Read Zeme Naga LEBITIKAS 9 Bible Online

LEBITIKAS 9 - Zeme Naga bible

LEBITIKAS 9

¹Zai hezie padesatbe mai ge Mosabe ne Aaronbe benai pe name zai Israelme gechîngme je kû gai de lei;

²zai pa ne Aaronbe je, “Hemui-râtew ra getumseipoine heziâkgabe zai rûkambe-râtew ra meli’nsei heziâkgabe gaupat lu ze, Tingwang masuage peipat kai lau.

³Zai Israel chaname je, ‘Hemui-râtew ra kemei’nsei kat, zai rûkambe-râtew ra getumpoine heziâkgabe kum kat kau kat, zai melipoine heziâkgabe kum kat kau chi kena

⁴zai desieyibe-râtew ra getumsei kat, zai taudui kebutlube mâ-hîmra peipatbe ze tei le lau, nemai ningnui dage Tingwang liâ gu daseu,’ ze rang gai lau,” ze kacheu de lei.

⁵Mosabe ne diegaibeibe luigum ze, kakellumbe-paîki ziêsua ge mâ-mâ ramme penui teiwang gai de lei; zai ’nteumena wang’nna lu ze Tingwang masuage sap kai de lei.

⁶Chidadege Mosabe ne, “Aize ningnui tew ra Tingwang ne samde pei gai lei, chidezai Tingwang ngeudibe ningnui ruage liâ ze bam gu lei,” kacheu de lei.

⁷Chidadege Mosabe ne Aaronbe je, “Herâtewbe-kaira ’mbe wang’nna lau, ningnui gu hemui-râtewbe, zai rûkambe-râtewbe ningnui kela peipatbe pualia ze, ning hang benai baudime hangge desieyibe-râtew le lau; zai baudime gu herâtewbe kela peipatbe ze teiwang lau, zai penui hangge desieyibe-râtew lau; Tingwang gu samdiegaibe luigum zeu,” acheu bei de lei.

⁸Dadege Aaronbe herâtewbe-kaira taige wang’nna gai de lei, zai pe runne pe hangge hemui-râtew ra getumpoine pa tewchat te lei.

⁹Zai Aaronbe name ne hejai ze pe dage pei gai de lei, dadege hejai ge pa ne pe bakêrang sûm gai lu herâtewbe-kaira gu mâkie ramme ge kai de lei, zai herâtewbe-kaira pî kangge hejai ruî gai de lei,

¹⁰kane hemui-râtewbe gu pechâ pa’ngkei zai pa’ncheinûp ramme herâtewbe bâm ge rû gai de lei, Tingwang ne Mosabe je samdiegaibeibe luigum zeu.

¹¹Zai peji benai pegei â kerie hela ’mbe rû gai de lei.

¹²Zai pe runne hang rûkambe-râtewbe kaurui pa ne tewchat kai de lei; Aaronbe name ne hejai ze pechu pei gai bei de lei, zai pa ne herâtewbe-kaira ge hejai ze ruîguâ gai de lei.

¹³Zai penui ne rûkambe-râtewbe pum jikâng kat-kat ze bepeî benai pei bei de lei; zai pa ne chiramme herâtewbe-kaira ge rû gai de lei.

¹⁴Zai paterai ramme, zai bepî ramme hui lu ze rûkambe-râtewbe herâtewbe-kaira ge pa ne rû gai de lei.

¹⁵Chidadege baudime gu kela peipatbe ze pualia de lei, zai baudime gu hemui-râtew ra kemei gaupat lu, tewchat kai de lei, besua’ngka ge hemui-râtewbe gum ze hemui-râtewbe peipat kai de lei.

¹⁶Zai pa ne rûkambe-râtewbe peipat kai de lei, besie-hingde luigum peipat kai de lei.

¹⁷Zai mâ-hîmra peipatbe-râtewbe peipat kai de lei, zai chigene mâ-hîmra bakui kat lu lu ze herâtewbe-kaira ge chize rû gai lei; aize nai’nsangne hechua ge rûkambe-râtewbe peireige kaisuâ gai de lei.

¹⁸Baudime hangge desieyibe-râtew ra getumsei benai meli’nsei pa ne tewchat kai de lei; zai Aaronbe name ne hejai ze pechu pei bei de lei, chize pa ne herâtewbe-kaira ze hejai ne kezin-guâ gai de lei,

¹⁹zai getumsei châ benai meli’nsei châ pemibei châ paterai ramme, pa’ngkei zai pa’ncheinûp ramme pechu pei bei de lei;

²⁰zai pechâ ze pegara ge kai lu, herâtewbe-kaira ge penui ne teiwang gai bei de lei, zai herâtewbe-kaira ge pa ne pechâ ze rû gai de lei.

²¹Kane pegara benai hezat’mbia’ngkoa â Aaronbe ne Tingwang masuage kakezapbe-râtewbe hangge Mosabe ne diegaibe luigum ze kezap kai de lei.

²²Dadege Aaronbe ne baudime lam’mbe pe ba ba na lam getuachu lu ze ’nnam gai de lei; zai hemui-râtewbe benai rûkambe-râtewbe kela peipatbe, zai desieyibe-râtewbe kela peipatbe pualiâ kam lu dege pa wangkeu di de lei.

²³Zai Mosabe benai Aaronbe â kakellumbe-paîki ’mbe gut ti de lei; zai penai pat dai dege baudime je ’nnam gai de lei, dadege Tingwang ngeudibe ’nteumena peireige liâ gai de lei.

²⁴Zai Tingwang suagene hemi pat te lei, zai chigene rûkambe-râtewbe kela peipatbe benai pechâ ze herâtewbe bâm ge rû ’ngga ’ndi de lei; zai chize baudime ngau lu ’nrungriau bam de lei, zai penui kei’ngkumrim bam de lei.