Read Zeme Naga LEBITIKAS 27 Bible Online

LEBITIKAS 27 - Zeme Naga bible

LEBITIKAS 27

¹Tingwang ne Mosabe je rang ze,

²“Israelme dage sam rang gai lau, Nang ne penui hang ’nsapkaibe gene Tingwang dage ziemmena je peipat kai ra mige gechukbe gene sam deseu dezai,

³kakellumbeki gu rangkâng riak tak gene ’mpeumi kum ’ngkai gene kum riakseruk riâ hangge pemî riâ hang nang ne ’nsapkairabe ze gepûtgeî pum shekel rengeu ra lei.

⁴Zai chi ziemmena ze ’mpuimi dizai â pemî hang nang ne ’nsapkairabe ze gepûtgeî pum shekel himreu ra lei.

⁵Chi ziemmena ze kum mengeu gene kum ’ngkai riâ kau zai â pemî hang nang ne ’nsapkairabe ze ’mpeumi peireige gepûtgeî pum shekel ’ngkai ra lei. Zai ’mpuimi peireige gepûtgeî pum shekel kereu ra lei.

⁶Chi ziemmena ze kêu kat gene kum mengeu riâ kau zai â pemî hang nang ne ’nsapkairabe ze ’mpeumi peireige gepûtgeî pum shekel mengeu ra lei, zai ’mpuimi peireige gepûtgeî pum shekel kechum ra lei.

⁷Zai chi ziemmena ze kum riakseruk gene pa’nrei kau zai â pemî hangge nang ne ’nsapkairabe ze ’mpeumi peireige gepûtgeî pum shekel kereu ze mengeu ra lei, zai ’mpuimi peireige gepûtgeî pum shekel kereu ra lei.

⁸Zai nang ne ’nsapkairabe riâ ze chi peipatbe ’mpaupeu zene peikâulak tizai â pa ne tingkupeu dage chi peipatkai’ndibe ziemmena je nguawang gai ra lei, dezai tingkupeu ne pemî riâ hangge ’nsap kai ra lei; peipat ra samhetpeu dagene peipatduirabe riâ hang pie lu ze tingkupeu ne pemî hang ria gai ra lei.

⁹“Ziemmena je herâtewbe kela hang Tingwang dage peipat gum ze hekaubena ne peipat tizai â aigumbe mi-mige ne Tingwang dage peipatbe ze ka’nchibe chang lei.

¹⁰Zai chi hekaubena peipatkaibe ge keyibe ne kesiabe hang, zai kesiabe ne keyibe hang acheu ze helei gai ze hiak kai mak ra lei; zai pa ne hekaubena ne hekaubena hang hiak kai dizai â chige bambe benai hiakkaibe chibe kena ze ka’nchibe ne ra lei.

¹¹Zai Tingwang hangge herâtewbe kela peipatmakrabe hekaubena ’nchimakbe zat gene pei dizai â pa’mpaupeu zene chi hekaubena ze tingkupeu dage teiwang gai ra lei,

¹²dezai yi mei, sia mei zainedu tingkupeu ne pemî hang ’nsapkaibe ge nang pheu gai ra lei.

¹³Kane pa ne chize ’nri dai nei zai â pemî hang ’nsapkai’ndibe geze mengeu ge kat pa ne peisuâ ra lei.

¹⁴“Mige pe ki Tingwang hangge ka’nchibe chang ra diepat’nchi gai dezai, chize yibe mei, siabe mei zainedu tingkupeu ne pemî riâ hang ’nsap kai ra lei; tingkupeu ne pemî riâ hang ’nsapkaibeibe luî ge bam ra lei.

¹⁵Zai diepat’nchigaipeu ne pe ki ze ’nri dai nei zai â chipau hangge rangkâng hang ’nsapkai’ndibe gu gene mengeu ge kat pa ne peisuâ ra lei, dezai chize pe gu chang ra de lei.

¹⁶“Mige pe ki dei ze Tingwang hangge peipat kai dizai â chige helei sâugutkaiduibe riâ gene nang pemî hang ’nsap ra lei; barli meu helei homer kat sâugairabe ge gepûtgeî pum mengeu mî riâ hangge ’nsap kai ra lei.

¹⁷Jubilee kum gene pa pe gu helu ze Hera hang peipat kai dizai â pemî riâ hang nang ne ’nsapkaibe luî gene ra lei;

¹⁸kane Jubilee châng gene pa pe gu helu peipat tizai â Jubilee kum wangchangdairabe tingkum riâ pie lu ze tingkupeu ne pemî riâ hang ’nsap kai ra lei, zai ning gu teriamtak luî gene pemî ze tew’nsîn gai ra lei.

¹⁹Zai chi helu peipatkaipeu zene chize ’nri dai nei zai â pemî hang ’nsapkaibe gu zene mengeu ge kat chige pa ne peisuâ ra lei, chidezai chize pe hang changzut te ra lei.

²⁰Kane pa ne chi helu ze ’nri dai nei mak mei nune pa ne chi helu ze miramme dage zua gai ’ndi mei zai â chize ’nridaichi lak te lei;

²¹kane chi helu ze jubilee ge peipat kai bei dezai Tingwang hangge ka’nchibe chang de ra lei; tew’nchigai’ndibe helu chang zeu; tingkupeu ne chize tei ra lei.

²²Pe gu kedei makbe miramme dagene pa ne luilube helu ze Tingwang hangge peipat kai dizai â

²³tingkupeu ne jubilee kum riâ hang chi helu hangge pemî ’nsap kai ra lei, zai pemî hang ’nsapkaibe rangkâng riak ze chipau mai ge Tingwang hangge ka’nchibe chang ze pei gai ra lei.

²⁴Jubilee kum ge â chi helu ze châu dagene lui mei, zai châu ne heram’mpau mei chipaupeu dage pei gai dai ra lei.

²⁵Pemî hang ’nsapkairabe ramme leine ze kakellumbeki gu shekel teibe tak luî gene ra lei: gerah ’ngkai zene shekel kat hang chang ra lei.

²⁶“Hekaubena ’nnakeuraibe leine, Tingwang gu changbe ze, mî ne du diepat’nchi-gaichi lak lei; getumsei mei nune meli mei chize â Tingwang gu lei.

²⁷Zai chize â ’nchimakbe hekaubena zat tizai â pemî hangge nang ne ’nsapkaibe luî gene pa ne lui dai ra lei, zai pemî ze mengeu ge kat peisuâ ra lei; zai chize ’nri dai maktizai â nang ne pemî hang ’nsapkaibeibe riâ gene chize zua ne ra lei.

²⁸“Kane mige pe dage bambe ziemmena mei, nune hekaune mei, nune pe ki lu mei, Tingwang hangge diepatkai’ndibe ze zua gai mak ra lei, zai ’nri de ’nri mak ra lei; diepatkai’ndibe zat leine â Tingwang hangge ’nchilangbe chang daseu.

²⁹Ziemmena ruagene tew’ngga ’nde ra chaupatkai’ndibe kau je â ’nri dai mak ra lei; pechu â tewchat ’nde ra lei.

³⁰“Heram gu kereu ge kat leine, mâ-himlei mei, nune hingbang rachî mei, chize Tingwang gu lei; chize â Tingwang dage ka’nchibe chang lei.

³¹Mi-mige pe gu kereu ge kat peigailube ’nri dai nei zai â mengeu ge kat pa ne kaisuâ ra lei.

³²Kebuidung benai melidung ruage kereîpeu tui ne seiwangbe ge pakereube leine ze â Tingwang hangge ka’nchibe chang ra lei.

³³Ziemmena mî de chize keyi kesia ’nneu mak ra lei, zai teika’ngngiakbe du tew mak ra lei; zai pa ne chize tei’ngngiak tizai â bamkuabe benai teika’ngngiakbe kena ze Tingwang hangge ka’nchibe chang ra lei; chize â ’nri dai mak ra lei,” kacheu de lei.

³⁴Airamme ze Sinai Loa ge Israelme hangge Mosabe dage Tingwang ne samdiegaibe hingde ramme de lei.