra lei, zai chize tingnga sungpat ze pegêu ’nsangdu hâ bam di, zai chi gepumbe ze teutelaipat tizai aî,

¹¹chize pe pum ge kaperiebe rarît ze gut’nchuktibe kau de lei, zai tingkupeu ne pechu ’nchi mak lei be rangpat kai ra lei; pechu pa ne kaichâm bam mak ra lei, pa â ’nchitadibe kau de lei be chî’nchichiaktibe kau daseu.

¹²Zai kaperiebe ze pe pum ge rapat kam di ze kaperiebe ze pe peî gene rakeu ze pe pî riâ bam kam di ze tingkupeu ne du ngaupatchikâ di laleu zai â,

¹³tingkupeu ne pie gai ra lei, zai kaperiebe ne pe pum luî hâtuipik laleu dizai â pa ne pechu herarît ze yi’nchi de lei be rangpat kai ra lei; chize pelane hâ kam di de lei, zai pa â ’nchi de lei.

¹⁴Kane pe dage mâ-teukatelaibe bambe ge â pa ze ’nchi ra mak lei.

¹⁵Dezai tingkupeu ne mâ teukatelaibe bambe ze pie gai ra lei, dezai pa ze ’nchi mak lei be rangpat kai ra lei; mâ-teukatelaibe ze â ’nchimakbe kau lei, chize â kaperiebe rarît ti dadegeu.

¹⁶Kane chi mâ-teukatelaibe ze yiwang dai ze bekiê ze hâ bam dizai â tingkupeu dage pa zuamie ra lei,

¹⁷zai tingkupeu ne pechu pie gai ra lei, zai chi teubekiê ze hâ bam dizai â tingkupeu ne chi ka’nrâpeu je ’nchi de lei be rangpat kai ra lei; pa â ’nchi di de lei.

¹⁸“Zai mi hangkat pum ge heteu ze teleu’mmî gai bei,

¹⁹zai chi heteupatbe bâm ge hâ ze pumpat mei nu hâgieria ze mei bam lêuzai â chize tingkupeu suage teilia gai ra lei;

²⁰dezai tingkupeu ne pie gai ra lei, zai chize pegei lungge gut’nzû di, zai pegêu ze hâ bam laleu dizai â tingkupeu ne pa ’nchimak lei be rangpat kai ra lei; chize â kaperiebe rarît te lei, chize â heteu gene pat lei.

²¹Kane tingkupeu ne pie gai ze chige pegêu hâpat mak, zai pegei lung du gut’nzû mak, kane tikria-ria bam dizai â tingkupeu ne pechu gang gai lu hezie sena riâ bam gai ra lei;

²²zai chize pie gai ze ratat kam dizai â tingkupeu ne pechu ’nchimakbe hangge rangpat kai ra lei; chize â herarît bamdibe kau de lei.

²³Kane chi geteube jâm ze ratat sua mak ze teube chui gene teu bam dizai â chize â geteube kiê de lei; zai tingkupeu ne pa â ’nchi lei be rangpat kai ra lei.

²⁴“Chize mak zai du, ziemmena pum ge hemi ne rû bei ze teuluapinpatbe bekiê hâgieria ze mei, hâ ze mei, pat ti dezai,

²⁵tingkupeu ne pie gai ra lei, zai chi pe jâm ge pegêu hâpat mei zai pegei lung gut’nchuk ti laleu mei zai â chize kaperiebe rarît te lei; chize hemi ne rube gene patbe kau de lei, zai tingkupeu ne pechu ’nchi mak lei be rangpat kai ra lei; chize â kaperiebe rarît te lei.

²⁶Kane tingkupeu ne pie gai ze hejâm ge pegêu hâpat mak, zai pegei lung du gut’nzû mak kane tikria-ria bam dizai â tingkupeu ne hezie sena riâ pechu gang gai ra lei,

²⁷zai hezie pasenabe mai ge tingkupeu ne pechu pie gai ra lei; chize pegei ramme ge ratat kam dizai â tingkupeu ne pechu ’nchimakbe hangge rangpat kai ra lei; chize â kaperiebe rarît te lei.

²⁸Kane chi geteube jâm ze pegei ge ratat sua mak ze teube chui gene teu bam kane tikria-ria bam dizai â chize â hemi ne rube gene suppatbe kau de lei, zai tingkupeu ne pechu ’nchi lei be rangpat kai ra lei; chize â hemi ne rube jâm daseu.

²⁹“’Mpeumi lêuzai ’mpuimi lêuzai mige pa telie ge mei pa dekang ge mei, teu ze hîm-hîmbe pat dezai,

³⁰tingkupeu ne chi geteube ze pie gai ra lei; zai chize pegei lung gut’nzû di, zai chige pegêu ze ’nzindi gai lu kecheî-cheî ze nuai laleu dizai â, tingkupeu ne pechu ’nchimakbe hangge rangpat kai ra lei; chize â ka’nchakbe patbe kau lei, mi telie benai mi dekang gu kaperiebe de lei.

³¹Zai tingkupeu ne ka’nchakbe rarît patbe pie gai ze, chize pegei lung gut’nzû mak, zai chige pegêu tikbe ’ngga lêu zai â tingkupeu ne ka’nchakbe rarîtpatpeu je hezie sena riâ gang gai ra lei,

³²zai hezie pasenabe mai ge tingkupeu ne chi ka’nchakbe patbe ze pie gai ra lei; zai chi pe gei ge ka’nchakbe ze hela latat sua mak, zai chige ’nzindibe pegêu ’ngga zai chi ka’nchakbe ze pegei lung gut’nzû mak laleu zai â,

³³pe runne pe tam ze guttua ra lei, kane ka’nchakbe ze â pa guttâu gai mak ra lei; zai tingkupeu ne ka’nchakbe patpeu je hezie sena riâ gang gai sua ra lei;

³⁴zai hezie pasenabe mai ge tingkupeu ne ka’nchakbe rarît ze pie gai ra lei, zai chi ka’nchakbe ze pegei ge latat kai mak, zai pegei lung gut’nzû mak laleu zai â tingkupeu ne pechu ’nchi lei be rangpat kai ra lei; zai pa pe paîni geta lu ’nchichiak ze bam ra lei.

³⁵Kane pechu tew’nchigailube chângge ka’nchakbe pe pum ge la gai kam dizai â

³⁶tingkupeu ne pechu pie gai ra lei, zai chi ka’nchakbe ze pe pum ge la gai kam dizai â tingkupeu ne hetamkie ka’nzinbe peu ra ’nnang ta de lei; pa â ’nchimakbe kau de lei.

³⁷Kane pa ne piegaibe ge ka’nchakbe ze mâ du mak tizai â zai chige hetam tikbe puakpat ti zai â ka’nchakbe ze â yi di de lei, pa â ’nchi de lei; zai tingkupeu ne pechu ’nchi di de lei be rangpat kai ra lei.

³⁸“’Mpeumi lêuzai, ’mpuimi lêuzai mige pe pum ge makiê hâbe ramme pung dezai,

³⁹tingkupeu ne pie zun pie gai ra lei, pe pum ge mâ-kehâbe kiê ramme patbe ze hâria-riabe runne dizai â chize â ’ntane pe pum ge patbe ramme lei.

⁴⁰“’Mpeumi mige pe peîtam keî kamdibe kau â pe peikuakbe kau lei, pa â ’nchi lei.

⁴¹Zai ’mpeumi mige pa telie benai pe peî’nning ge hetam keîtatkamdibe kau â pebuanggiebe kau lei, kane pa â ’nchi lei.

⁴²Kane pe peikuakbe ge mei nune pebuanggiebe ge mei ze giehâria-riabe kiê ramme bam dizai â, chize pebuang ge mei nune pe peîkuakbe ge mei ka’mpabe patbe kau de lei.

⁴³Chidezai tingkupeu ne pechu pie gai ra lei, zai pe buanggiebe ge mei nune pe peîkuakbe ge mei pumdup-dup patbe ge giehâria-riabe kiê ramme ze, ka’mpapeu dage bambe gumbe laleu zai â

⁴⁴pa â ka’mpapeu de lei, pa â ’nchi mak lei; tingkupeu ne pechu ’nchi mak lei be rangpat kai sing ra lei; pe gu pe rarît ze â pe peî ge la de lei.

⁴⁵“Ka’mpapeu ka’mpabe rarît pungpeu â chak-chakrinbe paîni ramme ne kai ze bâ ra lei, zai pe peîtam du peize zâura ze bam ra lei, zai pe mui ’nreibe muitaikuâng keba lu, ‘’Nchimakbe kau, ’nchimakbe kau,’ acheu ze pe ran-gechi ’nrungrua ra lei.

⁴⁶Pa ne chipau rarît pe dage pung tâne â pa â kahebâpeu chang ze bam ra de lei; pa â ’nchi mak lei; keloa gene hela ’mbe pe runne pe zeu peu lu pa bam de ra lei.

⁴⁷“Mâ-gêupaî ge lêuzai, beta niangbe paî ge lêuzai,

⁴⁸paî niang-niangbe beta ’ndîngta ge lêuzai, ’mpita ge lêuzai, zai hemeigei ge lêuzai, mâ-mâ hemeigei ne tewbe ge lêuzai chiramme ge ka’mpabe rarît rai deitâu gai dezai

⁴⁹paî ’ndîngta ge mei, ’mpita ge mei nune hemeigei ge mei, mâ-mâ hemeigei ne tewbe ge mei chipau rarît ze ’nzinria-ria ze mei nune gieria ze mei be bam laleu zaine â chize â kaperiebe rarît te lei, zai tingkupeu suage teilia ra lei.

⁵⁰Chidezai tingkupeu ne chize pie gai ra lei, zai chi herarît bambe hangge hezie sena riâ pa ne pebâm kaichâm gai ra lei;

⁵¹chidezai hezie pasenabe mai ge pa ne pechu pie gai ra lei. Paî ’ndîngta ge mei, ’mpita ge mei, nune hemeigei ge mei, hemeigei ne tew lu teibe merua zat leine ge mei herarît la gai ’ndizai â chipau herarît ze â mi hing-kadesangbe ka’mpabe rarît te lei; chize â ’nchi mak lei.

⁵²Daze chi herarît ze paî ’ndîngta ge mei, ’mpita ge mei, zai mâ-gêu ge mei nu beta niangbe ge mei, zai hemeigei ne teleu lu teibe merua zat leine ge mei ze la gai ’ndizai â paî ze pa rû ne ra lei, chize â mi kehingbe ka’mpabe rarît ti daseu; chize hemi ge rû gai ne ra lei.

⁵³“Zai tingkupeu ne pie gai ze paî ’ndîngta ge mei ’mpita ge mei herarît ze la gai mak tizai â

⁵⁴herarît mâ-mâ ge lagai’ndibe ramme ze â hedui ne geta-tua ra penui je tingkupeu ne die gai ra lei, zai hezie sena pa ne gang gai dai sua ra lei;

⁵⁵zai chize geta’nchilube chângge tingkupeu ne herarît kesiabe piegai’mmi ra lei. Zai perai ze pegeî keli sua makchai â herarît ze hela ge latat mak bam sedu chize â ’nchi mak lei; herarît rai ze hesua’mbia mei hechai ’mbia mei ge bam lêuzaidu chize nang hemi ge rû gai ne ra lei.

⁵⁶“Kane tingkupeu ne pie gai ze chize getalube chângge paî ge mei, hemeigei ge mei zai ’ndîngta benai ’mpita ge mei herarît rai bamdibe chui ze â hittua ra lei;

⁵⁷chipau chângge paî ge mei, ’ndîngta ge mei, ’mpita ge mei zai hemeigei, mâ-mâ ge peraipat dai la lêuzai â herarît rai lagai’ndibe zat ze â nang hemi ge rû gai ne ra lei.

⁵⁸Kane paî ’ndîngta, ’mpita zai hemeigei ze nang ne getagaibeibe chângge herarît rai ramme tattibe ze pakenabe luakat geta gai dai ra lei, chidezai â ’nchi du de lei,” kacheu de lei.

⁵⁹Aize ka’mpabe rarît paî ’ndîngta ge mei ’mpita ge mei zai hemeigei ne mâ-mâ kateleube merua ge mei bamdibe ge ’nchimakbe benai ka’nchibe pierabe hingde de lei.