Read Zeme Naga LEBITIKAS 16 Bible Online

LEBITIKAS 16 - Zeme Naga bible

LEBITIKAS 16

¹Aaronbe na ’mpeumi hangna Tingwang masuage wang’nna ze chaidibe chângge, Tingwang ne Mosabe je ka’mpau de lei;

²zai Tingwang ne Mosabe je rang gai ze, “Ning kinapeu Aaronbe je paî lîmsungbe bâm ka’nchibe herâtewbe-kaira peireige bambe ka’nggiabe bâmra suage wang’nzie mak ra rang gai lau, makchai â pa chai gu lei; ka’nggiabe bâmra peireige kemua gene I liâ gu daseu.

³Kane Aaronbe â aigum ze ka’nchibe bâm ge wang ra lei: hemui-râtew ra getumsei poine, zai rûkambe-râtew ra meli’nsei tei lu zeu.

⁴Pa ze ka’nchibe linen mechuapui kai ra lei, zai pe pum ge linenpaî ’ntui lu, linen kiakâk ne pe kia kak ra lei, zai pe peî ge linen paî kebit ra lei; airamme ze paîni ka’nchibe chang lei. Pa pe pum hedui ne pia lu chiramme kai ra lei.

⁵Zai Israelme wangka’nduibe gene kemei’nsei kena hemui-râtewbe hang, zai meli’nsei kat rûkambe-râtewbe hang pa lu ra lei.

⁶“Zai Aaronbe ne getumsei pe hang hemui-râtewbe hangge peipat kai ra lei, zai pe hangge benai pe ki hangge kelunbe-râtew gai ra lei.

⁷Dezai kemei kena pa tei ra lei, zai chi kena ze Tingwang suage kakellumbe-paîki kemui ge kai ra lei;

⁸zai Aaronbe ne kemei kena peireige hedachak kai ra lei, hedachakbe kat ze Tingwang hang zai kêdabe kat ze heraka’mpatbe (Azazel) hangge zeu.

⁹Zai Tingwang hangge kemei hedachakpatbe Aaronbe ne teiwang ra lei, zai hemui-râtewbe hang peipat kai ra lei;

¹⁰kane chi heraka’mpatbe (Azazel) hangge chakpatbe ze keringbe luî gene Tingwang masuage teiwang kai ra lei, zai aipau kemei ze kelunbe-râtewbe hangge gum ze hênamkang ’mbe heraka’mpatbe hangge langtua gai ne ra lei.

¹¹“Aaronbe ne getumsei ze pe runne pe hangge hemui-râtew ra teiwang ra lei, zai pa benai pe ki hangge kelunbe-râtew gai ra lei; getumsei ze pe gu hemui-râtewbe hang tewchat kai ra lei.

¹²Zai pa ne Tingwang masuage herâtewbe-kaira gene mâ-ka’ntaube kuak hemi-meching kaipuigitbe, zai keruta perîmyibe kedeînianglube bakui kena tei ra lei; zai chize pa ne paî lîmsungbe lungge teigut kai lu

¹³pa chai mak ra hangge, samhatkaibebung peireige ka’nggiabe bâmra bambe je mâ-perîmyibe mika zene chuangpuigit kai ra Tingwang masuage hemi bambe ge keruta ze pa ne kai ra lei;

¹⁴zai getumsei jai gêsa pa tei ra lei, zai pe bakêrang ne ka’nggiabe bâmra suage kezin gai ra lei, zai ka’nggiabe bâmra suage pe bakêrang ne hejai ze lua sena kezin gai ra lei.

¹⁵“Dezai hemui-râtewbe kemei baudime gu rabe ze pa ne tewchat kai ra lei, zai paî lîmsungbe lungge pe jai ze teiwang ra lei, zai getumsei jai ne tew gum ze pa tew ra lei. Ka’nggiabe bâmra peireige benai ka’nggiabe bâmra suage kezin gai ra lei;

¹⁶aigum ze ka’nchibe bâm hangge pa kelunbe-râtew gai ra lei, Israelme kahebâbe, penui hedieka’ngkabe, zai penui gu hemui leine ziegeneu; zai penui gu kahebâbe zeurua ge bambe kakellumbe-paîki hangge pa chigum ze tew ra lei.

¹⁷Pebâm ka’nchibe ge pe runne pe hang, pe ki hang zai Israel baudime leine hang kelunbe-râtew ra gutbe luage zai pa pat dai mak tânege mî de ka’nduibe-paîki lungge bam mak ra lei.

¹⁸Dezai Tingwang suage bambe herâtewbe-kaira ’mbe pa pat lu ze chipau hangge kelunbe-râtewbe hangge tew gai ra lei, zai getumsei jai benai kemei jai gêsa pa tei ra lei, zai herâtewbe bâmra kie ramme ge kaiguâ gai ra lei.

¹⁹Zai chipau peireige hejai pe bakêrang ne lua sena kezin gai ra lei, zai Israelme gu mâ-kahebâbe gene chize tew’nchi gai ra lei.

²⁰“Zai ka’nchibe bâm benai kakellumbe-paîki zai herâtewbe-kaira hangge kelunbe-râtew lu dezai pa ne kemei keringbe pei gai ra lei;

²¹zai Aaronbe ne kemei ringbe peireige pe ba kena die gai ra lei, dezai chi kemei ringbe peireige Israelme gu hemui-helut leine, penui hedieka’ngkabe leine, penui gu hemui leine ralia kam gai ra lei; zai chiramme ze kemei peireige pa ne kai ra lei, zai kedâ lu sapkuapeu ba gene hênamkang ’mbe chize ’mpattua gai ra lei.

²²Kemei ne penui gu hemui-helut ramme leine hênam zîngbe bâm ’mbe pungtua ne ra lei, zai pa ne kemei ze hênamchangbe heram ’mbe ’mpattua gai ra lei.

²³“Chidezai Aaronbe ze pebâm ka’nchibe ge gutbe lua kaibe puâ linen paî ze luakpat lu sâu gai nan ze kakellumbe-paîki ge gut ra lei;

²⁴zai pebâm ka’nchibe gene pa hedui pia ra lei, zai pe puâ kai lu pat ze rûkambe-râtewbe pe hangge benai baudime hangge peipat kai ra lei, zai pe hangge benai baudime hange kelunbe-râtew gai ra lei.

²⁵Zai hemui-râtewbe gu pechâ ze herâtewbe bâmra peireige rû gai ra lei.

²⁶Zai heraka’mpatbe (Azazel) hang kemei ’mpatkaipeu ze hedui ne pe paî geta ze pe pum pia ra lei, chipau châng dezai sieki lung pa zuagut dui de lei.

²⁷Hemui-râtewrabe getumsei benai kemei ze sieki gene hela ’mbe teipat sing gai ra lei. (Mâ-ka’nchibe zat ramme teleu’nchi ra chi kaurui kena dagene hejai â pebâm Ka’nchibe ge teigut kai de lei) Tingkume ne chi pegei, pepum zai pepum ge kesiabe ramme ze hemi gene rû gai sing ra lei.

²⁸Zai chiramme rûpeu ze pe paî hedui ne geta ze pe pum heduipia ra lei, dezai sieki lung pa gut le dui lei.

²⁹“Zai pasenabe kêu gu hezie pakereube mai ge ningnui keloaname mei hesang heluîchâmme ningnui dage rêume mei ningnui runne ningnui je teseu’ngkîm ze tewhereu gai ze tâtew mak reibamrabe ze betingbeta hangge ningnui dage rawdiakkaibe-hingde hang chang ra de lei;

³⁰ningnui je tew’nchi gai ra aipau mai dezai kelunbe-râ ningnui hangge tew gai gu lei; dezai Tingwang masuage ningnui gu hemui leine gene ningnui ’nchi du de lei.

³¹Aipau mai ze â ningnui hangge ’nsimrim ze reibambe mai chang ra de lei; zai ningnui runne ningnui je deîhereu bi gai ra de lei; chize â betingbeta hangge riagaibe hingde hang de lei.

³²Zai tingkupeu ne linen paîni ka’nchibe kai lu pe peu kelei hangge taudui ’nnuk ze tew’nchigaibeipeu ne kelunbe-râtew gai ra lei;

³³ka’nchibeki hangge pa ne kelunbe-râtew gai ra lei, zai kakellumbe paîki benai herâtewbe-kaira hangge, zai tingkume benai wangka’nduime leine hangge pa ne kelunbe-râtew gai ra lei.

³⁴Zai ai penui gu hemui ramme leine ziegene patingkum ge luakat Israelme hangge kelunbe-râtewrabe ze betingbeta hangge riagaibe hingde hang chang ra de lei,” ze kacheu de lei. Zai Mosabe ze Tingwang ne pechu diegaibeibe luigum ze tew de lei.