Read Zeme Naga LEBITIKAS 15 Bible Online

LEBITIKAS 15 - Zeme Naga bible

LEBITIKAS 15

¹Tingwang ne Mosabe benai Aaronbe je rang gai ze,

²“Israelme je salia gai lau, ’Mpeumi mige â pe pum gene pe gu kahebâbe patbe bam dezai chize kahebâbe chang lei.

³Zai aipau ze pe gu kahebâbe patbe hangge hingde de lei: pe pum ge pe gu patbe ze pe runne lua bam di mei, nune pat ta di de mei leusedu pe dage ’nchimakbe la lei.

⁴Mige pe gu kahebâbe patpeu ne jeigaibe jeî leine â kahebâbe chang de lei; zai pa ’ntaugaibe leine ge du hebâ gai du lei.

⁵Zai mi-mige pe jeî deîtaube kau â pe paîni geta ne ra lei, zai hedui ne pe pum pia ne ra lei, zai hegî ting riâ chang ze ’nchi mak bam gu lei.

⁶Zai mi-mige de kahebâpeu ne mâ-mâ ge ’ntaugai’ndibe ge ’ntau gai dizai â pa pe paîni geta ne ra lei, zai hedui gene pe runne piatua ne ra lei, zai hegî riâ chang mak tâne ’nchi mak bam gu lei.

⁷Zai mi-mige kahebâpeu pum ze deîtau gai ’ndizai â pe paîni geta ne ra lei, zai hedui ne pe runne piatua ne ra lei, zai hegî ting chang mak tâne ’nchi mak bam gu lei.

⁸Zai kahebâpeu ne mige ka’nchipeu dage ’nchai’ntui gai ’ndizai â pa ze pe paîni geta ne ra lei, zai pe runne hedui gene piatua ne ra lei, zai hegî ting riâ chang mak tâne ’nchi mak bam gu lei.

⁹Zai kahebâpeu ka’ntaube hemeigei bâm ze â ’nchi mak bam gu lei.

¹⁰Zai mi-mige pe dage bambe leine deîtaube kau â hegî ting riâ chang mak tâne ’nchi mak bam gu lei; zai mige aigumbe merua kat tei dizai â pe paîni geta ne ra lei, zai pe runne hedui gene piatua ne ra lei, zai hegî ting riâ chang mak tâne ’nchi mak bam gu lei.

¹¹Mige kahebâpeu ne pe ba hedui ne hui mak ze deîtaugaibeipeu ze â pe paîni geta ne ra lei, zai hegî ting riâ chang mak tâne ’nchi mak bam gu lei.

¹²Zai kahebâpeu ne hegamli deîtau ’ndizai â tewpâng ne ra lei; zai hechingkuak leine hedui ne hui ne ra lei.

¹³“Zai kahebâpeu je pe gu kahebâbe gene ’nchi di dezai pechu tew’nchi gai ra hezie sena riâ pa bamkuâ gai ra lei, chidezai pe paîni ramme geta ra lei; zai hedui luaka’nnîambe gene pe pum pia ra lei, dezai ’nchi du de lei.

¹⁴Zai hezie padesatbe mai dezai temaune kena mei depeinepoine kena mei tei lu kakellumbe-paîki kemuiki ge Tingwang masuage wang gai ra lei, zai chiramme ze tingkupeu dage pei gai ra lei;

¹⁵zai tingkupeu ne chibe kena ze peipat kai ra lei, kat ze hemui-râtewbe hang zai kêdabe kat zene rûkambe-râtewbe hangge zeu; zai tingkupeu ne pa kahebâbe patbe hangge kelunbe-râtewbe Tingwang masuage pe hang tew gai ra lei.

¹⁶“Zai ’mpeumi mige pe gu pa heleidui patbe bam dizai â pe pum pelane pa hedui ne pia ne ra lei, zai hegî ting riâ chang ze ’nchi mak bam gu lei.

¹⁷Zai pe paîni ge mei nune hemeigei leine ge mei pe gu heleidui ze deîtau gai dizai â hedui ne geta ne ra lei, zai hegî ting riâ chang mak tâne ’nchi mak bam gu lei.

¹⁸’Mpeumi ’mpuimi je ngua gai ze chipau luagene pa heleidui patbe rarît ze deîtau dizai â penai hangna hedui pia ra lei, zai hegî ting chang mak tâne ’nchi mak bam gu lei.

¹⁹“’Mpuimi mige pe nîsia dezai hezie sena riâ ’nchi mak ze bam gu lei, zai mi-mige de pechu deîtaube kau â hegî ting riâ chang mak tâne ’nchi mak bam gu lei.

²⁰Zai pe nîsiabe ting ge pa jeigaibe bâm leine ’nchi mak bam gu lei; zai pa ’ntaugaibe bâm leine ze du ’nchi mak bam gu lei.

²¹Zai mi-mige pe jeî deîtaube kau â pe paî ramme geta ra lei, zai pe runne hedui ne piatua ra lei, zai hegî ting riâ chang mak tâne ’nchi mak bam gu lei.

²²Zai mi-mige pa ne ’ntaugaibeibe chui ge deîtaube kau â pe paîni geta ra lei, zai pe runne hedui ne piatua ra lei, zai hegî ting riâ chang mak tâne ’nchi mak bam gu lei;

²³pa ne ’ntaugai’ndibe jeî mei merua mei chige ’mpeumi mige deîtau gai dezai, pa ze hegî ting riâ chang mak tâne ’nchi mak bam gu lei.

²⁴Zai mige ’mpeumi chi ’mpuimi dage jei ze pa pe nîsiabe rai deîtau gai ’ndizai â pa ze hezie sena riâ ’nchi mak bam gu lei; zai chi ’mpeumi ne jeigai’ndibe bâm leine ze ’nchimakbe chang du lei.

²⁵“’Mpuimi mige pe nîsiabe ting makbe ge hezie misongga kahejai mei nune pe nîsiabe ting hejai’nzû di mei zai â pe nîsiabe ting ge gum ze pa kahejaibe ting tâluî ze kahebâbe chang bam gu lei.

²⁶Jeî leine pa jeigaibe ze â pa kahejaibe ting tâluî pe hangge ’nchimakbe jeî hang chang kam gu lei, zai pa ne ’ntaugai’ndibe zat leine ze â ’nchimakbe chang du lei, pa pe nîsiabe ting ge ’nchimakbe gum zeu.

²⁷Zai mi-mige airamme deîtau dizai â hebâ gai du de lei, zai pe paî geta ra lei, zai pe runne hedui ne piatua ra lei, zai hegî ting riâ chang mak tâne ’nchi mak bam gu lei.

²⁸Kane pa kahejaibe chângge du hezie sena kuâ ra lei, zai chipau châng dezai pa ’nchi du de lei.

²⁹Zai hezie padesatbe mai dezai temaune kena mei, depeine poine kena mei pa tei lu chize tingkupeu dage kakellumbe-paîki kemuiki ge teiwang gai ra lei.

³⁰Dezai tingkupeu ne, kat hemui-râtewbe hang pei gai ra zai kêdabe kat zene rûkambe-râtewbe hang peipat kai ra lei; zai tingkupeu ne Tingwang masuage kelunbe-râtewbe pa kahejaibe ’nchimakbe hangge tew gai ra lei.

³¹“Aigum ze Israelme je penui ’nchimakbe gene teichâm gai ra lei, penui ruage a gu ka’nchibeki bambe tewhebâ gai ze penui ’nchimakbe gene penui chai mak ra hangge zeu,” ze kacheu de lei.

³²’Mpeumi mige pe gu kahebâbe patme benai pe gu heleidui patbe, chigene hebâdime hangge aize hingde de lei.

³³Chi runne makse ’mpuimi pe nîsiapui hangge du de lei; chi kacheube ze â mi-mige ’mpeumi mei ’mpuimi mei pe gu kahebâbe patkai’ndibe kau, zai ’mpeumi mige ’mpuimi kahebâbe kau dage jeigai’ndibe kau hangge zeu.