Read Zeme Naga LEBITIKAS 18 Bible Online

LEBITIKAS 18 - Zeme Naga bible

LEBITIKAS 18

¹Zai Tingwang ne Mosabe je rang ze,

²“Israelme je salia lau, I â Tingwang ningnui Rapeu lei.

³Ijipram ge penui tew gum ze ningnui tew mak ra lei, ningnui kebambe bâm ge zeu, zai Kanaanram ge penui tew gum ze ningnui tew mak ra lei, I ne ningnui je nguawanggaibe bâm gezeu. Penui ne riagaibe hingde ge ningnui tat mak ra lei.

⁴Ningnui a gu hingde tewgaibe ramme benai hingde rawdiakkaibe ramme ge sui ze chiramme ge tat ra lei. I ne Tingwang ningnui Rapeu de lei.

⁵Chidaze ningnui a gu hingde rawdiakkaibe zai a gu hingde tewgaibe ramme leine tei ra lei, chize tewbe gene ziemmena ring gu lei: I Tingwang de lei.

⁶“Ningnui ruage mi-mige du pe sikina paîni gâu mak ra lei. I â Tingwang de lei.

⁷Ning peu nî kehuachu se lau, chize ning pui hangge pumlâng liâgaibe chang lei; pa â ning pui de lei, ning pui je pumlâng bam ra tew gai se lau.

⁸Ning peu nâu nî nang gâu me ra lei; chize ning peu nî gâube riâ chang lei.

⁹Ning pui na mei, nune ning peu na mei, chi ning kina kilûng gene mei ’nsiê gene mei gene lungbepui nî nang gâu mak ra lei.

¹⁰Ning chame nî nang gâu mak ra lei, penui gu pumlâng ze â ning gu pumlâng riâ de lei.

¹¹Ning peu nâu ne lungkeube na heleu’mpui ning peu ne piakeube pui nî nang gâu mak ra lei, pa â ning kina pui daseu.

¹²Ning peu sikina’mpui nî nang gâu mak ra lei; pa â ning peu kiduî’mpui-gesang daseu.

¹³Ning pui sikina’mpui nî nang gâu mak ra lei, pa â ning pui kiduî’mpui-gesang daseu.

¹⁴Ning peu sikina’mpeu, nî nang kehua mak ra lei, chize pe nâu tai wang’nna se lau, kacheube lei; pa â ning pui daseu.

¹⁵Ning mupui nî nang gâu mak ra lei; pa â ning na nâu daseu, pechu â pe nî nang gâu mak ra lei.

¹⁶Ning sikina’mpeu nâu nî nang gâu mak ra lei; pa â ning sikina’mpeu gu pumlâng de lei.

¹⁷’Mpuimi benai chi pe na ’mpuimi paî nang gâu mak ra lei, zai chi ’mpuimi na heleu’mpui mei nune heleu’mpui na heleume mei pe nî nang gâu mak ra lei; penui ’mpuimi ramme â ning kiduîme kahechutbe kau kam lei; chize â mâ-kesiabe kau lei.

¹⁸Ning nâu sikina’mpui je ning nâu je kahengeipui hangge teiwang gai se lau, zai ning nâu ring bam ze chipaupui nî gâu se lau.

¹⁹“’Mpuimi pe nîsia ze kahebâbe luage pe nî gâu ra nang pe taihia wang’nna mak ra lei.

²⁰Ning pum suigut tew ze ning ramna’mpeu nâu taige nang jei ze pe dagene ning runne ningchu tewhebâ mak ra lei.

²¹Ning name mi-mi je du Molekbe dage nang ne teiherâtew gai mak ra lei, aigumbe ze Tingwang dagene kahebâbe lei: I â Tingwang de lei.

²²’Mpuimi dage gum ze ’mpeumi dage nang jei mak ra lei; chize â kesiabe katenetbe lei.

²³Zai nang hekaubena je nguajei ze chigene ning runne ningchu tewhebâ mak ra lei, zai ’mpuimi du mi-mige de hekaubena je nguajei mak ra lei: chize â mauka’ndibe lei.

²⁴“Aigumbe tak ramme gene ningnui runne ningnui je tewhebâ ze bam se lau, aigum bambe ziegene ningnui hebâ gai makge I ne heramzatme je kumtua ra tew de lei;

²⁵heram ’nsangnedu hebâ gai di de lei; chipauziegene pe gu hemui ziegene I tewsâ gai de lei, zai heram zene pelung ge kelungme ramme je ’nruîpat kai bei de lei.

²⁶Kane ningnui a gu hingde rawdiakkaibe ramme, zai a gu hingde tewgaibe ramme tei ze, keloaname mei hesangme heluîchâmme ningnui dage rêume mei aige mi katenetbe tâ ramme katte tew gai se lau.

²⁷(Tingtie ningnui suage heram ge lungme ne ai katenatbe tâ ramme tew gai ’ndi de lei, chigum ze heram ze hebâ gai di de lei)

²⁸Zai ningnui ne heram ze tewhebâ gai ’ndizai â tingtie ningnui suage heramzatme je ’nruîpat kai bei gum ze ningnui je ’nruîpat kai gu lei.

²⁹Mi-mige ai kesiabe katenetbe tâ ramme tew dizai â chigumbe kau ziemmena je â pe ramname ruagene lupat ’ndu lei.

³⁰Chidaze ai tingtie ningnui suage ai katenatbe tâ tewgaibe ramme katte ningnui â tew gai mak ra a samde tei bam lau, zai chiramme gene mâtew-tewsedu ningnui runne ningnui je tewhebâ gai se lau: I â Tingwang ningnui Rapeu de lei,” ze kacheu de lei.