Read Zeme Naga LEBITIKAS 14 Bible Online

LEBITIKAS 14 - Zeme Naga bible

LEBITIKAS 14

²“Aize ne ka’mpabe kau je tew’nchigairabe mai hangge hingde chang ra lei. Tingkupeu taige pechu nguawang gai ra lei;

³zai tingkupeu ze kerie gene hela zuapat lu ze, tingkupeu ne pie gai ra lei. Dezai chi herarît ze yi dizai â

⁴tingkupeu chi tew’nchigairapeu je ’nruipoine ka’nchibe kau kena zai kedarching, zai tologielang benai hissop pe hangge teiwang ra penui je rang gai ralei;

⁵zai tingkupeu ne ’nruipoine kat hegamli hedui pui’nniâmbapatbe ge gîchat kai ra penui je samdie gai ra lei.

⁶Chidezai pa ne ’nruipoine keringbe ze hedui ’nniâmbabe gene tewchatkaibe ’nruipoine jai ge kedarchingbang keî, paîrie giebe, zai hissop airamme tei’mpam lu ze chige sûm gai ra lei;

⁷dezai ka’mpabe gene tew’nchigairabe peireige pa ne lua sena kezin gai ra lei; dezai pa ne pechu ’nchi de lei, ze sam rang gai ra lei, dezai ’nruipoine keringbe je â ’nduloa ’mbe tat ra ’mpat kai ra lei.

⁸Zai chi tew’nchigairabe ze pe paîni geta ra zai pe tam chiaptua kam lu ze pe runne heduipia ra lei, dezai pa ze ’nchi du lei; chipau châng dezai pa ze sieki lungge zuagut ra lei, kane hezie sena â pe gu hetiamki ge bam mak ra lei.

⁹Zai hezie pasenabe mai ge pa pe peî ge pe tam leine chiaptua ra lei; pe muimai, pe mikmekaigêu, pe gêu leine guttua kam ra lei. Chidezai pe paîni ramme pa geta ra lei, zai hedui ne pe pum pia lu dezai pa ’nchi du de lei.

¹⁰“Hezie padesatbe mai ge meli’nsei kena benai melipui kum kat kau heziâkgabe, dekuî yibe taudui ne keneilube hit chum zai olib taudui log kat teiwang ra lei.

¹¹Zai tingkupeu pechu tewka’nchipeu ne kakellumbe-paîki kemui ge, Tingwang suage tew’nchigairabe benai aipau merua ramme ze kai ra lei.

¹²Zai tingkupeu ne meli’nseipoine kat tei lu ze kemaube-râtewbe hangge peipat kai ra lei, chige taudui ’ndet kat benai tei lu ze kakezapbe-râtewbe hangge Tingwang dage kezap kai ra lei;

¹³zai pa ne melipoine ze penui hemui-râtewbe benai rûkambe-râtewbe ge tewchatkaibe bâm, pebâm ka’nchibe ge tewchat kai ra lei; hemui-râtewbe gu gum ze kemaube-râtewbe ze tingkupeu hangge chang lei; chize â ’nchilangbe de lei.

¹⁴Tingkupeu ne kemaube-râtewbe gu hejai gêsa bua lu ze, tingkupeu ne tew’nchigairabe hezat’mbia kuntû ge kai ra lei, chigum ze hezat’mbia ba ’njûngpui ge benai hezat’mbia pî ’njûngpui ge kai ra lei.

¹⁵Chidezai tingkupeu ne taudui gêsa lu lu ze pa heku’mbia bakuî ge ruî gai lu,

¹⁶pa heku’mbia ba ge taudui bambe ge hezat’mbia bakêrang sûmgailube zene Tingwang masuage lua sena pe bakêrang ge taudui bambe ze kezin gai ra lei.

¹⁷Zai taudui gêsa pe ba ge ka’nnaibe ze tew’nchigairapeu hezat’mbia kuntû ge zai hezat’mbia ba ’njûngpui ge zai hezat’mbia pî ’njûngpui ge kai ra lei, kemaube-râtewbe gu hejai kai’ndibe peireige zeu;

¹⁸zai taudui ’nsakpatbe tingkupeu ba ge bambe leine pa ne tew’nchigairapeu peireige kai ra lei. Chidezai tingkupeu ne Tingwang masuage pe hangge kelunbe-râtewbe pei gai ra lei.

¹⁹Pa kahebâbe gene tew’mmigairapeu hangge kelunbe-râtewbe tew gai ra hangge tingkupeu ne hemui-râtewbe peipat kai ra lei. Zai chipau châng dezai rûkambe-râtewbe gu kaurui ze tewchat ra lei;

²⁰zai tingkupeu ne herâtewbe-kaira ge rûkambe-râtewbe benai mâ-himlei-râtewbe peipat kai ra lei. Chigum ze tingkupeu ne desieyibe-râtewbe pe hangge tew gai ra lei, dezai pa ze ’nchi du de lei.

²¹“Kane pa kelaksia ze misongga peipatchi lak zai â, pe hangge kelunbe-râtew gai ra hangge kemaube-râtewbe hang kezap kai ra meli’nseipoine kat pa tei ra lei, zai mâ-himlei-râtewbe hang taudui kebutlube dekuî yibe ephah kat gu tûm kereu ge tûm kat zai taudui kuak kat tei ra lei;

²²zaine depeine kena mei temaune kena mei pa ne peipatduî-duîbe riâ ge teiwang ra lei; kat zene hemui-râtewbe hang zai kêdabe kat zene rûkambe-râtewbe hang de lei.

²³Zai hezie padesatbe mai ge chiramme ze pechu tew’nchi gai ra hangge tingkupeu dage kakellumbe-paîki kemui ge Tingwang masuage ka’nduibe-paîki kemui ge teiwang gai ra lei;

²⁴zai tingkupeu ne kemaube-râtewbe gu melipoine, zai taudui kuak tei lu tingkupeu ne chiramme ze Tingwang masuage kakezapbe-râtewbe hang kezap kai ra lei.

²⁵Zai tingkupeu ne kemaube-râtewbe gu melipoine gîchat kai ra lei; zai tingkupeu ne kemaube ra tewbe gu hejai gêsa lu lu ze tew’nchi gai ra pa hezat’mbia kuntû ge zai hezat’mbia ba ’njûngpui ge zai hezat’mbia pî ’njûngpui ge kai ra lei.

²⁶Zai tingkupeu ne pa heku’mbia bakuî ge taudui gêsa ruî gai ra lei;

²⁷zai heku’mbia ge taudui bambe gêsa ze hezat’mbia bakêrang ne lua sena Tingwang suage kezin gai ra lei;

²⁸zai tingkupeu ne taudui pe ba ge gêsa bambe ze tew’nchigairapeu hezat’mbia kuntû ge, hezat’mbia ’njûngpui ge, hezat’mbia pî ’njûngpui peireige kemaube-râtewbe gu hejai kaibe bâm ge kai ra lei;

²⁹zai tingkupeu ba ge hejai ’nsakpatbe leine ze pa ne tew’nchigairapeu peî ge kai ra lei, Tingwang masuage pe hangge kelunbe-râtewbe tew gai ra hangge zeu.

³⁰Zai depeinepoine mei temaune mei ruage kat zene pa ne peipatduî-duîbe tak gene peipat kai ra lei,

³¹kat ze hemui-râtewbe hang zai kêdabe kat zene kemaube-râtewbe hang zai chize mâ-hîmra peipatbe-râtewbe ge peipat’mpam gai ra lei; zai tingkupeu ne tew’nchigai’ndipeu hangge kelunbe-râtewbe Tingwang masuage tew gai ra lei.

³²Aize ka’mpabe rarît bampeu, pechu tew’nchigaibe lurabe hangge mâ-mâ peipat ra changlakpeu hangge hingde de lei,” ze kacheu de lei.

³³Tingwang ne Mosabe benai Aaronbe je,

³⁴“Ningnai ram hang I peigaibe Kanaanram ge ningnai wang dezai zai ningnai ram dei lungge kelakki ge ka’mpabe rarît I kai dezai,

³⁵heki ge besuitewpeu â wang lu ze tingkupeu je, ‘A ki ge herarît kesiabe zat bambe helî gum tai lei,’ ze acheu ze salia gai ra lei.

³⁶Dezai tingkupeu ne herarît ze pie ra tatrabe suage pa ne heki ze tew’nrua gai ra penui je samdie gai ra lei, peize kilûng ge bamme leine je kahebâbe kau hangge saba gai mak ra hangge zeu; zai chipau châng dezai tingkupeu ne heki ze pie ra tat ra lei.

³⁷Dezai herarît ze pa pie gai ra lei; zai herarît ze heki ’mbie ramme ge peraimiê ramme ’nzairia ze mei gieria ze mei bam dizai â zai kêdabe chui ge sua â pekuîchukdukbe ngaupat tizai â

³⁸tingkupeu ne heki gene hela zuapat lu ze, heki kemui ze hezie sena hangge kainam gai ’nde ra lei.

³⁹Dezai hezie pasenabe mai ge tingkupeu wang dai lu ze pie gai ra lei; zai herarît ze heki ’mbie ge rarip laleu dizai â

⁴⁰tingkupeu ne tingchukâng herarît bambe ramme ze kedeîpat lu ze namdi gene hela ’mbe ’nchimakbe bâm ge tua gai ’nde ra samdie gai ra lei;

⁴¹zai pa ne heki ’mbie ze chiamguatuipik kai ra rang gai ra lei, zai helalim gutpatlube ramme ze ’nchimakbe bâm namdi ’mbe suktua ne ra lei;

⁴²dezai tingchukâng kêdabe ramme tei lu ze chi tingchukâng bâm ramme ge penui kai ra lei, zai kêdabe keniakrabe lu lu ze heki ze pa keniak dai ra lei.

⁴³“Tingchukâng ramme pa ne lupat nan dezai heki ze chiam lu keniakdailube châng ne chipau ki ge herarît kesiabe rai ze pat dai lêuzai â

⁴⁴tingkupeu ne tat ze pie ra lei; zai herarît ze kilûng ge ratat tizaine â sia-kadesangbe ka’mpabe rarît rai kilûng ge bam de lei; chize â ’nchimakbe lei.

⁴⁵Zai heki tingchukâng ramme, zai heki’ngra ramme, zai heki keniakkailube ramme pa rakeu ne ra lei; zai namdi gene hela ’mbe ’nchimakbe bâm ge pa ne pungtua gai ne ra lei.

⁴⁶Chirunne makse mi-mige du heki kainamgai’ndibe luagene gutbe kau â hegî ting riâ chang ze hebâ gai du lei;

⁴⁷zai mige chi heki ge jeikaugaibe kau â pe paîni ramme geta ne ra lei; zai mige chi heki gene mâ teube kau â pe paîni geta ne ra lei.

⁴⁸“Kane tingkupeu ne wang lu ze piegetîng gai ze heki ze keniakdailube châng heki ge herarît rai rapat dai makchai â tingkupeu ne heki ze ’nchi de lei be sam rangba gai ra lei, herarît ze tew’mmi gai bei daseu.

⁴⁹Zai heki ze tew’nchigaibe hangge ’nruipoine kena kedarching benai ’ntologielang-kît zai hissop pa ne tei lu,

⁵⁰’nruipoine kat hegamli hedui li pui’nniâmbabe gene pa chize tewchat kai ra lei,

⁵¹zai kedarching zai hissop zai ’ntologielang-kît benai ’nruipoine keringbe tei lu, chiramme ze gîchatkaindibe ’nruipoine jai chi hedui pui’nniâmbabe ge sûm gai ra lei, zai heki ge lua sena kezin gai ra lei.

⁵²Aigum ze ’nruipoine jai benai hedui pui’nniâmbabe zai ’nruipoine keringbe benai kedarching zai hissop benai ’ntologielang-kît ne pa heki ze tew’nchi ra lei;

⁵³zai ’nruipoine keringbe je namdi gene ’nduloa ’mbe peize tat ra pei gai ra lei, dezai chipau ki hangge kelunbe-râtew gai ra lei, dezai chize ’nchi du de lei,” ze kacheu de lei.

⁵⁴Aipau ze ka’mpabe rarît zat leine hangge hingde de lei: ka’nchakbe hang,

⁵⁵paîni ge benai heki ge ka’mpabe bambe hang,

⁵⁶zai sungpatbe hang, makchai teupakpatbe hang, makchai bekiê bambe hang,

⁵⁷’nchimakbe mei ’nchidibe mei be teilia ra hangge zeu. Aize ka’mpame hangge hingde lei.