Read Zeme Naga LEBITIKAS 6 Bible Online

LEBITIKAS 6 - Zeme Naga bible

LEBITIKAS 6

¹Tingwang ne Mosabe je,

²“Mige pa ne rangkângreibe lam gene mei, nune kedungteube lam gene mei, nune hemui gai ze Tingwang peireige mâ-hang du chak kai mak bei mei, makchai pa ne pe ramna’mpeu je getatgetie bei mei,

³nune, mâ-mâ tew’ngga’ndibe ngaudau lu kegitsiak ze ngau mak run lei pa kacheu mei—ziemmename ne aigumbe tâ ramme tew ze bambe ge,

⁴mige hemui gai nan ze mau gai ’ndizai â pa ne sutbe gene mei, makchai tewgetadkaibeibe gene mei, pe dage rangkâng reî ra kaibeibe gene mei, nune mâ-mâ tew’nggagaibeibe pa ne ngaudaulube gene mei,

⁵nune karasa ne deseugaibe gene ngaube gene mei, pa ne mâ-mâ ngaulube leine pa peipat kai dai ra lei; pa ne pelane peipat kam gai ra lei, zai chige mengeu ge kat kaisuâ gai ra lei, zai pe gu kemaube-râtewbe mai dezai chize pa’mpau changme je pei gai ra lei.

⁶Hedeka’ngkabe-râtewbe melidung ruagene nang ne ning gai ze peipatduibe meli besei heziâkgabe ne mâ-tewmaube-râtew ra Tingwang hang tingkupeu dage nang teiwang ra lei.

⁷Zai tingkupeu ne Tingwang masuage desieyibe-râtew gai ra lei, dezai pa ne mâ-tewmaube leine lun gai bu lei,” ze kacheu de lei.

⁸Tingwang ne Mosabe je,

⁹“Aaronbe benai pe name je, acheu ze die gai lau, Aize rûkambe-râtewrabe sietak lei: Rûkambe-râtewbe peipatbe ze herâtewbe-kaira ge herâtewbe bâm ’nchui sing ge kaitingba gai ra lei, zai herâtewbe-kaira gu hemi ze peize tau bam ra lei.

¹⁰Zai tingkupeu ne pe paî, linen paî bâ lu ze, linen pelungtelong duibe kai ra lei, zai herâtewbe-kaira ge kela peipatbe rûmutkaibe merui ze lu lu ze, herâtewbe-kaira hiage pa ne kai ra lei.

¹¹Zai pa ne pe puâ ramme lutua nan ze kêdabe puâ kai lu chi merui ramme tei lu ze kerie hela ge pebâm ka’nchibe ge teipat kai ra lei.

¹²Zai herâtewbe bâm ge hemi ze tau bam ra lei, chize tew’mmit mak ra lei; zai hechua ’nsangne tingkupeu ne heching dik kai bam ra lei, zai rûkambe-râtewbe gu ze chige kai zun gai ra lei, zai desieyibe-râtewbe kela peipatbe kaurui châ chige rû gai ra lei.

¹³Herâtewbe-kaira ge hemi ze peize tau bam ra lei; chize tew’mmit mak ra lei.

¹⁴“Zai aize mâ-hîmra peipatrabe sietak aigum ze tew ra lei. Aaronbe name ne Tingwang masuage chize herâtewbe-kaira ge peipat kai ra lei.

¹⁵Chidezai hangkat ne mâ-himlei-râtewbe peipatbe ge mâ-perîmyibe zat leine bambe benai mâ-himlei-râtewbe peipatbe gu dekuîmoîne yibe taudui kai’mpamgaibe bakuî kat tei ra lei, zai aize Tingwang dage mâ-perîmyibe peipatbe hang chang ze ai chibamrabe dam hang gum ze rû gai ra lei.

¹⁶Zai bepeirei ’nsakpatbe leine ze â Aaronbe benai pe name ne teu kam ra lei; chize pebâm ka’nchibe ge ’nduihî kai mak ze penui teu ra lei; ka’nduibe hetiampaîki rielung gene penui chize teu ra lei.

¹⁷’Nduihî kai mak ze chize lang ra lei. Hemi gene a gu mâ-kela peipatbe ze tingkume dam hangge I ne pei gai de lei; chize â hemui-râtewbe benai kemaube-râtewbe gu gum ze ’nchilangbe zat chang lei.

¹⁸Aaronbe chaname ruage ’mpeumi leine ne chize teu dui lei, chize Tingwang hangge rûkambe-râtewbe kela hemi gene peipatbe ze betingbeta ningnui dagene reheipiakeume hang samde chang zeu; chiramme ze penui dagene deîtaugai-gaime ze â ’nchi du lei” kacheu de lei.

¹⁹Tingwang ne Mosabe je,

²⁰“Aize Aaronbe benai pe name ne penui hangkat-kat je hera-taudui ’nnukkaibe mai ge Tingwang dage herâtewbe peipatkairabe de lei: mâ-himlei-râtewbe peibamrabe hangge dekuî yibe ephah kat gu tûm kereu ge tûm kat, chigene hegî benai hechua hang pa’mpi-pi ra lei.

²¹Chize taudui kai lu ze teleu ra lei; mâ-himlei-râtewbe gu gum ze tew’nchiâm ze teleu lu taudui ne chize kebut zun lu nang ne Tingwang dage mâ-perîmyibe peipatbe hangge chize peipat kai ra lei.

²²Aaronbe name tingkume ruage pechu leî ra hera-taudui ’nnukkai’ndipeu ne chize Tingwang dage mâ-perîmyibe hang gum ze betingbeta peipat ze bam ra lei; chize pelane rû kam gai ’nde ra lei.

²³Tingkupeu gu mâ-hîmra peipatbe leine ze rû kam ne ra lei, chize mâ de teu mak ra lei” ze kacheu de lei.

²⁴Tingwang ne Mosabe je,

²⁵Aaronbe benai pe name dage salia lau, aize hemui-râtewbe hingde lei. Tingwang masuage rûkambe-râtewbe gu mâ-tewchatbe bâm gene hemui-râtewbe gu mâ-tewchat ra lei; aize ’nchilangbe kau lei.

²⁶Chize peipatkaipeu, tingkupeu ne teu ra lei; ka’nduibe hetiampaîki rielung ge pebâm ka’nchibe gene chize teu ra lei.

²⁷Chi hemei deîtau-taume â ’nchi du lei; zai paî ge hejai kezintera gai mau dizai â chipau paî ze chi pebâm ka’nchibe gene geta ra lei.

²⁸Zai hemei langbe hegamli ze tewpâng ne ra lei; hetageîli gene hemei lang zai â heli chiam zun lu hui’nchichiak kai ra lei.

²⁹Tingkume ruage ’mpeumi leine ne chize teu dui lei; chize â ka’nchibe kau lei.

³⁰Kane pebâm ka’nchibe gene kelunbe-râtew gai ra ka’nduibe-paîki lungge hejai teigut ra hejai lube hemui-râtewbe gu ze â tew mak ra lei; chize hemi ge rû’ngga kam gai ne ra lei.