Read Zeme Naga LEBITIKAS 20 Bible Online

LEBITIKAS 20 - Zeme Naga bible

LEBITIKAS 20

¹Tingwang ne Mosabe je rang ze,

²“Israel je rang gai lau, Israel’mpeu mei Israelram ge hesangme heluîchâmme ’ntâkkaime mei chime ruage mige pe name je Molekbe dage peibe kau je â tewchat ne ra lei; heram ge ziemmename ne pechu tingchu ne tuâ ra lei.

³I ne a ma-rak chipaupeu dage tewlia gu lei, zai pechu pe puiname ruagene lutua ’ndu lei, pa ne pe name hangkat je Molekbe dage pei gai ze, a gu ka’nchibe tewhebâ gai zai a ji ka’nchibe tew’nsiagaibe ziegeneu.

⁴Kane mige ne pe name je Molekbe dage herâtew gai bam ze pedeiname ne mâ-hang du ’nning gai mak ze pechu tewchat mak tizai â

⁵chipau peu benai pe kiduîme peireige a marak I tewlia gu lei, zai pa benai Molekbe dage hangleutew ze bamme leine je pezatme ruagene tuâpat ’ndu lei.

⁶“Mige gekungme benai heduaîtewme lam ’nreitat ze chiramme ge hepumzuateube tâ zat tew dizai â chigumbe kau peireige a marak I tewlia gu lei, zai pechu pe puiname ruagene lutua ’ndu lei.

⁷Chidaze ningnui runne ningnui je tew’nchi lu bam lau, zai ’nchi ze bam lau; I Tingwang ningnui Rapeu daseu.

⁸A gu rawgaibe hingde ramme tei ze chiramme tew lau; I â Tingwang ningnui je tew’nchigaipeu de lei.

⁹Mi-mige du pe pui je mei nu pe peu je mei tewchatbe kau je â tewchat ne ra lei; pa ne pe peu mei pe pui mei je chiang gai bei de lei, pe jaipâu â pe peireige bam gu lei.

¹⁰“Mige ’mpeumi pe kining’mpeu nâu dage hema gai dizai â kahemapeu benai kahemapui penai hangna je tewchat ne ra lei.

¹¹’Mpeumi mige pe peu nâu dage jeibe kau â pe peu nî kakehua de lei; penai hangna je tewchat ne ra lei, penai jaipâu ze â penai peireige lamui lei.

¹²’Mpeumi mige pe mupui dage jei dizai â penai hangna je tewchat ne ra lei; pe kiduîme karai tâsiabe tew di de lei, penai jaipâu ze â penai peireige lamui lei.

¹³’Mpeumi mige ’mpuimi dage gum ze ’mpeumi dage jei dizai â penai hangna ze kesiabe katenetbe tâ tew gai de lei; penai je tewchat ne ra lei, penai jaipâu ze â penai peireige lamui lei.

¹⁴’Mpeumi mige pe nâu hang lube ge chi ’mpuimi pui je du lu’mpam dizai â chize sia-kadesangbe lei; penui hangchum je hemi ne rû ’nde ra lei, dezai ningnui ruage kesiabe tâ tewbe bam ta ra hangge zeu.

¹⁵’Mpeumi mige hekaubena je nguajei dizai â pechu tewchat ne ra lei; zai ningnui hekaubena je tewchat ra lei.

¹⁶’Mpuimi mige kaurui taige wang’nna ze nguajei dizai â ’mpuimi benai hekaubena je ningnui tewchat ra lei; penai je tewchat ne ra lei, penai jaipâu ze â penai peireige lamui lei.

¹⁷“’Mpeumi mige pe sikina’mpui, pe peu na ’mpuimi mei, pe pui na ’mpuimi mei, chipaupui je lu ze, pe pum pumlâng ngau dizai â zai chi ’mpuimi zene du pe pum pumlâng ngau dizai â chize â mi ka’ngngambe lei, zai penai je haîmapa gene tew’ngga ne ra lei; pa ne pe tipui nî gâupat kai bei daze, pa ne pe runne pe gu hemui-helut pung gu lei.

¹⁸’Mpeumi mige ’mpuimi pe nîsiabe ting ge pe dage jei dizai â pe nîsiabe ze ’mpeumi ne teilia de lei, zai ’mpuimi du pe runne pe nîsiabe teiliabe chang de lei; pezatme ruagene penai je tuâpat ne ra lei.

¹⁹Ning pui kiduî’mpui je mei pe sikina’mpui je mei nang pe nî ra mak ra lei; chize â mi runne mi sikina je pumlâng tew gai daseu; penai ne penai gu hemui-helut pung ra lei.

²⁰Mige ’mpeumi pe pui kiduî’mpeu nâu dage mei, nune pe peu kiduî’mpeu nâu dage mei jei dizai â pa ne pe nî gâube chang lei; penai ne penai gu hemuipâu pung gu lei, zai penai na ga ze chai gu lei.

²¹’Mpeumi mige pe kiduî’mpeu nâu je lu dizai â chize â ’nchimakbe lei; pa ne pe kiduî’mpeu nî gâupat kai de lei, penai na ga gu lei.

²²“Chidaze ningnui a gu hingde rawdiakkaibe ramme benai hingde tewgaibe sam ramme tei ra lei, zai chiramme tew ra lei; dezai ningnui lung ra I ne ningnui je nguawanggaibe heram zene ningnui je ’nruîpat kai mak ra hangge zeu.

²³Zai ningnui ruage I ne tuâpatkaibe heram zatme kelungbe-sie ge ningnui tat mak ra lei; airamme leine penui tewbe ziegene I ne penui je ngau’nneî di daseu.

²⁴Kane I ningnui je rang lei, ‘Ningnui ne penui ram ze ’nram gu lei, zai I ne chize ningnui je ningnui hang chang ra pei gu lei, tungdui benai ’ngkuidui ne luabe heram zeu,’ ze acheu zeu. I â Tingwang ningnui Rapeu hezat ramme ruagene ningnui je teichâmgaipeu lei.

²⁵Chidaze ningnui kaurui ka’nchibe benai kaurui kahebâbe kakge tewchâmchi ra lei, zai ’nruipoine ka’nchibe benai ’nruipoine kahebâbe kakge tewchâmchi ra lei; ningnui hekaubena ne mei ’nruipoine ne mei mâ-mâ kedei ge puigit ze bambe merua zene ningnui runne ningnui je tewhebâ gai mak ra lei, I ne ningnui hanggene ’nchimakbe lupatchâm gai ’ndi daseu.

²⁶Ningnui a hangge ’nchi ze bam ra lei; I Tingwang, I â ka’nchi daseu, zai heramzatme ruagene ningnui je teichâm gai ’ndi daseu, ningnui ze a gume chang ra hangge zeu.

²⁷“’Mpeumi mei ’mpuimi mei pe dage gekungbe sie benai heduaîtewbe teibe kau je â tewchat ra lei; penui je tingchu ne tuâ ra lei, penui jaipâu ze penui peireige lamui lei,” ze kacheu de lei.