Read Zeme Naga LEBITIKAS 19 Bible Online

LEBITIKAS 19 - Zeme Naga bible

LEBITIKAS 19

¹Zai Tingwang ne Mosabe je rang ze,

²“Israelme wangka’nduime leine je rang gai be lau, Ningnui ’nchi ra lei; I Tingwang ningnui Rapeu â ka’nchi daseu.

³Ningnui haimena ne pe pui zai pe peu ngeutew ra lei, zai ningnui a gu ’ntakbambe mai ramme ze rei ra lei: I ne Tingwang ningnui Rapeu de lei.

⁴Heraluîtewbe lam ’nreitat se lau, ningnui runne ningnui hangge heraluî ramme ’ndam se lau: I ne Tingwang ningnui Rapeu de lei.

⁵“Tingwang dage ningnui desieyibe-râtew gai dezai ningchu lu gai ra besie luî gene nang peipat ra lei.

⁶Chiramme peipatbe mai gîm ge ningnui chize teu ra lei, makchai bechai mai ge teu ra lei; zai pakechumbe mai riâ ’nsakpatbe ze â hemi ne rû ne ra lei.

⁷Chiramme ze pakechumbe mai ge teu kam gai ’ndizai â chize â kesiabe katenetbe de lei; chize â lun ra mak lei,

⁸zai mige chize teube kau ze â pe runne pe gu hemui-helut ze pung gu lei, pa ne Tingwang gu ka’nchibe merua ze tewhebâ gai ’ndi daseu; zai pechu â pe puiname ruagene lutua ’ndu lei.

⁹“Ningnui gu heram ge ningnui mâ-himlei ramme ze gat dezai, ning gu helupua riâ getwangchang mak ra lei, zai ning gu gekumwanglube chângge pametai du gat mak ra lei.

¹⁰Zai ning gu grepchî merie ge pechî rai’nzâu mak ra lei, ningnui gu grepchî merie ge grepchî ’ngngaîkeudibe ramme rui’ndui mak ra lei; chiramme ze â kelaksiame benai hesangme hangge sâu gai ra lei: I Tingwang ningnui Rapeu lei.

¹¹“Ningnui hega mak ra lei, zai betâumakbe du tew mak ra lei, zai kat-kat je du duai mak ra lei.

¹²Zai ningnui a ji gene karasa ne deseu mak ra lei, zai nang ning Rapeu ji tewhebâ mak ra lei; I â Tingwang lei.

¹³“Nang ning kining’mpeu je getat mak ra lei, zai pe dage sut mak ra lei. ’Nteuwangbe kebang gu hezie hî â ning dagene hekâmtingba mak ra lei.

¹⁴Hekunpangme je nang deset kai mak ra lei, zai mikchitme je ’nraprabe kai mak ra lei, kane nang ning Rapeu je hingchi ra lei: I â Tingwang lei.

¹⁵“Samrambe ge ’nzeimakbe ningnui tew mak ra lei; kelaksiame je nang ’nrie, zai kedime je nang hezuâ gai mak ra lei, kane kapelingbe gene ning kining’mpeu je nang samram gai ra lei.

¹⁶Ning puiname ruage kaketupeu chang ze nang tat-hang tatkeu bam mak ra lei, zai ning kining’mpeu gu hepum keringbe je nang ’nggi mak ra lei: I â Tingwang lei.

¹⁷“Ning kiduî’mpeu je ning lung gene nang ngaugailak mak ra lei, kane ning kining’mpeu dage nang ranglia zun gai ra lei, pe ziegene nang hemui pung mak ra hangge zeu.

¹⁸Ning zatme name ramme peireige hekûm lu mak ra lei, zai helungriaksiabe tak tew gai mak ra lei, kane ningchu ning runne hung gum ze ning kining’mpeu je nang hung ra lei: I â Tingwang lei.

¹⁹“A gu hingde rawdiakkaibe ramme ningnui tei ra lei. Ning gu kaurui je pehik gechâm-châmbe zat ne gua ra pei mak ra lei; ning lu ge mâ-himlei zat na ling gai mak ra lei; kelangkie zat na kaiherua ze dakbe paî du bâ mak ra lei.

²⁰“’Mpeumi ne hemeipum ka’nchiebe gene ’mpuimi kebangchangbe kau, kêdapeu nâu hang rangchak kai lu zai ’nri mak, zai pe sui-sui bam ra peigaimakbe kakge chi bamkuapui dage jei gai ’ndizai â mâ-kakemêtbe kai ra lei. Penai hangna je tewchat mak ra lei, pechu ’mpatpat kai mak rei daseu;

²¹kane pe runne pe hangge kemaube-râtewbe peipatbe Tingwang dage kakellumbe-paîki kemui ge teiwang gai ra lei, zai kelunbe-râtewbe peipatbe hangge kemei’nsei teiwang gai ra lei.

²²Zai tingkupeu ne pe hangge kemaube-râtewbe peipatbe gu kemei’nsei ne Tingwang suage pe gu hemui tâ tewgai’ndibe hangge kelunbe-râtew gai ra lei; zai pa ne hemui tâ tewgai’ndibe pechu lun gai bu lei.

²³“Ningnui chi heram ge gut dezai teurabe hangge hêchibang zat leine tau gai dezai, chipau bang ramme gu perachî ze teuneube hang chak kai ra lei; kum chum chize ningnui hangge teuneube chang ra lei, chize â teumau gai mak ra lei.

²⁴Zai pamedaibe kum ge hêchi ramme leine ka’nchibe chang du de lei, Tingwang je getoabe peipatbe hang chang ra lei.

²⁵Kane pamengeube kum â ningnui perachî teu dui de lei, dezai perachî du ningnui hangge ’nchipat’ngkie ra hangge zeu: I Tingwang ningnui Rapeu lei.

²⁶“Hemei ge hejai bambe luî gene ningnui chize teu mak ra lei. Ningnui hedachakbe benai kabe tak tew mak ra lei.

²⁷Ningnui peîtam kegua mak ra lei, zai ning biagêu buapattibe ramme guttua mak ra lei.

²⁸Kechaime je heube ziegene ning runne ningchu ning pum ge tewjâm gai zai mâ-mâ bekiê tewpat kai mak ra lei: I â Tingwang lei.

²⁹“Ning na ’mpuimi je pe pum zuateupui hang pechu tew gai ze tewhebâ gai se lau, heram ze hepumzuateube gu heram chang gai mak ra zai chi heram ge kesiabe ne puipat mak ra hangge zeu.

³⁰A gu ’ntakbambe mai ze ningnui rei ra lei, zai a ki ka’nchibe ngeutew’ndi ra lei: I â Tingwang lei.

³¹“Gekungme benai heduaîtewme lam zua gai se lau; penui ne ningnui je tewhebâ gai ra penui je pheu se lau, I â Tingwang ningnui Rapeu lei.

³²“Nang pe peîmuaktime suage sapchu gai ra lei, zai gechîngme je nang hengêutewchi ra lei, zai ning Rapeu je nang hingchi ra lei: I â Tingwang lei.

³³“Hesang heluîchâmbe kau ne ningnui ram ge ning dage ’ntâk kai dezai pechu ningnui kesiabe tew mak ra lei.

³⁴Hesang heluîchâmbe kau ningnui dage ’ntâkkaipeu ze ningnui ruage keloana’mpeu gum bam ra lei, zai ning runne nang ningchu nang hung gum ze pechu nang hung ra lei; ningnui du Ijipram ge hesang chang ze bam gai daseu: I â Tingwang ningnui Rapeu lei.

³⁵“Betâ ge mei, perît ge mei, periak ge mei, ningnui mâ-ka’ndeube ge tewmau gai mak ra lei.

³⁶Hedu ka’nsambe, perît kapelingbe, ephah kapelingbe, zai hin kapelingbe ningnui tei ra lei: I â Tingwang ningnui Rapeu lei, Ijip gene ningnui je nguapatpeu zeu.

³⁷Zai a gu hingde rawdiakkaibe ramme leine, a gu hingde tewgaibe leine ningnui pie’mmi ra lei, zai chiramme tew ra lei: I â Tingwang lei,” ze kacheu de lei.