Read Zeme Naga JEREMIA 1 Bible Online

JEREMIA 1 - Zeme Naga bible

JEREMIA 1

¹Jeremiabe Hilkiabe na Benjaminram Anathoth ge tingkume ruage hangkat changpeu gu sam ramme,

²Amonbe na Josiabe Juda gu heguang ting, pa ne kaheguangbe kereu ze kechum kum ge Tingwang gu sam wangchangbe pa ne sabe ze aize lei.

³Josiabe na Jehoiakimbe Juda gu heguang ting ge du chize wangchang bam lei, Josiabe na Zedekiabe ting, kereu ze kat kum nâlangbe ting, zai Jerusalem kebang nimbe pamengeube kêu chang zeu.

⁴Chuna Tingwang gu sam a dage wangchang ze acheu sa lei,

⁵“Nebâm ge ningchu I ’ndamgairabe suage I ne ningchu chî lu de lei, zai ningchu lung makge I ne ningchu diepat’nchi gai lu de lei; heram ramme ge kemeu’mpeu hang ningchu I sum gai de lei,” acheu zeu.

⁶Dadege I ne, “Hei Tingwang Hera gau! pie le lau, I â hena di rei daze sam sarabe tak chî mak lei,” kacheu de lei.

⁷Kane Tingwang ne achu rang ze, “ ‘I hena rei lei,’ acheu se lau; I ne langgaime leine dage nang tat ra lei, zai I ne ’ndaikau die gai mei be leine nang sa ra lei.

⁸Penui je hing se lau, ningchu meupat kai ra ning dage I la daseu,” ze Tingwang ne kacheu de lei.

⁹Dadege Tingwang pe ba getuapat ze a mui dei gai de lei, zai Tingwang ne achu rang ze, “Pie le lau, a sam ramme ning mui ge I kai ’nde lei.

¹⁰Pie le lau, heram ramme, zai heguangram leine peireige teitat ’nde ra, zai tewkau ’nde ra, tew’nsia kam ’nde ra, zai lutua ’nde ra, teichu gai ra, zai sum gai ra nemai ge ningchu I ne sum gai de lei,” ze kacheu de lei.

¹¹Zai Tingwang sam a dage wangkeu ze, “Jeremiabai nang ’ndaikau ngau lau?” kacheu de lei. Zai I ne “I almond tui ngau lei,” acheu bei de lei.

¹²Dadege Tingwang ne achu, “Nang ne ngaudesi lu de lei. I chize tew gai ra hangge a sam peireige I pie bam dadegeu,” kacheu de lei.

¹³Tingwang gu sam pakenabe a dage wangkeu ze, “’Ndaikau nang ngau lau?” ze kacheu de lei. Zai I ne, “Heli tapribe tingpeî ’mbia ’nriktattibe ngau lei,” acheu bei de lei.

¹⁴Dadege Tingwang ne achu, “Heram ge bamme leine peireige tingpeî ’mbia ne kesiabe ’ndetpat ku lei.

¹⁵Pie le lau, tingpeî ’mbia bambe heguangram ramme ge bambe hezat leine je I ne kû gai gu daseu, ze Tingwang ne kacheu de lei; zai penui wang ze haimena ne Jerusalem keriekemui ramme gutbe keriengdi tewguâ ze Juda namdi leine ge pe gu heguang-bamrâ sum gai gu lei.

¹⁶Zai achu sâugai’ndibe ziegene penui kesiabe tewbe hangge zeu; kêdabe hera ramme hangge penui perîmyibe ’ntaugaibe ziegeneu, zai penui batâ ramme je kakellumbe ziegene penui peireige a gu samrambe I saba gai gu lei.

¹⁷Kane nang â ning kia ’ngkang gai le lau; chu lu ze I ningchu ranggaibe leine penui je salia be lau. Penui ziegene ning lung depâp ze bam se lau, penui suagene I ne ningchu tewhelêu gai mak ra hangge zeu.

¹⁸Pie le lau, nemai ge heram leine ne, Juda heguangme ne, heguangsinme ne, tingkume ne, zai heram deiname ne ’nggi sede nang â peranchibe namdi gum, hegeî chia benai hetageî kerie gum ze chang ra I ne ning chu tew gai bu lei.

¹⁹Penui ne ningchu ’nggi gu lei; kane penui ne ningchu duî ra mak lei, ningchu meupat kai ra hang ning dage I bam daseu,” ze kacheu de lei.