Read Zeme Naga LEBITIKAS 21 Bible Online

LEBITIKAS 21 - Zeme Naga bible

LEBITIKAS 21

¹Zai Tingwang ne Mosabe je, “Tingkume, Aaronbe na ’mpeumi ramme je ranglia gai lau, mi-mige du pe puiname ruage kechai pum ziegene penui runne penui je tewhebâ mak ra lei be zeu,

²pe puiname hechutlangbe kau, pe pui, pe peu, pe kiduîme dage runne zangnêu, ’mpeumi, ’mpuimi,

³zai pe tipui, katimsangpui (pe napeu ga dadege pechu kahechutbe kau dage runne zangnêu).

⁴Kelak pui-peu changdibe luigum pezatme ruage pe runne pechu tewhebâ gai mak ra lei.

⁵Penui peîtam gut mak ra lei, zai penui biagêu ze du gut mak ra lei, penui pum ge du mâ de getjâm mak ra lei.

⁶Penui Rapeu hangge penui ’nchi ze bam ra lei, zai penui Rapeu ji ze tewhebâ mak ra lei; hemi gene Tingwang hangge herâtewgaibe benai penui Rapeu gu tingku penui ne pualiâ daseu, chipauziegene penui â ’nchi ze bam ra lei.

⁷Penui pum zuame, zai ’mpuimi tewhebâ’ndibe kau mei je pa henâu lu mak ra lei; zai ’mpuimi pe napeu ne tapatkaibeibe kau je du lu mak ra lei; tingkupeu â pe Rapeu hangge ka’nchi daseu.

⁸Nang ne pechu tew’nchi gai ra lei, pa ne ning Rapeu gu tingku peipat daseu; ning hangge pa ze ’nchi ra lei, I Tingwang ningnui je tew’nchigaipeu â ka’nchi daseu.

⁹Zai tingkupeu na heleu’mpui hepumzuateube tâ tewbe gene pe runne pa ka’nchibe tewhebâ ’ndizai â pe peu je deîkahebâbe chang lei; chipaupui je â hemi ne rû ne ra lei.

¹⁰“Tingkupeu pe puiname ruage dilangpeu, ka’nnukbe-taudui pe peî’nning ge ruîgai’ndibe, zai paî ka’nchibe bâ ra tew’nchigai’ndibe kau je â peize pe peîtam pungzâura bam mak ra lei, zai pe paî ze du tewri mak ra lei;

¹¹pa â kechaipum ge du ’nna mak ra lei, pechu du tewhebâ mak ra lei; pe peu lêuzai du, zai pe pui lêuzai du zeu;

¹²ka’nchibe ki gene du pa hela pat mak ra lei, zai pe Rapeu gu ka’nchibe ki ze du tewhebâ mak ra lei; pe Rapeu gu tew’nchigaibe ’nnukkaibe taudui pe peireige la daseu: I Tingwang lei.

¹³Zai heleume katimsang kau je runne pe nâu hang lu ra lei.

¹⁴Kemîpui mei tapatkai’ndipui mei, zai ’mpuimi deîhebâgai’ndipui mei, zai pe pum zuapui mei, aime je pa pe nâu lu mak ra lei; kane pa pe nâu hang pe zatme ruagene heleume katimsang kau je lu ra lei,

¹⁵dezai pe name je pe puiname ruagene tewhebâ mak ra hangge zeu; I â pe chu tew’nchigaibe Tingwang daseu,” ze kacheu de lei.

¹⁶Zai Tingwang ne Mosabe je,

¹⁷“Ning chame ruage mige hetiakbambe kau â penui rehei tingluî ge pe Rapeu je tingku peipat kai ra wang’nna mak ra lei.

¹⁸Mige du heziâkbambe kau mei, pe mikchitbe kau mei, pe pî siabe kau, mige heluîsiabe kau mei, pe pî pe ba tie’nzûdibe kau mei,

¹⁹kahejambe pî-ba pungbe kau mei,

²⁰pe ngumtoabe kau, heluîlungka’ngkibe kau, ’mpeumi pe mik ngauyimakbe kau mei, ka’nchakbe rarît pungbe kau mei, zai kûmpai patbe kau mei zai patingkachêu niak’nsia’ndibe kau mei â pe Rapeu gu tingku peipat ra wang’nna ra mak daseu;

²¹tingkupeu mige Aaronbe chaname pe dage heziâkbambe kau â hemi ne herâtewbe Tingwang dage pei ra wang’nna mak ra lei; pe dage heziâkbambe ziegene pe Rapeu gu tingku peipat kai ra pa wang’nna mak ra lei;

²²pa pe Rapeu gu tingku teu dui lei, ’nchilangbe benai ka’nchibe merua ramme zeu.

²³Kane pa paî lîmsungbe taihia wang’nna mak ra lei, zai herâtewbe bâmra wang’nna mak ra lei, pe dage heziâk la daseu, dezai pa ne a gu ka’nchibe kakellumbe bâm ramme tewhebâ gai mak ra hangge zeu; I â Tingwang penui je tew’nchigaipeu daseu,” ze kacheu de lei.

²⁴Chigum ze Mosabe ne Aaronbe benai pe na ’mpeumi ramme, zai Israelme leine je salia gai bei de lei.