Read Zeme Naga LEBITIKAS 17 Bible Online

LEBITIKAS 17 - Zeme Naga bible

LEBITIKAS 17

¹Zai Tingwang ne Mosabe je rang ze,

²“Aaronbe benai pe na ’mpeumi ramme, zai Israelme leine je, aize â Tingwang ne die gai lei be ze salia gai lau.

³Mige Israelme kibau gene getumsei mei, meli mei, kemei mei, sieki lung gene tewchat lu,

⁴kakellumbe-paîki ge Tingwang hang kela pei ra hetiamki suage teiwang ze Tingwang hang pei makchai â hejaipâu ze chipaupeu peireige chak kai ra lei; pa ne hejai tewpat kai de lei, zai chipau ze â pebaume ruagene lutua ne ra lei.

⁵Betak ze â aigum lei, chi Israelbe name ne ’nduloa gene herâtew ze bambe ramme ze Tingwang dage teiwang gai ra ka’nduibe-paîki kemui ge tingkupeu dage teiwang gai le dui de lei, zai chiramme ze Tingwang dage desieyibe-râtewbe gum ze tew gai dui de lei.

⁶Zai tingkupeu ne hejai ze kakellumbe-paîki kemui ge Tingwang gu herâtewbe-kaira peireige kezin gai ra lei, zai Tingwang dage mâ-perîmyibe hangge pechâ ze rû gai ra lei.

⁷Chidezai penui hangleutewbe tâ tewbe kemei’nsei luî tewbe herasiabe hangge herâtewbe pei gai ta du de lei. Aize rehei leine ge betingbeta penui hangge riagailube hingde hang de lei.

⁸“Zai penui je nang salia ra lei, Israelme kibau ge mi-mige mei nune penui ruage hesang heluîchâmme ’ntâkkaibe kau mei, pa zene rûkambe-râtewbe mei nune herâtewbe peipat ze,

⁹Tingwang dage herâtew gai ra kakellumbe-paîki kemui ge chize teiwanggaimakbe kau je â pe gu ziemmename ruagene lutua ne ra lei.

¹⁰“Zai Israelme kibau ge mige mei nune penui ruage hesang heluîchâmme mige ’ntâkkaibe kau mei pa zene hejai teu dizaine â chi hejai teupeu ze â a marak ngau gu lei, zai pe kiangname ruagene pechu lutua ’ndu lei.

¹¹Hemeipum keringbe ze â hejai ge bam daseu; zai ningnui keringbe hang kelunbe-râtew ra herâtewbe-kaira peireige I ne chize kai ’nde lei; chize hepum keringbe deu ge hejai ne kelunbe-râtew daseu.

¹²Chipauziegene Israelme je I salia gai ’nde lei, Ningnui ruage mî de hejai teu mak ra hesang heluîchâmme ningnui ruage ’ntâkkaime du hejai teu mak ra hangge zeu.

¹³Israelme hangkat ne mei, makchai penui ruage mige hesang heluîchâmme ’ntâkkaime hangkat ne mei ze mi teuduibe hekaubena mei nune ’nruine mei ze chi tewkaulube hejai ze ’nzaupat kai ze kedeimoîne ne chize kebauchim gai ra lei.

¹⁴“’Ndamgaibe keringbe zat leine gu hepum keringbe ze â chipau jai ze daseu; chipauziegene Israelme je I salia gai de lei, Ningnui mâ-mâ keringbe zat leine gu hejai teu mak ra lei, ’ndamgaibe keringbe zat leine gu hepum keringbe ze â pe jai ze daseu; mi-mige chize teube kau je â tuâpat ’ndu lei zeu.

¹⁵Zai pe runne chaibe ji mei hekaubena ne ’ngkîchatbe pumji mei chize teube kau ziemmena keloana’mpeu lêuzai, hesang heluîchâmme mige ’ntâkkaibe kau lêuzai pe paîni geta ze hedui pia ne ra lei, zai hegî ting riâ chang mak tâne hebâ ze bam gu lei; chidezai pa ’nchi du lei.

¹⁶Kane pa chiramme geta mak, zai pe pum pia makchai â pa ne pe gu hemui-helut â pung ra lei,” kacheu de lei.