Read Zeme Naga LEBITIKAS 25 Bible Online

LEBITIKAS 25 - Zeme Naga bible

LEBITIKAS 25

¹Sinai Loa ge Tingwang ne Mosabe je rang ze,

²“Israelme je salia lau, I ne ningnui je peibe heram ge ningnui wang dezai, heram ze Tingwang dage ’ntakbambe mai reibam ra lei.

³Nang kum seruk ning lu ge tâtew ra lei, zai kum seruk ning gu grepchî merie teleu ra lei, zai perachî gekumwang gai ra lei;

⁴kane pasenabe tingkum ge Tingwang dage ’ntakbam ze rei’nsimrim bambe, heram hangge ’ntakbambe mai reibam ra lei; ningnui gu helu tâ tew mak ra zai grepchî merie du tew mak ra lei.

⁵Ning gu helu ge pe runne puakpatbe rachî nang gat mak ra lei, zai nang ne teleu’nchuimakbe grepchî merie gu grepchî nang gekum’ndui mak ra lei; chipau tingkum ze â heram hangge ’ntak ze rei’nsimrim bam ra lei.

⁶Heram ge ’ntakbambe zene ningnui hangge benai ning gu kebangme ’mpuimi, ’mpeumi zai ningnui gu hiteume, zai ning dage hesang chang ze bamme hangge hetak pei gai gu lei;

⁷ning gu kebui ramme hang du zai hekaubena ning ram ge bambe heram gene patbe zat leine teurabe hetak hang chang gu daseu.

⁸“Patingkum ramme ge lua sena ’ntakbambe ramme, tingkum sena hangge lua sena gu ze nang riamtei lau, chidezai patingkum ramme lungge lua sena ’ntakbambe mai ramme ze ningnui hangge kum hedai ze sekui pat ra hangge zeu.

⁹Chidezai pasenabe kêu gu hezie pakereube mai ge hegeîluîkie kuâ kechibe ningnui ’mmut kehuazia-zia gai ra lei; kelunbe-râtewbe mai ge ningnui ram huâzie ge hegeîluîkie kuâ ningnui ’mmut kehuasatkat kai ra lei.

¹⁰Zai parengeube tingkum ze ningnui tew’nchi ra lei, zai heram huâzie ge kelungme leine dage lungzeune-tewrabe rasam saba gai ra lei; chipau tingkum ze ningnui hangge jubilee chang ra de lei, chipau hî ge ningnui haimena ne ningnui gu heram ’mbe helatwang dai gu zai ningnui ki lam-lam ’mbe helatwang dai kam gu lei.

¹¹Ningnui hangge chi parengeube kum ze jubilee chang ra lei; chipau kum lungge nang mâ-helei ling ra mak, perunne puakpatbe bang rachî du gat ra mak, teleutadibe grepchî merie gu pechî du gekum’ndui ra mak lei.

¹²Chipau kum â jubilee di daseu; chipau kum ze ningnui hangge ka’nchibe chang ra lei; ningnui heram gene ’nchipatbe ze teu ra lei.

¹³“Aipau jubilee kum ge ningnui ’nteumena mi gu heram ’mbe helatwang dai kam ra lei.

¹⁴Zai ning ramna’mpeu dage nang mâ-zua gai mei, nune ning ramna’mpeu dagene mâ luî mei dizai â ningnui kat-kat je mâ-kesiatew mak ra lei.

¹⁵Jubilee chângge tingkum ’ndaikie tat ti de mei be riak riam ze ning ramna’mpeu dagene mâ-lui ra lei, zai perachî ngauduibe tingkum Jubilee suage ’ndaikie larei mei be riak riam ze pa ne ningchu mâ-zua gai ra lei.

¹⁶Patingkum kie-desang di rei zai â pemî ze nang tei’ntua ra lei, zai patingkum cham dizai â pemî ze nang tew’nsîn ra lei, mâ-himlei rachî ngaurabe riâ hang riam ze pa ne ning dage mâ-zua gai daseu.

¹⁷Ningnui kat-kat je mâ-kesiatew mak ra lei, kane ning Rapeu je nang hingchi ra lei, I â Tingwang ningnui Rapeu daseu.

¹⁸“Chipauziegene ningnui â a gu rawdiakkaibe-hingde ramme teitatew ra lei, zai a gu hingde tewgaibe ramme tei ze chiramme ze tew ra lei; chidezai ningnui heram ge lungtemi ze lung gu lei.

¹⁹Heram ne perachî ’nchikeu gu, zai ningnui teu’nggeu ra ngau gu lei, zai chige kehing-ka’nnangga ze ningnui lung gu lei.

²⁰Zai ningnui ne, ‘’Ndaikau anui pasenabe tingkum ge teu ra lau, anui ling mak, zai gekum’ndui mak lêuzai neu?’ ze acheu dizai â

²¹paserukbe tingkum ge I ’nnamgaibe ningnui peireige lang gai gu lei, dezai chize perachî kum chum hangge ’nchikeu gu lei.

²²Padesatbe kum ge ningnui helei ling dezai, ningnui kegua teu ra lei; pasekuibe kum du helei karchibe gekumwang mak tâne ningnui kegua ze teu ra lei.

²³“Heram ze betingbeta hangge zua gai mak ra lei, heram je â a gu daseu; ningnui â a dage hesangme heluîchâmme hesang’ntâkkaime daseu.

²⁴Zai ningnui ka’nrambe heram leine ge ’nridaiduibe hangge heram zua gai ra lei.

²⁵“Ning sikina’mpeu kelaksiakeu di, zai pe gu merua zat ramme zua dizai â pechu kahechutme ne wang ze pe sikina’mpeu ne zuagai’ndibe ze ’nri ra lei.

²⁶Chipaupeu hangge mî ne chize ’nri ra ga sede pe zeu lungpat dai ze chize ’nri ra hereu taluisui dizai â

²⁷peize pa zuagai’ndibe gene patingkum riak ’nsap lu ze pa zuagaipeu je peimêkeu ze pei dai ra lei; zai pa pe gu heram ’mbe helatwang dai ra lei.

²⁸Kane chize pe hang lu dai ra hereu dizai â pa zuagai’ndibe ze luipeu ba ge Jubilee kum chang mak tâne bam bam ra lei; jubilee ge chize peipat kai ra lei, zai pa pe heurâ lam’mbe helatwang dai ra lei.

²⁹“Mige â kerie rieguabe namdi ge ziemmena bambeki zua dizai â chize pa zuagaibe tingkum lungge ’nri dui lei; tingkum kat lungge â ’nridaiduibe pe hangge bam gu lei.

³⁰Tingkum kat lung gene chize ’nri maktizai â kerie rieguabe namdi lungge bambeki ze â chi keluipeu ne betingbeta pa rehei ting tâluî ge pe hang chang de ra lei; chize jubilee ge peipat dai mak ra lei.

³¹Kane rieguamakbe keloa lungge heki bambe ramme ze â heram gu ’nduloa hangge chak kai be ra lei; chiramme ze ’nri dui lei, zai chiramme jubilee ge peipat kai be ra lei.

³²Acheuleusedu Lebime gu namdi ramme, penui ram gu namdi ramme ge heki ramme ze Lebime ne pehî leine ge ’nri dui lei.

³³Zai Lebime ruage hangkat ne pa ’nrirabe tâ ze tew makchai â penui namdi ge heki zuagai’ndibe ze jubilee ge peipat dai be ra lei; Lebime gu namdi ge Israelme ruage penui gu heram chang daseu.

³⁴Kane Lebime gu namdi ramme ge ’nteumena gu changbe heram ka’nruabe ze â zua mak ra lei; chize â betingbeta penui gu chang di daseu.

³⁵“Zai ning sikina’mpeu kelaksiakeu di ze pe runne lungchi lak tizai â pechu nang bari ra lei; hesang heluîchâmbe kau gum zai hesang ’ntâkkaibe kau gum ze pa ning dage bam ra lei.

³⁶Pe dage peching hang mei nune pa’ntua hang mei ze mâ de lu ra mak lei, kane ning Rapeu je hingchi lau; dezai ning dage ning kiduî’mpeu lungtak chî le ra hangge zeu.

³⁷Pechu nang ning gu rangkâng peching hanggene hepuk kai mak ra lei, zai ning gu hetak du pa’ntua hanggene pechu pei gai mak ra lei.

³⁸I â Tingwang ningnui Rapeu de lei, Kanaanram ningnui je pei gai lu ningnui Rapeu chang ze bam ra Ijipram gene ningnui je nguapatkaipeu zeu.

³⁹“Zai ning hiage ning kiduî’mpeu kelaksiakeu di ze pe runne pechu ning dage zua gai dizai â nang pechu kebang gum ze ning tâ ’nggua ra tew gai mak ra lei:

⁴⁰pa ze ning dage hiteupeu gum zai hesang ’ntâkkaipeu gum ze bam ra lei. Pa ning dage jubilee kum chang mak tâne ’ngguabam ra lei;

⁴¹chidezai ning dagene pa benai pe name, pe dage bamme penui ki lam’mbe helatwang dai ra lei, zai pe pau gu heram ’mbe helatwang dai ra lei.

⁴²Penui â a guâ ka’ngguame, Ijip gene I ne nguapatme bau daseu; penui je kebang hang gum ze zua gai mak ra lei.

⁴³Nang pe peireige hejaîsiabe tak ne samram mak ra lei, kane ning Rapeu je hingchi ra lei.

⁴⁴Ning dage kebang ’mpuimi ramme benai ’mpeumi ramme bamme je gum ze: ningnui huâzie ge heramzatme ruagene kebang ’mpeumi benai ’mpuimi ramme bamme je ningnui lui dui lei.

⁴⁵Zai hesangme heluîchâmme benai penui kelak ramme ningnui dage bamme na ramme ningnui ram gene lungkeume ramme je du ningnui ne lui dui lei; zai penui ze ningnui gu chang dui lei.

⁴⁶Ningnui chaige ningnui name dage chime bau je kaikelitat bam dui lei, betingbeta penui gu kerua gum tei bam ra hangge zeu; ningnui ne penui je kebang hang chui gai dui lei, kane ningnui puiname Israelme ningnui â kat-kat peireige tewhereu ze samram ze bam se lau,

⁴⁷“Ning dage hesangme heluîchâmbe kau mei, nune hesang ’ntâkkaibe kau mei ne lungyichu di ze ning sikina’mpeu pe taige bambepeu â kelaksiakeu di ze hesang heluîchâmbe kau mei nune hesang ’ntâkkaibe kau ning dage bambepeu dage mei nune chi hesang heluîchâmbe kau kiduî’mpeu dage mei ze pe runne pechu zua gai dizai â

⁴⁸pechu zuagai’ndibe chângge pechu ’nri dui lei; pe kiduî’mpeu hangkat ne pechu ’nri dui lei,

⁴⁹makchai pe peu kiduî’mpeu ne mei nune peudâ na ne mei pechu ’nri dui lei; makchai pe kiduîme pechu kahechutme ne pechu ’nri dui lei; makchai pa ne lungyichu dizai â pe runne pechu ’nri dui lei.

⁵⁰Pa benai pechu luipeu ze pe runne pechu zuagaibe kum gene jubilee kum riâ kak gu beting ze penai riam ra lei, pechu ’mpatkairabe mî hangge chipau tingkum ramme lungge hiteupeu je peibe lî tak gene ’nsap ra lei; pechu luipeu dage pa bambe ting ge hiteupeu gu lî gene chak ra lei.

⁵¹Penai chîbe tak gene tingkum misongga bam di rei zai â pechu pemî hang peigai’ndibe pa ne pechu peiruî dai ra lei, pechu ’nrirabe mî hangge zeu.

⁵²Jubilee kum dau ra patingkum mâkie du ta dizai â pa ne pechu luipeu hangge chipau tingkak gu runne chak kai be ra lei; pechu luipeu guâ pa ’ngguagairabe tingkum ’ndaikie larei mei be chak lu ze pe runne pechu ’nrirabe hangge rangkâng ze pa pei gai dai ra lei.

⁵³Hiteupeu ne tingkum ’nsangne pe dage bam bam gum ze pa du chigum bam ra lei; ningnui masuage pa ne chipaupeu peireige tewhereu ze samram mak ra lei.

⁵⁴Zai aigumbe lam gene pechu ’nri maktizai â pa benai pe name pe dage bamme je Jubilee kum gene ’mpat kai ra lei.

⁵⁵A hangge Israelme â tâka’ngguame daseu, penui â a guâ ka’ngguame Ijipram gene I ne nguapatkaime daseu; I â Tingwang ningnui Rapeu lei.