Read Zeme Naga LEBITIKAS 5 Bible Online

LEBITIKAS 5 - Zeme Naga bible

LEBITIKAS 5

¹“Mige mâ ge â sakkitew ra baudime ne pe peireige mâ-ranggaibe pa ne seu lu zai pa ne ngau lu mei nune chî lu mei be ge sakkitew ra bam lu kane sapatkaimakbe ziegene pa hemuigai’ndibe ze â pa ne pe runne pe gu hemui-helut â pung ra lei.

²Makchai mige kahebâbe zat hekaubena gu herum mei nune kahebâbe kaurui zat gu herum mei nune kahebâbe zat pedungtew ze tatruabe zat gu herum mei chi kahebâbe zat peireige pa ne chî mak ze deîtau gai ’ndizai â pa ze hebâ di de lei, pa â kemaube chang gu lei.

³Makchai mi-mige ziemmena gu mâ-mâ ’nchimakbe peireige chî mak ze deîmau gai ’ndizai â pa chige hebâ gai ’ndi de lei, pa ne chize chîdaube luage pa maube chang gu lei.

⁴Makchai mige mâ-tâsiabe tew ra tew mei nu mâ-tâyibe tew ra tew mei ze pe mui ne pe meî ’mbene deseu gai ze sam damtruai-ruaigai’ndibe pa chîtaube luage pa mau di de lei, chize pa kemaube chang de lei.

⁵Airamme gu kat gene mige kemaube ge bamgaidibe luage pa tewmaugai’ndibe hemui ze pa ralia ra lei,

⁶zai pa tewmaugai’ndibe hangge kemaube-râtewbe hang melidung ruagene meleupui kat, melipoine kat mei nune kemei kat mei ze pa Tingwang dage teiwang gai ra lei; dezai pe gu hemui hangge tingkupeu ne kelunbe-râtew gai ra lei.

⁷“Kane pa ne melipoine peipat ra ga dizai â pa ne maugai’ndibe hangge Tingwang dage temaune kena mei nu depeine poine kena mei be pe gu kemaube-râtewbe hang chang ze pa teiwang gai ra lei; kat ze hemui-râtewbe hang zai kat zene rûkambe-râtewbe hangge zeu.

⁸Tingkupeu dage chiramme pa teiwang gai ra lei, keraîbe zene hemui-râ tew ra pa peipat kai ra lei; pa ne ’nruipoine peguang gene keriak ra lei, kane keriaktap zut mak ra lei,

⁹zai hemui-râtewbe kaurui jai ze herâtewbe bâm hiage gêsa kezin gai ra lei, zai hejai ka’nsakbe â herâtewbe-kaira kangge ’nzau gai ra lei; chize hemui-râtewbe de lei.

¹⁰Zai kat â hingdetewgaibe luigum ze rûkambe-râtewbe hangge peipat kai ra lei; zai tingkupeu ne pa hemui tewgai’ndibe hangge kelunbe-râtewbe pe hangge tew gai ra lei, dezai pechu lun gai bu lei.

¹¹“Kane temaune kena mei nu depeine poine kena mei ’nsangdu pa pei ra ga zai â pa tewmaugaibe hemui hangge kela peipatbe hang hemui-râtewbe hangge dekuîmoîne hit kat teiwang ra lei; chige taudui pa ne kai mak ra lei, zai mâ-perîmyibe du pa ne kai mak ra lei, chize â hemui-râtewbe kau daseu.

¹²Zai chize tingkupeu dage pa teiwang gai ra lei, zai chize tingkupeu ne bakui kat chibamrabe dam ze lu lu herâtewbe-kaira ge hemi gene Tingwang hang kela peipatbe gum ze rû gai ra lei; chize hemui-râtewbe de lei.

¹³Aigum ze tingkupeu ne ziemmename mâ-tewmaube hemui hangge kelunbe-râtew gai ra lei; dezai pechu lun gai bu lei. Zai ka’nsakbe leine â mâ-hîmlei-râtewbe ge gum ze tingkupeu hang chang kam ra lei,” ze kacheu de lei.

¹⁴Tingwang ne Mosabe je,

¹⁵“Mi-mige mâ-kemakbe tewkie gai ze Tingwang gu ka’nchibe merua ramme zat peireige chikâ lu hemui tâ tewbe kau ze Tingwang dage pe gu kemaube-râtewbe hangge melidung ruagene heziâkgabe meli’nsei kat pa teiwang ra lei, kakellumbeki gu shekel riambe tak gene gepûtgeî pum ramme mî riâ hangge nang ne chak kai lu zeu; chize kemaube-râtewbe de lei.

¹⁶Zai mâ-ka’nchibe peireige deîmaugai’ndibe pa ne peiruî dai ra lei, haî kat gu tûm mengeu ge tûm kat pa peiruî ra lei, chize tingkupeu je pa pei ra lei; zai tingkupeu ne hedieka’ngkabe-râtewbe meli’nsei ne tei ze desieyibe-râtewbe pe hangge tew gai ra lei, dezai pechu lun gai bu lei.

¹⁷“Mi-mige de Tingwang ne tew-se-lau-laube tew ze hemui tâ tewbe kau â pa ne chî mak ze tew lêuzaidu pa maudibe chang ze pa ne pe gu hemui-helut pung gu lei.

¹⁸Nang ne pemî riâ hang ’nsapkaibeibe gene kemaube-râtewbe hang meli’nsei pedung ruage kat tingkupeu dage pa ne teiwang gai ra lei, dezai pa ne chî mak ze tâtewmaugai’ndibe hangge tingkupeu ne pe hang kelunbe-râtew gai ra lei, dezai pechu lun gai bu lei,

¹⁹chize kemaube-râtewbe de lei; Tingwang masuage pa â kemaube chang de lei,” ze rang lei.