Read Zeme Naga LEBITIKAS 22 Bible Online

LEBITIKAS 22 - Zeme Naga bible

LEBITIKAS 22

¹Zai Tingwang ne Mosabe je rang ze,

²“Aaronbe benai pe name je Israel gu ka’nchibe merua ramme penui ne a hangge diepat’nchigaibe gene ’mbia de ra rang gai lau, dezai a ji ka’nchibe ze penui ne tewhebâ mak ra hangge zeu: I â Tingwang lei.

³Penui je, Mige ning chaname rehei leine ge pe dage ’nchimakbe bambe ting ge Israelme Tingwang dage diepat’nchigaibe merua ka’nchibe ge wang’nna dizai â chipaupeu je a suagene lutua ne ra lei: I â Tingwang lei.

⁴Mige Aaronbe kiria gene ka’mpabe mei kahejaibe mei chigene pa ’nchi mak tâne mâ-mâ ka’nchibe merua zat teu mak ra lei. Mi-mige kechaipum deîtaugailube gene mâge â ’nchimakbe deîtaube kau mei nune mige pe gu heleidui ’nrimpatbe kau mei je deîtaube kau â

⁵zai mi-mige pechu deîhebâgaiduibe kau chi mâ-mâ liaruabe zat mei nune mige ne pechu deîkahebâbe kau mei, ’ndaikau gene mei pa ’nchi mak lêuzai du

⁶chigumbe deîtaube kau â hegî ting riâ chang mak tâne ’nchi mak ze bam gu lei, zai ka’nchibe merua teu mak ra lei, pe pum ze hedui ne pia ’nde lei makchai ai.

⁷Tingnaimik kêu di dezai pa ’nchi du lei; zai chipau châng dezai â pa ka’nchibe merua zat ramme teu dui lei, chiramme pe gu hetak daseu.

⁸Chi mâ-mâ pe runne chaibe mei nune hekaubena ne ’ngkîchatbe mei be ne pe runne pechu tewhebâ ze chize pa teu mak ra lei; I â Tingwang lei.

⁹Chidaze penui je I ne kerangbe tei ra lei, peize penui chipau hangge hemui mak ra zai chi penui ne ka’nchibe deîkahebâbe gene chai mak ra hangge zeu: I â Tingwang penui je tewka’nchipeu lei.

¹⁰“Hela kau tingkume makme â ka’nchibe merua teu mak ra lei. Tingkume dage hesang ’ntâkkaibe kau mei hiteube kau mei chigumbe kau â ka’nchibe merua teu mak ra lei;

¹¹kane tingkupeu ne rangkâng ne kebang je pe gu merua gum ze luibe kau zai â chize teu dui lei; zai pe ki ge lungkeugaime leine â pe gu hetak ze teu le dui lei.

¹²Tingkupeu na heleu’mpui ne ziemmena hela kau nâu tew dizai â ka’nchibe merua peipatbe ze pa teu mak ra lei.

¹³Kane tingkupeu na heleu’mpui ze kemîpui chang gai di mei nune tapat kai bei mei zai pe na ga ze pe peu ki lam’mbe helatwang dai ze pa heleu’ngka gum bam dai dizai â pe peu gu hetak ze pa teu dui lei; sede hela kau â chize teu mak ra lei.

¹⁴Zai mige ka’nchibe merua chî mak ze teu dizai â chige pemî dêt mengeu pa kaisî gai ra lei, zai chi ka’nchibe merua ze tingkupeu je pei gai ra lei.

¹⁵Tingkume ne Israelme gu merua ka’nchibe penui ne Tingwang dage peipatbe ze tewhebâ mak ra lei,

¹⁶zai chigum ze ka’nchibe merua penui teugaibe gene penui je tewhemui gai lei: I â Tingwang penui je tewka’nchipeu lei,” ze kacheu de lei.

¹⁷Zai Tingwang ne Mosabe je,

¹⁸“Aaronbe benai pe name zai Israelme leine je rang gai lau, Israel kibaume mei, Israelme ram ge hesang ’ntâkkaime mei pe gu ruage hetkailube gene mei nune pe suiyi ze kela peipat ze Tingwang dage rûka’nggabe-râtewbe peipatbe gene mei ze, pa peipatbe luage

¹⁹pheu gai be ra hang getumsei mei, meli mei, kemei mei, ze heziâkgabe ne ningnui peipat kai ra lei.

²⁰Heziâkbamdibe â mâ de ningnui peipat mak ra lei, chize ningnui je lûn ra mak daseu.

²¹Mi suiyibe hang peipatkaibe gum ze mei nune mâ hatkailube tewpui gai ra mei be hangge melidung gene mei, kauruidung gene mei, Tingwang dage desieyibe-râtewbe gu herâtew dezai chize lu gai be ra hangge yi’nsangsiakbe ne sing ra lei; chize heziâk bam mak ra lei.

²²Hekaubena pemikchitbe kau mei choanidibe kau mei, tewjâm’ndibe kau mei, hejai patbambe kau, makchai ka’nchakbe kau mei, kahekuabe kau mei chiramme zene Tingwang dage pei gai mak ra lei, zai herâtewbe-kaira peireige hemi gene Tingwang dage peipat kai mak ra lei.

²³Mi suiyibe kela peipatbe hang â getumsei mei, melipoine mei, bepî, pe ba ’nsammakbe du ningnui peipat dui lei; kane hatkaibe gu peipatbe ge â chize pheu gai ra mak lei.

²⁴Hekaubena patingka tewhitruaigai’ndibe kau mei, nune kedeî’ndibe kau mei, tewpâng’ndibe kau mei zai tewjâm’ndibe kau mei ne ningnui Tingwang dage peipat kai mak ra lei, zai ningnui gu heram lungge du chigumbe zene teiherâtew gai mak ra lei;

²⁵zai hesang kedeume dagene aigumbe kaurui lulube ne ningnui Rapeu gu herâtewbe hetak hangge peipat kai mak ra lei. Penui dage heziâk la daseu, penui je tewjâm’ndibe ziegene penui â ningnui hangge pheu gai ra mak lei,” ze kacheu de lei.

²⁶Zai Tingwang ne Mosabe je,

²⁷“Getumsei mei, meli’nsei mei, kemei’nsei mei ze ’nnakeu dezai bepoine pe pui dage hezie sena bam gai ra lei; zai hezie desatne changdibe châng dezai â chize Tingwang dage hemi gene peipat kai dui de lei.

²⁸Zai pe pui ze getum mei, melipui mei lêuzaidu, pe pui benai bepoine je mai kat ne kena ningnui tewchat mak ra lei.

²⁹Zai Tingwang dage ningnui misuiyibe peipatbe-râtewbe gu herâtewbe luage, ningnui je peize lun gai be ra hang herâtew gai ra lei,

³⁰Chipau mai gîm ge chize teu ne ra lei, chize mâ du kat du hechua riâ hang ningnui ’nsak kai mak ra lei: I â Tingwang lei.

³¹“Chidaze ningnui a gu samde ramme rei ze tew ra lei: I â Tingwang lei.

³²Zai ningnui a ji ka’nchibe tewhebâ mak ra lei, kane Israelme ruage a chu tew’nchi gai ze bam ra lei; I â Tingwang ningnui je tew’nchigaipeu lei,

³³ningnui Rapeu chang ra Ijipram gene ningnui je lupatkaipeu zeu: I â Tingwang lei,” ze kacheu de lei.