Read Zeme Naga LEBITIKAS 8 Bible Online

LEBITIKAS 8 - Zeme Naga bible

LEBITIKAS 8

¹Tingwang ne Mosabe je,

²“Aaronbe benai pe name je nguawang lau, hepaîni ramme, hera-taudui ’nnukrabe, hemui-râtewrabe getumsei zai meli’nsei kena zai ’nduihîkaimakbe tingku rak-hau kat zeu;

³zaine ka’nduibe-paîki kemui ge ziemmena ’nteumena je kûwang gai lau,” ze kacheu de lei.

⁴Zai Tingwang gu samde luigum ze Mosabe ne tew de lei; zai ’nteumena hetiampaîki kemui ge wangka’ndui de lei.

⁵Mosabe ne ziemmena wangka’nduime je, “Aize Tingwang ne tew ra diegaibe de lei,” kacheu de lei.

⁶Zai Mosabe ne Aaronbe benai pe name je nguawang ze hedui ne besietew ze hui gai de lei.

⁷Chidadege mechua kai lu, bekia ge kiakâk kak kai lu, zai mechuapui kai lu, tingku mechua kaipeî gai de lei; tingku mechua kak kai ra dekune ge heziâk kai ze dakzunlube ne kak kai de lei, chi ne kakgim gai de lei.

⁸Pe gachûp kaipeî gai de lei; zai pe gachûp ge Urim benai Thummin kai de lei.

⁹Zai heziakpaî pe peî ge pe peî’nggau kebit kai lu, pe sua’mbia gechâk kai lei, diepat’nchigaibe ka’nchatbe Tingwang ne Mosabe je samde peibeibe luigum ze tew de lei.

¹⁰Dadege Mosabe ne ka’nnukbe taudui tei lu, heraki benai pelung ge merua bambe leine taudui ’nnuk kai ze tew’nchi gai de lei.

¹¹Zai taudui gêsa tei lu, herâtewbe-kaira ge lua sena kezin gai de lei; zai herâtewbe-kaira benai pe gu kenat leine zai mi ju ka’mpiaube hegeî’ntui, zai hegeî’ntui-kaira kang du tew’nchi ra taudui ’nnuk kai de lei.

¹²’Nnukrabe taudui ze Aaronbe peî ge pa ne ruî gai lei, taudui ’nnuk ze tew’nchi gai lei.

¹³Chipau chângge, Tingwang ne Mosabe je samde peigaibe luigum ze Aaronbe name je Mosabe ne nguapat lu, penui peireige mechua kai lu dekune ne penui peî’nggau kebit kai de lei.

¹⁴Zai hemui-râtew ra getumsei gauwang lu, Aaronbe benai pe name hangge hemui-râtew ra getum peî ge penui ba die gai de lei.

¹⁵Chize Mosabe ne tewchat lu pe jai lu lu, desieyibe-râtewbe-kaira hangge hejai ge pe bakêrang sûm gai lu herâtewbe-kaira gu mâkie ramme ge hejai giakguâ gai lu, zai herâtewbe-kaira tew’nchi lu, herâtewbe-kaira pî kangge hejai ruî gai ze tew’nchi gai de lei.

¹⁶Zai paterai luî zai pa’ncheî benai penûp ramme, zai pa’ngkei kena benai pechâ ramme lu lu, Mosabe ne ’mmang ge rû gai de lei.

¹⁷Zai Tingwang ne Mosabe dage sam ranggaibe luigum ze, getumsei â pegei benai peji, zai pebâ ze kerie hela ’mbene ru de lei.

¹⁸Zai rûkambe-râtewbe gu meli’nsei ne pa ne kela peipat te lei, zai Aaronbe benai pe name ne meli’nsei peî ge penui ba die gai de lei.

¹⁹Zai Mosabe ne meli’nsei tewchat te lei, zai herâtewbe-kaira hiage hejai ne kezin-guâ gai de lei.

²⁰Zai meli’nsei ji ze dim lu, bepeî benai pejikâng ramme benai pechâ ramme rû gai de lei.

²¹Chidadege Tingwang ne Mosabe je samde peigaibeibe luigum ze pelunglet benai bepî ramme hedui ne hui lu herâtewbe bâm ge meli’nsei pumluî Mosabe ne rû kam gai de lei, chize mâ-perîmyibe hangge rûkambe-râtewbe kela peipat kai lei, zai Tingwang hangge hemi ge kela peipatbe kai de lei.

²²Chidadege Mosabe ne meli’nsei kêdabe tingkume je tew’ntip kai ra hangge teiwang de lei; zai Aaronbe benai pe name ne meli’nsei peî ge penui ba die gai de lei.

²³Zai Mosabe ne meli’nsei tewchat lu, hejai lu lu, Aaronbe kun hezat’mbia ge kenei gai zai hezat’mbia ba ’njûngpui ge zai hezat’mbia pî ’njûngpui ge hejai kenei gai de lei.

²⁴Zai Aaronbe name je Mosabe ne ngua lu, penui kunsoî hezat’mbia ge, penui ba hezat’mbia ba ’njûngpui ge, penui pî hezet’mbia ’njûngpui ge hejai kenei gai de lei; zai herâtewbe-kaira hiage hejai kezin-guâ gai de lei.

²⁵Zai pechâ ramme pemibei châ ramme, zai paterai ramme, pa’ncheî nûp ramme, zai pa’ngkei kena benai pechâ ramme, zai pa’ngkoa hezat’mbia lu lu,

²⁶Tingwang masuage ’nduihîkaimakbe tingku rak-hau bung gene tingku kuak kat, zai taudui keneigailube kuak kat, zai tingkuliâp kat lupat lu, pechâ benai hezat’mbia ’ngkoa peireige kai lu diepat’nchi gai de lei.

²⁷Chiramme leine Aaronbe benai pe name ba ge pei gai de lei; zai chiramme Tingwang masuage kakezapbe-râtewbe peipat gum ze kezap kai de lei.

²⁸Chidadege Mosabe ne chiramme penui ba gene lu lu, rûkambe-râtewbe kela peipatbe peireige pa ne rû gai de lei, chize tew’ntipkaibe kela peipatbe gum ze mâ-perîmyibe Tingwang hangge hemi ge kela peipat kai de lei.

²⁹Zai Mosabe ne pegara lu lu, kakezapbe-râtewbe gu kela lu lu Tingwang masuage chize kezap kai de lei; chize tewka’ntipbe meli’nsei ze Mosabe dam de lei, Tingwang ne Mosabe je samde pei gai gum zeu.

³⁰Chidadege Mosabe ne ’nnukkairabe taudui benai herâtewbe-kaira ge hejai bambe lu lu ze, Aaronbe peireige zai pe puâ ge kezin gai de lei, zai pe name peireige zai pe name puâ ramme ge du kezin gai ze diepat kam gai de lei, pe dage pe name, zai pe name paî ge kezin gai de lei.

³¹Zai Mosabe ne Aaronbe benai pe name je, “Ka’nduibe-paîki kemuiki hiage hemei lang lau, Aaronbe benai pe name ne chize teu ra lei, ze I ne diegaibe luigum ze chige kela peipatbe tew’ntipkaibe rak-hau gene tingku lu lu teu lau.

³²Zai hemei benai tingku teuka’nsakbe ramme â rû ne ra lei.

³³Tewka’ntipbe mai kam mak tâne kakellumbe-paîki kemuiki put kai mak ze hezie senane bam ra lei; ningchu tewka’ntipbe mai kam mak tâne bam ra lei; ningchu tew’ntip kai ra hezie sena ka’nnang daseu.

³⁴Nemai tew gum ze ning hangge desieyibe-râ tew ra Tingwang ne samde pei gai lei.

³⁵Kakellumbe paîki kemuiki hiage hezie sena kemuî-keba ningnui bam ra lei, ningnui chai mak ra hangge Tingwang gu samde peibe ningnui tewpui ra lei; chigum ze I ne samde pei gai lei” kacheu de lei.

³⁶Mosabe dagene Tingwang ne samdiegaibe leine Aaronbe benai pe name ne tew de lei.