Read Zeme Naga JEREMIA 11 Bible Online

JEREMIA 11 - Zeme Naga bible

JEREMIA 11

¹Tingwang dagene Jeremiabe dage sam wangbe:

²“Aipau samhatkaibe gu sam ramme ’ngking le lau, zai Juda ge lungme benai Jerusalem name dage salia lau.

³Penui je nang salia ra lei, Tingwang Israelme Rapeu ne aigum ze rang lei zeu: Aipau samhatkaibe ramme ’ngkingmakbe kau je â deset kai ’nde lei.

⁴Ijipram hegeî taube bâm gene penui je I nguapat ’ngka ningnui peume dage I samdie gai ze, acheu ze, A kuâ ’ngking le lau, zai I samdiegaibe leine tew lau. Chigum ze ningnui a gu ziemmename chang gu zai I ne ningnui Rapeu chang gu lei,

⁵chidezai nemai riâ chang ze tungdui benai ’ngkuidui ne luabe heram ze ningnui pau-paime je pei gai ra I deseulube I hatbe tâ tew ra hangge zeu,” kacheu de lei. Dadege I ne kak ze, “Chize peize chang lau, Tingwang gau,” kacheu de lei.

⁶Zai Tingwang ne achu rang ze, “Aipau sam ramme leine Juda namdi leine ge, zai Jerusalem ’mpuîhimdi leine ge saba gai lau: Aipau samhatkaibe sam ramme ’ngking ze, zai chiramme tew lau.

⁷A kuâ ’ngking le lau, ze ningnui peume je Ijipram gene nguapat ’ngka gene penui je ’ntîng ra rang sau mak ze, chuna ting chang ze I rang bam de lei,

⁸Acheubeisede penui pheu mak zai penui kun ’ndualie mak lei, kane haimena penui kunrachi ze helungriaksiabe ’mpuî ge tat ti de lei. Chidadege aipau samhatkaibe sam leine penui peireige I teiwang de lei, penui je tew ra I samdiegaibe zeu, kane penui tew mak lei,” kacheu de lei.

⁹Tingwang ne achu rang dai ze, “Judaram ziemmename benai Jerusalem ge lungme ruage ka’nggibe la lei, kacheu de lei.

¹⁰Penui pau-paime gu hemui-helut ramme ge penui ’nreitat dai de lei, a kuâ lumeume lam ge zeu; kêdabe hera ramme guâ ’nggua ra hangge penui chai suitat te lei; Israel ki benai Juda ki ne a gu samhatkaibe penui peume dage I tewgaibe ze tewpâng ’nde lei.

¹¹Chipauziegene aigum ze Tingwang ne rang lei, pie le lau, penui ne ’mbiachilakbe kesiabe penui peireige I teiwang mui de lei; penui ne a dage ’nrung sede, penui je I ’ngking ra mak lei.

¹²Chidaze Juda gu namdi ramme ge benai Jerusalem ge lungme tat ku, zai penui ne mâ-perîmyibe ’ntau gai ze bambe hera ramme dage ’nrung gu lei, kane penui kahereube luage chiramme ne penui je tew’nring lak lei.

¹³Hei Juda gau, ningnui râ ramme â ningnui gu namdi kiege la de lei; zai ningnui ne ningnui je tew’ngngam gai ra Baal râ je mâ-perîmyibe rû gai ra herâtewbe-kaira ze Jerusalem puidi ramme kiege la de lei.

¹⁴“Chidaze aipau ziemmena ramme hangge kellum se lau, penui kelei ge ’nrung so, zai kellum de kellum se lau, penui kahereube lua achu penui ku dezai I ’ngking ra mak daseu.

¹⁵Ngaugailakbe tâ pa ne tewgai’ndibe luage â a hungpui a ki ge ’ndaikau tewduibe la lau? Ningnui je gesâbe peirabe ze hatkaibe benai herâtewbe meiji ne tei’mbiachi duî mei? Acheuzaine ningnui hesuiyi ze suang dui mei?

¹⁶Tingwang ne luakat ningchu ‘Olib ka’ndiakbe bang,’ pechî yibe ne peluiyibe bang, acheu ze ku lei; kane tingkai kechibe wangbe gezene chige pa ne hemi kai gu lei, zai bekeî ramme rû kam ’ndu lei.

¹⁷Baudime gu Tingwang ningchu sumgaipeu ne ning peireige kesiabe saba gai de lei, Israel kibau benai Juda kibau ne kesiabe tew gai lu, Baal dage mâ-perîmyibe rube ne a lumpum tewpatkaibe ziegeneu,” kacheu de lei.

¹⁸Tingwang ne chize achu chî ra tewgaibe ze I chî lu de lei; dadege penui tatew kesiabe a suage nang ne teilia de lei.

¹⁹Kane I â melipoine kaheguibe kau je tewchat ra nguatatbe gum lei. Penui ne kesiabe tew ra kahedeibe ze a peireige de lei be I â chî mak lei, acheu sa ze, “Kei lei, pebang benai pechî ze anui ne tew’nsia kei lei, keringme ram gene pechu lutua ne kei lei, dezai pe ji ze chibam ta de ra hangge zeu,” ze kacheube zeu.

²⁰Kane, Hei baudime gu Tingwang, pelingtit ze samrampeu, helung benai ka’nningbe kakedakpeu gau, penui peireige nang ne hekûmtewbe ze ngau ra achu pei lau, I â a deurabe ning dage peipat kai ’ndaseu.

²¹Chidaze Tingwang ne Anathoth gu ziemmename deu ge, ning gu keringbe peume deu ge acheu rang lei, zai acheu sa ze, “Tingwang ji gene sam pau se lau, makchai â, anui ba gene nang chai gu lei,” kacheu de lei.

²²Chipauziegene baudime gu Tingwang ne aigum ze rang lei: “Pie le lau, penui je I tewsâ gu lei; rehangme ramme hiazutkie gene chai gu lei; penui na rehangme benai heleume ramme herakûm gene chai gu lei;

²³zai hangkat du ’nsakpat ra mak lei. Anathoth gu ziemmena ramme peireige penui je tewsabe tingkum kesiabe I teiwang gai gu lei,” kacheu de lei.