Read Zeme Naga LEBITIKAS 24 Bible Online

LEBITIKAS 24 - Zeme Naga bible

LEBITIKAS 24

¹Tingwang ne Mosabe je,

²“Israelme je hemibung hang taudui ’nchichiakbe olib gene niakpatlube teiwang ra samdie gai lau, dezai tauba bam ra hangge zeu.

³Kakellumbe paîki ge samhatkaibebung lîmsungbe gene hela ’mbe Aaronbe ne chize hegî gene hechua riâ Tingwang masuage teleu’ntia bam ra lei; chize betingbeta ningnui rehei leine hangge rawdiakkaibe hingde chang ra lei.

⁴Pa ne Tingwang masuage gechâk ka’nchibe ne kateleube hemibung-kaira ramme peireige hemibung ramme ’ngking’ntiaria gai bam ra lei.

⁵“Zai nang ne dekuî yibe tei lu, chize ne tingkukuak kereu ze kena lang ra lei; dekuî ephah kat gu tûm kereu ge tûm na tingkukuak ’nsangne hangge kai ra lei.

⁶Zai nang ne chiramme ze pa’nria kena kaibangpat kai ra lei, zai pa’nria kat ge kuak seruk-ruk kai ra lei, ’nchichiakbe gechâk ne tewbe mâ-kaira peirei gezeu

⁷Zai mâ-perîmyibe ’nchichiakbe ze pa’nria kena ge kai ra lei, chidezai Tingwang dage hemi gene peipatkairabe tingku ge chibamrabe dam hang peitat bam ra hangge zeu.

⁸’Ntakbambe tingnaimikpui ’nsangne ge Aaronbe ne chize Israelme kelei ge betingbeta samhetkaibe hangge Tingwang suage teleu’ntia gai bam ra lei.

⁹Chi tingku ze â Tingwang dage hemi gene peipat’ndibe ’nchilangbe dam changbe ziegene Aaronbe benai pe name ne pebâm ka’nchibe gene betingbeta teubamrabe penui dam hang chang di de lei,” ze kacheu de lei.

¹⁰Ijip’mpeu na Israel’mpui ne lungkeube na rehang’mpeu Israelme ruagene zuapat ti de lei; dadege Israel’mpui na benai Israel’mpeu hangkat sieki lung gene samtu de lei,

¹¹zai Israel’mpui na ne Hera ji tew’nsia ze, deset kai bei de lei. Zai penui ne pechu Mosabe dage teiwang gai de lei. Pe pui ji â Shelomithle Danbe kiria kau, Dibribe na de lei.

¹²Zai penui ne pechu kebangme je kaileubeki ge kaikua gai bei de lei, Tingwang suî’nningtak ze penui je liâgaimakbe kak hangge zeu.

¹³Zai Tingwang ne Mosabe je,

¹⁴“Chi kadesetpeu je sieki gene nguapat lau; zai pe kuâ seume leine ne pe peireige peize penui bahuâ kai zu lau, zai baudime leine ne peize pechu tingchu ne tua zu lau.

¹⁵Zai Israelme baudime je salia lau, Mi-mige du pe Rapeu je desetkaibe kau â pe gu hemuipâu pung gu lei.

¹⁶Tingwang ji je saka’nsiabe kau je â tewchat ne ra lei; zai baudime leine ne pechu tingchu ne tuâ ra lei; hesangme ’ntâkkaime mei nune keloaname mei zainedu Tingwang ji saka’nsiabe kau je â tewchat ne ra lei.

¹⁷Mige ziemmena je tewchatbe kau je â tewchat ne ra lei.

¹⁸Mige miramme gu hekaubena je tewchatbe kau â keyibe tew ra hangge mâ-keringbe kelei ge keringbe ne peiruî dai ra lei.

¹⁹Mige pe kining’mpeu je tewchoani gai dizai â pa ne tew gai gum ze pechu du tew gai be ra lei,

²⁰tewbatbe kau je tewbat kai dai be ra, tewchitbe kau je tewchit kai dai be ra, hegeutewkeube kau je tewkeu gai dai be ra lei; pa ne miramme je tewchoani gai gum ze pechu du tewchoani gai be ra lei.

²¹Mige hekaubena je tewchatbe kau â chige mâge â keyibe tew gai dai ra lei; zai ziemmena je tewchatbe kau je tewchat ne ra lei.

²²Hesang ’ntâkkaime hang benai keloa’mpeu hangge hingde â kat ra lei; I â Tingwang ningnui Rapeu daseu,” ze kacheu de lei.

²³Aigum ze Mosabe ne Israelme je mâ salia’mmi gai de lei; zai penui ne kadesetpeu je sieki gene nguapat kai de lei, zai pechu tingchu ne tua de lei. Chigum ze Tingwang ne Mosabe dage ranggaibeibe luigum ze Israelme ne tew de lei.