Read Zeme Naga LEBITIKAS 4 Bible Online

LEBITIKAS 4 - Zeme Naga bible

LEBITIKAS 4

¹Tingwang ne Mosabe je,

²“Israelbe chaname je acheu ze ranglia be lau, Tingwang ne hingde peigaibe mi-mige ne tewmau ze bam lêuzai,

³taudui ’nnuklube tingkupeu ne baudime peireige tewhemuigai’ndibe la zaine tew’nchi ra hangge getumseipoine heziâkgabe ne hemui-râ tew ra Tingwang dage peipat ra lei.

⁴Tingwang masuage ka’nduibe hetiampaîki kemui ge pa ne getumsei teiwang gai lu, getumsei peî ge pe ba die gai ra lei, zai Tingwang masuage getumsei tewchat kai ra lei.

⁵Zai hera-taudui ’nnuklube tingkupeu ne getumsei jai gesa lu lu ka’nduibe hetiampaîki ge teiwang gai ra lei;

⁶zai tingkupeu ne pe bakêrang hejai ge sûm gai lu Tingwang masuage kakellumbeki gu paîlimbe suage lua sena kezin gai ra lei.

⁷Zai Tingwang masuage ka’nduibe hetiampaîki lungge bambe mâ-perîmyibe rube herâtewbe-kaira gu mâkie ramme peireige tingkupeu ne hejai gêsa kai ra lei, zai getumsei jai ka’nsakbe leine ze â ka’nduibe hetiampaîki gu kemui ge bambe rûkambe-râtewbe gu herâtewbe-kaira pî kangge pa ne ruîpat kai ra lei.

⁸Zai hemui-râtewbe gu getumsei châ leine chigene pa ne lu ra lei, perai ramme ge pechâ ka’nnaibe benai paterai ramme ge pechâ bambe,

⁹zai bekia ge pa’ngkei kena ge pechâ bambe zai pa’ncheî ge paterai bambe ze pa’ngkei kena lupatbe ge pa ne lupat’mpamrabe ze

¹⁰(desieyibe kela peipatbe gu herâtewbe tumsei dagene lupatbe ramme gum ze), zai tingkupeu ne rûkambe-râtewbe gu herâtewbe-kaira gene chiramme rû gai ra lei.

¹¹Kane getumsei gei ramme, pe ji leine, bepeî, bepî ramme pelunglet ramme, zai pebâ

¹²ze kerie hela ’mbe pebâm ka’nchibe ge timbun tuâgaibe bâm ’mbe getumsei pumluî teipat ze heching peireige hemi gene chize rû ra lei; timbun tuâgaibe bâm ze rû ne ra lei.

¹³“Israel baudime ne chî mak ze hemuitewmau gai lu, zai baudime haimena mikngau gene chi hemui ze teibai ze Hera ne tew mak ra diegaibe mâge â kat penui tew gai dizai â kemaube chang de lei;

¹⁴penui hemui tâ tewgai’ndibe chipat tizai â, baudime ’nteumena ne hemui-râtewbe hangge getumpoine kat peipat ze chize ka’nduibe paîki suage teiwang gai ra lei;

¹⁵zai baudime gu gechîngme ne, Tingwang masuage getumsei peî ge penui ba die gai lu Tingwang masua gene getumsei tewchat kai ra lei.

¹⁶Zai hera-taudui ’nnuklube tingkupeu ne ka’nduibe hetiampaîki ’mbe getumsei jai gêsa teigut ra lei,

¹⁷zai tingkupeu ne pe bakêrang hejai ge sûm gai lu ze Tingwang masua ge paîliambe suage lua sena hejai kezin gai ra lei.

¹⁸Zai ka’nduibe hetiampaîki ge Tingwang masuage herâtewbe-kaira gu mâkie ramme ge hejai gêsa kenei gai ra lei; zai hejai ka’nsakbe leine ze â hetiampaîki kemuiki hiage rûkambe-râtewbe gu herâtewbe-kaira kangge ruî kam gai ra lei.

¹⁹Zai pechâ leine lu kam nan ze herâtewbe-kaira ge rû gai ra lei.

²⁰Chigum ze getumsei tei ze tew ra lei; hemui-râtewbe hangge getumsei ne tew gum ze aize du tew ra lei; tingkupeu ne penui hangge kelunbe-râtewbe tew gai ra lei, dezai penui je lun gai bu lei.

²¹Zai getumsei je kerie hela ’mbe pa ne teipat ra lei, zai keraîbe getumsei rû gum ze chize pa ne rû ra lei; chize baudime hangge hemui-râtewbe de lei.

²²“Samrampeu hangkat ne Tingwang pe Rapeu ne tew mak ra diegaibe mâ-zat kat â chî mak ze tew gai lu kemaube chang di lalêuzai â

²³pa ne maugai’ndibe hemui ze pechu chî ra pei gai dizai â pe gu kela peipatbe hangge heziâkgabe kemei’nsei kat pa ne teiwang ra lei,

²⁴zai kemei peireige pe ba die gai ra lei, dezai Tingwang masuage rûkambe-râtewbe gu mâ-tewchatbe bâm gene chize tewchat kai ra lei; chize hemui-râtewbe de lei.

²⁵Chidezai tingkupeu ne hemui-râtewbe gu hejai gêsa pe ba ne bua lu ze rûkambe-râtewbe-kaira gu mâkie ramme ge kai ra lei, zai chi hejai ’nsakpatbe ramme ze â rûkambe-râtewbe gu herâtewbe-kaira kangge ruî gai ra lei.

²⁶Zai desieyibe-râtewbe gu taudui gum ze chipau châ ramme leine pa ne herâtewbe-kaira ge rû gai ra lei; chigum ze tingkupeu ne pe gu hemui hangge kelunbe-râtewbe tew gai ra lei; chidezai pechu lun gai bu lei.

²⁷“Zai baudime ruage mi-mige ne Tingwang ne tew mak ra diegaibe zat ruage kat chî mak ze tew gai lu kemaube chang di lalêuzai â

²⁸pa ne maugai’ndibe hemui ze pechu chî ra pei gai dezai pe gu herâtewbe hangge kemeipui kat heziâkgabe pa ne teiwang ra lei, pa hemuigai’ndibe hangge zeu.

²⁹Zai hemui-râ tewrabe kaurui peî ge pe ba die gai ra lei, zai rûkambe-râtewbe bâm ge hemui-râtewbe kaurui tewchat kai ra lei.

³⁰Zai tingkupeu ne pe bakêrang ne hejai gêsa bua lu rûkambe-râtewbe-kaira gu mâkie ramme ge kai ra lei, zai hejai ka’nsakbe leine â herâtewbe-kaira kangge ruî gai ra lei.

³¹Zai pechâ leine desieyibe-râtewbe kela peipatbe ge bechâ lupat gum ze lupat kam gai ra lei, zai tingkupeu ne Tingwang dage mâ-perîmyibe chang ze herâtewbe-kaira ge chize rû gai ra lei; zai tingkupeu ne pe hang kelunbe-râtewbe tew gai ra lei, dezai pechu lun gai bu lei.

³²“Pa ne pe gu hemui-râtewbe hangge pe gu kela peipatbe hang melipoine teiwang zai â meli meleupui heziâkgabe pa teiwang ra lei,

³³zai hemui-râtewbe kaurui peî ge pe ba die gai lu, rûkambe-râtewbe bâm gu mâ-tewchat-chatbe bâm ge chize tewchat kai ra lei.

³⁴Chidezai tingkupeu ne hemui-râtewbe gu hejai ze pe ba ne bua lu rûkambe-râtewbe gu bekairakie ramme ge hejai kai ra lei, zai hejai ka’nsakbe leine herâtewbe-kaira kangge ruî gai ra lei.

³⁵Zai pechâ leine ze desieyibe-râtewbe peipatbe gene melipoine châ lupatbe luigum ze pechâ leine pa ne lupat kam gai ra lei, zai tingkupeu ne Tingwang dage hemi gene kela peipatbe chang ze herâtewbe-kaira ge chize rû gai ra lei; zai pa hemui tewgai’ndibe ze pe hangge tingkupeu ne kelunbe-râtew gai ra lei, dezai pechu lun gai bu lei.