Read Zeme Naga LEBITIKAS 7 Bible Online

LEBITIKAS 7 - Zeme Naga bible

LEBITIKAS 7

¹“Aize kemaube-râtewbe sie de lei. Aize ’nchilangbe kau lei.

²Rûkambe-râtewbe mâ-tewchatbe bâm gene kemaube-râtewbe gu mâ-tewchat kai ra lei, zai herâtewbe-kaira ze hejai ne kezin-guâ gai ra lei.

³Pechâ ramme leine peipat kai ra lei; pemibei châ zai,

⁴paterai ramme, zai pa’ngkei kena benai pechânûp ramme, zai pa’ncheî benai paterai ramme, zai bekialeu ge pechâ bambe lupat’mpam ra lei.

⁵Zai tingkupeu ne Tingwang hangge herâtewbe-kaira hemi peireige kela peipatbe ze rû ra lei, chize kemaube-râtewbe lei.

⁶Zai ’mpeumi tingkume leine chize penui teu ra lei; pebâm ka’nchibe gene teu ra lei; chize â ’nchilangbe lei.

⁷Kemaube-râtewbe â hemui-râtewbe gum lei, chiramme hangge hingde â kat lei, chige desieyibe-râtewpeu tingkupeu ne hemei ze lu ra lei.

⁸Rûkambe-râtewbe kaurui gei ze â herâtewpeu tingkupeu ne lu ra lei.

⁹Mâ-hîmra peipatbe dekuî mâ-kagetabe kuak gene mei nu hekuak gene mei ze kagetabe leine pualiapeu tingkupeu hang chang ra lei.

¹⁰Kela peipatbe dekuî leine taudui ne keneilube zai keneimakbe du Aaronbe name bau ne chize penui ruage ’nzi’nsamrap ra lei.

¹¹“Aize Tingwang dage kela pualiabe aigum ze pualia ra lei, desieyibe-râtewbe kela peipatrabe sietak hangge zeu.

¹²Mi-mige de hesuiyibe kela peipat zai â hesuiyibe-râtewbe ’nduihî kai mak ze taudui ne keneigaibe tingku, dekuî yibe taudui ne keneilube tingku ne peipat ra lei.

¹³Desieyibe-râtewbe hangge hesuiyibe kela peipatbe ze â ’nduihîkaibe tingku ne pualiâ ra lei.

¹⁴Kela peipatbe hangge peipatbe zat kat ge kat-kat peipat ra lei; chize desieyibe-râtewbe kaurui jai kakezinpeu tingkupeu dam hang chang ra lei.

¹⁵Hesuiyibe desieyibe-râtewbe meiji teu kam ra lei, chi herâtewbe mai gezeu; bechai mai hechua hangge ’nsak kai mak ra lei.

¹⁶Kane pa deseutewbe gu kela peipatbe-râtewbe mei nu pe suiyi ze peipatbe, chi herâtewbe mai ge teu ra lei; zai teu’nsakpatbe â bechai mai hechua ge teu ra lei.

¹⁷Kane herâtewbe meiji hezie pakechumbe bamchang dizai â rû ne ra lei.

¹⁸Zai desieyibe peipatbe-râtewbe meiji hezie kechum teuchang dizai â lu ra mak lei, peipatpeu ze du peipatbe hangge riam gai ra mak lei; chize kahebâbe chang de lei, zai mi-mige de chize teume â bechâng ge pe mâu pe miê ze pa ne pung ra lei.

¹⁹Zai chi hemei ze besie gene ’nchimakbe deîtau gai ’ndizai â chize teu mak ra lei, kane rû ne ra lei.

²⁰Kane mige Tingwang gu desieyibe-râtewbe meiji ze pa kahebâbe luî gene teube kau je â pe gu baudime ruagene tuâpat ne ra lei.

²¹Zai mige ne ziemmena gu kahebâbe zat mei nu hekaubena kahebâ zat mei mâ-kahebâbe katenetbe zat mei pa ne deîtau gai lu ze Tingwang gu desieyibe-râtewbe meiji pa ne teu gai dizai â pe gu baudime ruagene chipaupeu je tuâpat ne ra lei,” ze kacheu de lei.

²²Tingwang ne Mosabe je,

²³“Getum mei, meli mei nu kemei châ mei ze ningnui teu mak ra lei.

²⁴Pe runne ’ntane chaibe, zai mâ-mâ ne ’ngkîchatbe hekaubena châ ningnui teu mak ra lei, kane mâkedadabe tâudeu ge tei ze tew dui lei; kane chize ningnui teu mak ra lei.

²⁵Mi-mige de Tingwang hangge hemi ge kela peipatkaibe taudui teu zai â chi teupeu je â pezat ruagene tuâpat ne ra lei.

²⁶Ningnui lunggaibe bâm leine ge hejai, kacheube, ’nruine mei hekaune jai mei be ningnui teu mak ra lei.

²⁷Zai mi-mige hejai teume chigumbe kau je â pezatme ruagene pechu lutua ne ra lei, ze Israelme chaname ze ranglia be lau” ze kacheu de lei.

²⁸Zai Tingwang ne Mosabe je,

²⁹“Tingwang dage mi-mige du pe gu desieyibe-râtewbe peipatkaibe kau ze Tingwang dage pe gu peipatbe ze teiwang gai ra lei.

³⁰Tingwang hangge hemi ge kela peipatbe ze pa ne pe ba sing ne teiwang ra lei; pechâ ze pegara ge teri ze nang teiwang ra lei; zai pegara ze â kakezapbe-râtewbe hang Tingwang masuage kezap kai ra lei.

³¹Tingkupeu ne herâtewbe bâm ge pechâ rû gai ra lei; kane pegara ze â Aaronbe benai pe name dam hang chang ra lei.

³²Ning gu desieyibe-râtewbe hangge hezat’mbia ba’ngkoâk latpatlube ze tingkupeu je nang pei ra lei;

³³Aaronbe name ruage hangkat desieyibe-râtewbe gu hejai benai pechâ peipatkaipeu ne hezat’mbia ba’ngkoâk pe dam hang lu ra lei.

³⁴Pegara kezapkai’ndibe benai pa’ngkoa peipatkai’ndibe ze Israelme dagene, penui gu desieyibe-râtewbe gene I ne chize lu lu tingkupeu Aaronbe benai pe name hang pei gai de lei, Israelme lam gene chi peipat bamrabe zeu.

³⁵Aize Tingwang dage hemi gene herâtew ze peipatkaibe gene Aaronbe benai pe name tingku chang ze Tingwang dage tâ’nggua ra penui je teiwanggaibe mai ge tew’nchigai’ndime penui gu dam de lei;

³⁶aize penui gu hera-taudui ’nnukkaibe mai ge Israelme leine ne penui je pei gai be ra Tingwang ne samdie gai de lei; aize â penui rehei leine ge peipatbamrabe hang de lei,” ze kacheu de lei.

³⁷Ai rûkambe-râtewbe, mâ-himlei-râtewbe, kemaube-râtewbe, tewka’ntipbe-râtewbe zai desieyibe-râtewbe gu hingde ramme de lei,

³⁸Sinai hênamkang ge Tingwang ne Israelme je penui gu kela peipatbe ramme teiwang gai ra diegaibe mai ge Sinai Loa gene Tingwang ne Mosabe dage diegaibe zeu.