Read Zeme Naga LEBITIKAS 26 Bible Online

LEBITIKAS 26 - Zeme Naga bible

LEBITIKAS 26

¹“Ningnui runne ningnui hangge heraluî ramme tew mak ra lei, zai mâ-luî chiamlube mei nune tingchusum mei be teichu sum gai mak ra lei, zai ningnui ram ge ningnui kellum ra hang peluî heruilube tingchu ningnui sum gai mak ra lei; I â Tingwang ningnui Rapeu daseu.

²Ningnui a gu ’ntakbambe mai rei ra lei, zai a ki ka’nchibe je hengêu pei ra lei. I â Tingwang de lei.

³“Ningnui ne a gu rawdiakkaibe-hingde ramme ge tat, zai a gu hingde ramme reî zai chize tew dizai â

⁴ningnui hang I ne beting-pehî ge tingrui ra tew gai gu lei, zai heram ge mâ-mâ misongga ’ndatpat ku lei; zai helu ge hechîbang ramme ze pechî ’nchikeu gu lei.

⁵Zai ningnui gu chêu neibe ze grepchî raibe ting riâ neichang gu lei, zai grepchî raibe ze hetâ-tâbe ting riâ raichang gu lei; zai ningnui teu’nggeugit bam gu lei; zai ningnui ram ge zêune ze lung gu lei.

⁶Zai heram ge desieyibe lungkatemibe I pei gu lei, zai ningnui mâ de kehingbe tew mak ze jeikela ze bam gu lei; zai heram gene I ne hekaubena kesiabe leine je kum’mbia ’ndu lei, zai hiazutkie ningnui ram ge tatpela ra mak lei.

⁷Zai ningnui ne ningnui teureime je gua’nsa gu lei, dezai ningnui suage hiazutkie gene penui kau gu lei.

⁸Ningnui hangmengeume ne ziemmena haî kat je gua’nsa gu lei, zai ningnui haî-katme ne chang kereume je gua’nsa gu lei; dezai ningnui teureime ze ningnui suagene hiazutkie gene kau gai gu lei.

⁹Zai I ne ningnui je ’nchâ gu, zai ningnui je heluîhing ze pung-ze-sa ra tew gai gu lei, zai ningnui dage a gu samhatkaibe tew’ntip kai gu lei.

¹⁰Zai ningnui chêu reîtiedibe kegua teu gu lei, zai ningnui kegua ze kechai’nchi gu lei, karchibe bâm hangge zeu.

¹¹Zai ningnui ruage a bâm hang I tew gai gu lei, zai ningnui je ’nneî-’nrie gai ra mak lei.

¹²Zai I ne ningnui ruage tatrua gu zai ningnui Rapeu chang gu lei; zai ningnui ze a gu ziemmena chang gu lei.

¹³I â Tingwang ningnui Rapeu, Ijipram gene ningnui je nguapatkaipeu de lei. Ningnui sap’nzeitun lu tat ra hangge ningnui gu guangkam ze I ne tewbat kai bei de lei.

¹⁴“Kane ningnui ne a kuâ ’ngking makchai â zai ai hingde ramme leine tew maktizai â

¹⁵ningnui a gu rawdiakkaibe-hingde ramme tew’ngga, zai a gu hingde tewgaibe ramme ningnui keringbe ne ’nneî-’nrie, a gu hingde ramme tei mak ze, kane a gu samdiegaibe tew’ngga zai â

¹⁶I ne aize ningnui peireige tew gai gu lei: I ne ningnui peireige mi kehingbe ’nnangwangrabe zai kahegunbe rarît, zai hemikran tew’ngga ze mi keringbe tewka’nsiabe rarît bam ra tew gai gu lei, zai ningnui gu helei peruânggabe ge ta gai gu lei; ningnui teureime ne chize teu gu daseu.

¹⁷I ne ningnui je a marak tewlia gai gu zai ningnui teureime ne ningnui je tewkau gai gu lei; ningnui je ngaugailakme ne ningnui peireige samram ze bam gu lei, dezai ningnui je mî ne gua’nsa mak sedu ningnui pak ku lei.

¹⁸Zai aigumbe riâ tew gai bei sedu ningnui ne a kuâ ’ngking makchai â ningnui gu hemui ziegene dêt sena I ne ningnui je tewsâ gu lei,

¹⁹zai ningnui ranchi peireige ningnui ’nrîmlube ze I ne tew’nsia ’ndu lei, zai I ne ningnui gu tingkehube ramme hegeî gum bam ra tew gai gu, zai ningnui gu kedei ze hetageî gum bam ra tew gai gu lei;

²⁰zai ningnui ranchibe ze peruânggabe ge tuâ kam gai ’ndu lei, ningnui gu heram ge gepungbe ngau ra mak daseu, zai heram ge hingbang ramme ze bechî ’nchikeu ra mak daseu.

²¹“Ningnui ne a dagene tatkedetda tat tizai â, zai a kuâ ’ngking mak tizai â I ne ningnui gu hemui misongga bambe riâ gene dêt sena ningnui peireige herarît kaisuâ gai gu lei.

²²Zai I ne ningnui ruage mârekaune ramme ’ngguakpang bam ra, ningnui name je ’nsia ra zai ningnui gu kebuidung ramme tew’nsia ra zai ningnui heluî tudkeu ra tew gai gu lei, chidezai ningnui ’mpuî ze tatpeduângkerut kai de ra hangge zeu.

²³“Zai ai kalatdeibe gene ningnui a lam ’nreiwang mak, kane tatkedetda tat tizai â

²⁴I du ningnui dagene tatkedetda tat tu lei, zai I ne ningnui je ningnui gu hemui ramme ziegene dêt sena tewsâ gai gu lei.

²⁵Zai I ne ningnui peireige hiazutkie teiwang gai gu lei, chize ne samhatkaibe teimakbe hangge hekûmlube chang gu lei; zai ningnui gu namdi ramme lungge ningnui ’nseu gai dezai du I ne ningnui ruage herarît lang gai gu lei, zai ningnui je ningnui teureime ba ge peipat kai ’ndu lei.

²⁶I ne ningnui gu hetak ngaurabe bâm ze tew’nsia ’ndi dezai â ’mpuimi hangkereume ne ’mmang kat gene ningnui gu tingku lang gu lei, zai ningnui gu tingku ze periâ ’nchu ze pei dai gu lei; dezai ningnui teu gu, kane ’nggeu ra mak lei.

²⁷“Zai aigum bei sedu ningnui a kuâ ’ngking mak, kane tatkedetda tat tizai â

²⁸I du a lumpum ze tatkedetda ze tat tu lei, zai ningnui gu hemui ramme ziegene dêt sena ningnui je tewsâ gai gu lei.

²⁹Ningnui na ’mpuimi ’mpeumi pumji ramme ningnui teu gu lei.

³⁰Dezai ningnui gu pebâm kehube ramme ze I ne tew’nsia ’ndu, zai mâ-perîmyibe rube-kaira ramme kuîkau ’ndu lei, zai ningnui gu kechaipum ramme ze ningnui gu heraluîtewbe ramme gu kechaipum ramme peireige tuâ gai gu lei; I ne ningnui je ngau’nrie gu lei.

³¹Zai I ne ningnui gu namdi ramme tew’nsia gai gu, zai ningnui gu kakellumbeki ze putzîng gai gu, zai ningnui gu mâ-perîmyibe rîm ze namtau gai ra mak lei.

³²Zai I ne heram ze gechim’nsia gai gu, dezai ningnui teureime chige bamme ne chige ningdaulak bam gu lei.

³³Zai I ne ningnui je heram ramme ruage tewtimrarip kai gu lei, zai I ne ningnui chaige hiazutkie pechûp gene tatpat kai gu lei; zai ningnui ram ze putzîng gai gu lei, dezai ningnui gu namdi ramme sia kam gai du lei.

³⁴“Ningnui teureime dage ningnui bam’nsuidibe ting ge heram ze gang gai bei ze pe suiyi-desang bam gu lei; dezai heram ze sau’ntâk kai ze temichai ze bam gu lei.

³⁵Chize putzîng gai ze bam bei tâne heram hang â sau’ntâk ze bam gu lei, ningnui heram ge bam ’ngka mâdau wangchangmakbe zeu.

³⁶Zai ningnui ruage sâudiakkaime hangge penui teureime ruage penui lungchêutew ta di ze bamrabe hangge I ne lang gai gu lei; mâ-neu guikeube ’ncheu ne du hing ze penui pak ku lei, zai hiazutkie je mige hing ze pak gum ze penui pak ku lei, zai mî ne du penui je gua’nsa mak ze penui kau gu lei.

³⁷Mige ne ’nsa mak sede, hiazutkie je hing ze pak gum ze pakpat ze penui kat-kat je ’nrap gu lei; zai ningnui teureime masuage ningnui sapgimchi ra mak lei.

³⁸Zai heramzatme ruage ningnui ga gai du lei, zai ningnui teureime gu heram ne ningnui je teu kam ’ndu lei.

³⁹Zai penui gu hemui-helut ziegene ningnui teureime ram ge ningnui ruage ’nsakpatme lungtud kai du lei; zai penui peume gu hemui-helut ramme ziegene penui gum ze penui lungtud kai du lei.

⁴⁰“Kane penui choâ kesiabe gene penui benai penui peume gu hemui-helut ramme a peireige tewgai’ndibe, zai a dagene tatkedetda tattibe ziegene,

⁴¹penui dage I ne tatkedetda tat ti, zai penui teureime ram ge penui je nguatat kai bei de lei be ralia dizai â penui lung rumgetenmakbe lung ze kecheilung pung di de lei, zai penui gu hemui-helut pâu ruîbe chang di de lei.

⁴²Chidezai Jakobbe zai Isaakbe zai Abrahambe dage I samhetkaibe I chibam gu lei, zai heram je I chibam gu lei.

⁴³Kane penui ne heram ze sâu gai gu lei, zai penui putzînggaibe luage chi heram ze sau’ntâk ku lei; zai penui keringbe ne a gu rawdiakkaibe hingde ’nrie, zai a gu hingde tewgaibe ramme tewka’nsiabe ziegene penui hemui-helut pungbe ze penui tew’mmi dai gu lei.

⁴⁴Acheuleusedu penui teureime ram ge penui bambe lua penui je I tew’ngga ra mak lei, ’nrie du ’nrie ra mak lei, penui je tew’nsia kam ne ra zai penui dage a gu samhetkaibe tewpâng ne ra hangge zeu; I â Tingwang penui Rapeu daseu.

⁴⁵Kane I penui Rapeu chang ra heramzatme mikngau gene Ijipram gene penui je nguapatkaipeu ne penui hang ziegene penui pau-paime dage I samhetkaibe chibam gu lei: I â Tingwang lei,” ze kacheu de lei.

⁴⁶Ai rawdiakkaibe-hingde benai hingde tewgaibe zai hingde ze Tingwang ne pa benai Mosabe zai Israelme kakge Sinai Loa gene tewgaibe ramme de lei.