Read Zeme Naga JEREMIA 12 Bible Online

JEREMIA 12 - Zeme Naga bible

JEREMIA 12

¹Kapelingbe ze nang lei, Hei Tingwang gau, ningchu I a lungneube samsabe luage zeu; sedu ning suage a tûdeu ze kiâm gu lei. ’Ndaitew ze helungriaksiame gu ’mpuî pungbi-bi bam lau? ’Ndaitew ze choachime leine lung’ntuatat bam lau?

²Penui je nang ne tau gai bei de lei, zai penui materinghi lei; penui chîngchu ze pechî ’nchipat lei; nang â penui mui ge kahechut lei, zai penui lung gene deutau di lei.

³Kane nang, Hei Tingwang gau, achu chi lei; achu nang ngau, zai a lung ning dage kakedak lei. Penui je meli je tewchatrabe gum ze gaupat chu lau, zai tewchatrabe mai hang penui je lupatchâm gai lau.

⁴’Ndaitiege heram ze desui ra lau, zai peningkâm leine ge hereubuâ ze heguikeu de ra lau? Chige lungbamme helungriaksiabe hanggene, hekaune ramme benai ’nruine ramme kechaîtua kam de lei, ziemmename ne, “Anui ne tâtewkahekapbe ze pa ngau ra mak lei,” kacheube ziegeneu.

⁵“Ziemmename dage nang teri’nzu ze dui lak tizai ’ndaigum ze hekun ramme je nang pakhelit ra lau? Zai pebâm yibe ge nang kâu dizai, Jordan hênamkang ge nang ’ndaigum ra lau?

⁶Ning sikiname zai ning peu ki ne, penui ne ning peireige choa gai lêuzai â, penui ne ning chaige ’nrung la de lei; penui ne ningchu samyibe ne ’mpau leusede penui je ’nnum’mmi se lau.”

⁷“I ne a ki put kai ’nde lei, a dagene piakeume je I sâu gai ’nde lei; I ne a lung gene hunglangpui je pe teureime ba ge pei gai ’nde lei.

⁸A dagene piakeume je a hangge hênamkang ge duilui gum ze chang de lei, a peireige pe kuâ ’nra gai de lei; chipauziegene pechu I ngaugailak te lei.

⁹I nguaheurame ze a hangge perierikbe kelie gum bam mei? Kelie ramme ne pechu guâgit bam mei? Tat ze hekaune leine je kumwang’ndui gai zu lau; teu kam’ndera hangge penui je nguawang gai zu lau.

¹⁰Misonggame melireîme ne a gu grepchî merie tew’nsia kam de lei, penui ne a damrabe chaîkau kam de lei, penui ne a suiyibe hedam ze hênamchangbe heram sâuzînggai’ndibe hang tew gai ’nde lei.

¹¹Penui ne chize put-hâmmuî’ndibe hang tew gai lei, put-hâmmuîgaibeibe zene achu desui ra tew gai lei. Heram pelane ze putzîng gai bei de lei, kane mî de pe lung ge ’nningtinggeu mak lei.

¹²Tingkangram ge ketaîloa ’ntûm ramme leine ge tewka’nsiame wang gai de lei; heram mik kat gene kêdabe riâ changbe Tingwang gu hiazutkie ne tew’nsia kam de lei; mî du hesuikatemibe ga de lei.

¹³Penui dekuîmeu ling gai lu ze hetu ramme gat lei, penui runne penui je tewlei gai lei, kane pegiê mâ de ga tai lei. Penui gu dekuîmeu gatwangbe ze penui ’ngngam gu lei, Tingwang pe lumpum-kadesangbe ziegeneu,” kacheu de lei.

¹⁴Israelme ne ’nram ra I ne peigaibe heram ze deîtaume a huazieme, kesiame tedeu ge Tingwang ne kacheu de lei: “Pie le lau, penui gu heram gene penui je I lutua ’ndu lei, zai Juda kibaume je penui ruagene I lutua ’ndu lei.

¹⁵Zai penui je I lutuakam’ndibe châng dezai, penui peireige I ngauka’nggiabe bam dai gu lei, zai hangkat-katne ze penui heurâ ge benai penui gu heram ge I nguawang gai dai gu lei.

¹⁶Zai penui ne a gu ziemmename gu ’mpuî sui’ntip tizai â, a ji gene deseurabe wangchang gu lei, Baal ji gene deseu ra a gu ziemmename je penui ne geteigaibe luigum ze a ji gene deseu ze, ‘Tingwang bambe luigum ze,’ acheu dizai â a gu ziemmename ruage penui je teichu gai gu lei.

¹⁷Kane mige heramzat gene a kuâ ’ngking mak tizai â chize puipat lu tew’nsia kam ’ndu lei,” ze Tingwang ne kacheu de lei.