Read Zeme Naga LEBITIKAS 23 Bible Online

LEBITIKAS 23 - Zeme Naga bible

LEBITIKAS 23

¹Tingwang ne Mosabe je rang ze,

²“Israelme je rang gai lau, Tingwang gu diegai’ndibe hengi, a gu tew’ntipkai’ndibe-hengi ramme, ka’nchibe ’ndui hang ningnui ne rangbagairabe ze â airamme de lei:

³Hezie serukne tâtew ra lei; kane pasenabe mai ze â ka’nchibe ’ndui ’nsimrim ze ’ntak ze bambe ’ntakbambe mai lei; ningnui tâtew mak ra lei; chize â ningnui kelungbe bâm leine ge Tingwang dage ’ntakbambe mai de lei.

⁴“Airamme ze Tingwang gu diegai’ndibe hengi, ka’nchibe ’ndui ramme chi penui hangge tew’ntipkaibe gu panehî ramme ge ningnui rangbagairabe ramme de lei.

⁵“Raîlangbe kêu gu hezie kereu ze medai mai hegî ze â Tingwang gu tatkabe hengi lei.

⁶Zai chipau kêu gu hezie kereu ze mengeu mai ze â Tingwang dage ’nduihîkaimakbe hengi de lei; hezie senane ningnui ’nduihîkaimakbe tingku teu ra lei.

⁷Railangbe mai ge ka’nchibe ’ndui ningnui ’ndui ra lei; ningnui tâ kechibe tew mak ra lei.

⁸Kane Tingwang dage hezie senane hemi gene kelapeibe peipat ze bam ra lei; pasenabe mai ze â ka’nchibe ’ndui lei; ningnui tâ kechibe tew mak ra lei,” ze kacheu de lei.

⁹Zai Tingwang ne Mosabe je,

¹⁰“Israelme je rang gai lau, I peibe heram ge ningnui gut ze mâ-hîmra gat dezai, ningnui mâ-hîmra gekumwangbe rachî raîlangbe gu mekum ze tingkupeu dage teiwang gai ra lei;

¹¹zai pa ne Tingwang suage mekum ze kezap kai ra lei, dezai ningnui je pheu gai gu lei; ’ntakbambe mai bechaibe mai ge tingkupeu ne chize kezap kai ra lei.

¹²Zai ningnui mekum ze kakezapbe mai dezai meli’nseipoine kum kat kau heziâkgabe rûka’nggabe-râtewbe hangge Tingwang dage peipat kai ra lei.

¹³Zai mâ-himlei peipatbe-râtewbe geze dekuî taudui kebutlube ephah kat gu tûm kereu ge tûm na ze hemi gene Tingwang dage mâ-perîmyibe chang ze peipat kai ra lei; chige sakbe-râtewbe peipatbe ze â wain hin kat gu tûm kereu ge tûm medai ne ra lei.

¹⁴Zai ningnui tingku du, mâ-helei getalube du, nune mâ-mâ rechidabe zat du Tingwang dage teiwanggairabe mai riâ chang mak tâne teu mak bam ra lei: chi hingde rawdiakkaibe ze betingbeta ningnui kelungbe bâm leine ge ningnui rehei leine hang de lei.

¹⁵“Zai ningnui ’ntakbambe mai bechaibe mai, ningnui kakezapbe-râtewbe teiwangbe gu mekum teiwang’ndibe mai gene ’ntakkak sena ling hang ningnui riamchu ra lei,

¹⁶’ntakbambe mai pasenabe chaibe mai riâ gu hezie rengeu riamchang zeu; chidezai ningnui gu mâ-hîmra karchibe peipatbe-râtewbe chipau mai ge Tingwang dage peipat kai ra lei.

¹⁷Ningnui kelungbe bâm ramme gene tingkuliâp kena kezap kai ra hangge teiwang ra lei, dekuî ephah kat gu tûm kereu ge tûm na ne langlube zeu, chize â dekuî yibe ge ’nduihî kai lu lang ra lei, Tingwang dage ’nchipatraibe rachî gum ze peigaibe hangge zeu.

¹⁸Zai ningnui tingku peibe ge melipoine sena heziâkgabe kum kat kau, zai getumseipoine, zai meli’nsei kena pei gai ra lei; Tingwang dage mâ-hîmra peipatbe-râtewbe benai sakbe-râtewbe peipatbe ruage hemi gene Tingwang dage perîmyibe peipatbe chang ze airamme zene rûkambe-râtew ra lei.

¹⁹Zai ningnui kemei’nsei kat hemui-râtewbe hangge peipat kai ra lei, zai meli’nsei kumkat-kau kena desieyibe-râtewbe herâtewbe hang peipat kai ra lei.

²⁰Zai Tingwang masuage kakezapbe-râtewrabe hangge tingkupeu ne melipoine kena tei lu ze, hemeurachî keraîbe gu tingku ge kezap kai ra lei; chiramme ze tingkupeu hangge Tingwang dage ka’nchibe chang ra lei.

²¹Zai ningnui chipau mai ge rangba gai ra lei; ningnui ka’nchibe ’ndui ’ndui ra lei; ningnui tâ kechibe tew mak ra lei: chi hingde rawdiakkaibe ze betingbeta ningnui kelungbe bâm leine ge ningnui rehei leine hang de lei.

²²“Zai ningnui lu rachî gat dezai ningnui gu helupua riâ ningnui getwangchang sing mak ra lei, ningnui gekumwanglube chângge pametai ze du lu dai mak ra lei; chiramme ze ningnui ne kelaksiame benai hesangme heluîchâmme hang sâudiak kai ra lei: I Tingwang ningnui Rapeu lei,” ze kacheu de lei.

²³Zai Tingwang ne Mosabe je,

²⁴“Israelme je rang gai lau, Pasenabe kêu, hekêu gu hezie keraîbe mai ge ka’nchibe ’ndui ze ’nsimrim ze bambe mai ningnui reibam ra lei, chibamrabe hegeîluîkie ’mmut ze rangba gai zeu.

²⁵Ningnui tâ kechibe tew mak ra lei; zai ningnui Tingwang dage kela hemi gene peipat kai ra lei,” ze kacheu de lei.

²⁶Zai Tingwang ne Mosabe je,

²⁷“Aipau pasenabe kêu hezie pakereube mai ze â kelunbe-râtewbe tingnaimikpui de lei; chize ningnui hangge ka’nchibe ka’nduibe nehî de lei, zai teseu’ngkîm ze ningnui runne ningnui je deîhereu gai ze Tingwang dage hemi gene herâtewbe peipat kai ra lei.

²⁸Zai ningnui aipau mai ge tâ-kechibe tew mak ra lei; aipau mai ze â Tingwang ningnui Rapeu masuage ningnui hangge kelunbe-râtewbe mai daseu.

²⁹Aipau tingnaimikpui gîmsing ge mi-mige hereugaimakbe kau â pe puiname dagene lutua ne ra lei.

³⁰Zai aipau tingnaimikpui gîmsing ge mi-mige tâtewbe kau je â pe puiname ruagene I ne tew’ngga ’ndu lei.

³¹Ningnui tâtew mak ra lei: aize â betingbeta ningnui lungbe bâm leine ge rehei leine hang rawdiakkaibe hingde de lei.

³²Chize â ningnui hangge ’nsimrim ze ’ntakbambe mai hang chang ra de lei, zai teseu’ngkîm ze ningnui runne ningnui je deîhereu gai ra lei; chipau kêu gu hezie pasekuibe mai hegî gene chu ze, bechai mai hegî riâ gu ’ntakbambe ze ningnui rei ra lei,” ze kacheu de lei.

³³Zai Tingwang ne Mosabe je,

³⁴“Israelme je rang gai lau, Ai pasenabe kêu gu hezie kereu ze mengeu mai gene hezie sena riâ ze Tingwang dage hetiampaîki-ngi kahengîbe mai lei.

³⁵Railangbe mai ge â ka’nchibe ’ndui ’ndui ra lei; ningnui tâ kechibe tew mak ra lei.

³⁶Hezie senane ningnui kela hemi gene Tingwang dage peipat ra lei; hezie padesatbe mai ge ningnui ka’nchibe ’ndui bam ra zai hemi ne Tingwang dage kela peipat ra lei; aipau mai â ’nsimrim ze pengêudi ze ka’nduibe mai de lei; ningnui tâ kechibe tew mak ra lei.

³⁷“Tingwang gu ’ntakbambe mai, ning gu kela peipatbe ning gu hatkailube kela zai hesuiyibe kela Tingwang dage peipatbe leine peireige du, patingnaimikpui betâu-tâu ge rûkambe-râtewbe mâ-hîmra peipatbe-râtewbe zai kesakbe-râtewbe, Tingwang dage hemi gene peipat ra ningnui ne ka’nchibe’ndui ting rangbagairabe hangge airamme ze Tingwang ne diegai’ndibe hengi ramme de lei;

³⁸Tingwang gu ’ntakbambe ramme, zai ningnui gu kela ramme, zai ningnui ne samhatkaibe peipatbe ramme leine zai ningnui ne Tingwang hang mâ pei nei ze peipatbe leine peireige zeu.

³⁹“Pasenabe kêu hezie kereu ze mengeu mai ge, ningnui kedei gene tewpatbe gekumwang dezai, hezie senane Tingwang gu kahengîbe ningnui reibam ra lei; raîlangbe tingnaimikpui ze ’nsimrim ze ’ntakbambe mai lei, zai hezie padesatbe mai ze du ’nsimrim ze ’ntakbambe mai lei.

⁴⁰Zai raîlangbe tingnaimikpui ge mâ-bang keyibe ramme rachî, ’nchangbangtu ramme, zai peneu kiebe keî ramme, zai ’nggeukung ge hegua’mpêune chingbang ningnui tei ra lei; zai Tingwang ningnui Rapeu suage hezie senane ningnui suiyi’nta bam ra lei.

⁴¹Ningnui chize patingkum ge hezie sena Tingwang dage kahengîbe hang tei gai ra lei; chize â betingbeta hang ningnui rehei leine hangge rawgai’ndibe hingde de lei; ningnui chize pasenabe kêu ge bam ra lei.

⁴²Ningnui hetiampaîki ge hezie senane bam ra lei; Israelram name leine hetiampaîki ge bam ra lei,

⁴³chidezai Ijipram gene I ne Israelme je nguapatbe ting ge penui je hetiampaîki ge lung ze bam ra I ne penui je tew gai bei de lei be ningnui reheime ne peize chî le ra hangge zeu: I Tingwang ningnui Rapeu lei,” ze kacheu de lei.

⁴⁴Aigum ze Tingwang ne diegai’ndibe-ngi ramme ze Mosabe ne Israelme je rangba gai de lei.